3 Tejtzun tocxix tipun Amasías tuj tcawbil e cub tbyoꞌn ke xjal maꞌ cyoclen, akeju e cub byonte ktzan tman. 4 Pero mintiꞌ e cub tbyoꞌn ke cycꞌwaꞌl, ic tzaꞌnx tzꞌibamaj tuj tley Moisés tej ttzaj tmaꞌn Kman cyjaꞌ: Ke mambaj mlay cub cysentens tuꞌn cycyim tuꞌn tlaj cybinchben ke cycꞌwaꞌl, ex mi ke cꞌwaꞌlbaj tuꞌn tlaj cybinchben cyman, nok oꞌcx teylex te junjun cymel tuꞌn tlaj tex til.

5 E oc tchmoꞌn Amasías cycyakil xinak aj Judá ex aj Benjamín ex e baj tpaꞌn ic tzaꞌnx junjun cꞌloj cyiyjil, ex e oc tkꞌoꞌn ke nejenel te jun milchak soldad ex te jun syentchak soldad. Jawtzun tiꞌn jun tajlal, tzaj keꞌ cyiꞌj cycyakil keju otok che japun twiꞌ winkin abkꞌi. Tuꞌn tcyakil japun ox syent mil soldad scꞌoꞌmaj ke, banin cyten tuꞌn cyxiꞌ tuj kꞌoj ex at cynabl tuꞌn cyajben ke lans ex ke makbil cyuꞌn. 6 Ax icx e tzaj tiꞌn jun syent mil soldad aj Israel tuꞌn 75 quintal sak pwak.

7 Pero ul jun t-sanjel Dios tucꞌil Amasías ex xi tmaꞌn te cyjaꞌ:

—Tat rey, miꞌn cheꞌx tiꞌna ke soldad aj Israel tucꞌila, porque mi aꞌl Kman at cyucꞌil aj Israel ex mi cyucꞌil aj Efraín. 8 Ex ka ma txiꞌya ic tzaꞌn jlu cyucꞌix ke soldad aj Israel tucꞌila, masque ma tzꞌoc tlajwersin tiba tuꞌn tkꞌojina, pero tuꞌn Dios cbel tiꞌja cyuꞌn aj kꞌoj, porque ate Dios at tipumal tuꞌn tcamban jun xjal ex ka tuꞌn tcub tiꞌj, chi t-sanjel Dios.

9 Xitzun tkanin Amasías te t-sanjel Dios:

—¿Titzun cbantel tiꞌj 75 quintal sak pwak ma txi nkꞌoꞌne cye soldad aj Israel?

Xi ttzakꞌweꞌn t-sanjel Dios:

—Jacu tzaj tkꞌoꞌn Kman mas nim teya twitz jlu.

10 E eltzun tpaꞌn Amasías ke soldad, akeju otok che tzaj cyxol aj Efraín ex otok che ul tucꞌil, ex xi tmaꞌn cye tuꞌn cyaj cyja. Atzun cye soldad lu tzaj cykꞌoj cyiꞌj aj Judá, e ajtzun cyja in che kꞌojl wen.

11 Octzun tipuman tib Amasías ex e jeꞌx tiꞌn ke t-soldad max tuj chkꞌajlaj Atzꞌan tbi, ex cub tbyoꞌn laj mil xinak aj Seir. 12 Ax icx tzaj cytzyuꞌn aj Judá juntl laj mil xinak itzꞌxke, ex xi cyiꞌn twiꞌ jun pic, atzun e ex cyxoꞌn ttxaꞌn xak ex cycyakil ke jlu bachuꞌn e oca.

13 Atzun ke soldad aj Israel, akeju otok che el tpaꞌn Amasías tuꞌn miꞌn cyxiꞌ tucꞌil tuj kꞌoj ex otok txi tmaꞌn cye tuꞌn cyaj cyja, e oc tzokpaj cyiꞌj ke tnam ateꞌ tuj Judá, tzajx keꞌ cyuꞌn tuj tnam Samaria ex e pon max tuj tnam Bet-horón, cub cybyoꞌn ox mil xjal ex xi cyiꞌn nimcu tiꞌxti at cye xjal.

14 Tejtzun tajtz meltzꞌaj Amasías, otokxi txi aj byolte cye aj Edom, e tzaj tiꞌn ke tilbilal cydios aj Seir, oc tkꞌoꞌn te tdios, oc ten cꞌulul cye ex cub tpatun storac cywitz. 15 Tzajtzun tkꞌoj Kman tiꞌj Amasías ex tzaj t-samaꞌn jun t-sanjel tucꞌil kꞌmalte te cyjaꞌ:

—¿Tikuꞌn ma tzꞌoc tena kanil onbil cye ke dios te juntl nasyon, akeju mintiꞌ ma che clet xjal cyuꞌn tuj tkꞌaba?

16 Pero tej t-xi tmaꞌn t-sanjel Dios icju, tzaj ttzakꞌweꞌn rey:

—¿Mapetzun tzꞌoc kkꞌoꞌne toclena te kꞌolte consej weye? Miꞌn kꞌajta, ¿ex katzun taja tuꞌn tcub byoꞌna?

Atzunte t-sanjel Dios mintiꞌ xi tmaꞌn mastl yol, nok oꞌcx tma cyjaꞌ:

—Baꞌn wuꞌne ma cub t-ximan Dios tuꞌn tnaja tuꞌn, tuꞌn tlaj ma tbinchaya jlu ex tuꞌnju mintiꞌ ma txi tnimana nyole.

17 Te tibajxi oc ten Amasías aju rey cye aj Judá kanil tconsej cye keju kꞌol consej ateꞌ ttxlaj, ex bant tiꞌj cyuꞌn tuꞌn t-xi cysamaꞌn ke xjal tucꞌil Joás aju tcyꞌajal Joacaz ex tal tchman Jehú, aju rey cye aj Israel, tuꞌn t-xi cymaꞌn te cyjaꞌ: Tzaja, chitzun rey Amasías, ex e toc kꞌoj kuꞌn. 18 Atzunte Joás tzaj ttzakꞌweꞌn cyjaꞌ: Aju tal chꞌiꞌx cꞌul at twi witz Líbano xi tmaꞌn teju tzeꞌ wiꞌten aju at twi witz Líbano: Kꞌontza tmeꞌjela tuꞌn toc te t-xuꞌjil ncyꞌajale, chi chꞌiꞌx cꞌul. Pero icꞌ bet jun txcup te tjakꞌ cꞌul tibaj tal chꞌiꞌx cꞌul ex biꞌx baj naj tjakꞌ tkan. 19 In tmaꞌna ka o cub cyiꞌj aj Edom tuꞌna ex tuꞌntzun jlu in jaw tniman tiba. Mas baꞌn ax tencja tjaya. ¿Tikuꞌn taja tuꞌn ttzaj tiꞌna mya baꞌn tibaja ex cyibaj aj Judá? Chi Joás.

20 Atzunte Amasías mintiꞌ xi tbiꞌn porque tuꞌn Dios bant icju, tuꞌntzun tcub cyiꞌj tuꞌn Joás, tuꞌnju otok che oc ten kanil onbil cye ke cydios aj Edom. 21 Tzajtzun Joás tuꞌn toc tzokpaj kꞌojlel tiꞌj Amasías, ex tzyet kꞌoj cyuꞌn tuj tnam Bet-semes aju tcubsaꞌn tuj cytxꞌotxꞌ aj Judá. 22 Ex ake aj Judá cub cyiꞌj cyuꞌn aj Israel ex teyle junjun xi ok tja. 23 Ate Amasías aju rey cye aj Judá ocx presin tuj Bet-semes tuꞌn Joás aju rey cye aj Israel, ex te tibajxi xi tiꞌn tuj Jerusalén ex baj t-xitun Joás jun piẍ muro toc tiꞌjele tnam Jerusalén te cab syent var tkan, tzajx keꞌ jatum taꞌ Pwert Efraín tbi ex pon baj max jatum taꞌ Pwert Escyin tbi. 24 Ax icx xi tiꞌn tcyakil kꞌan pwak tucꞌix sak pwak, cyucꞌix cycyakil ke macbil ateꞌ tuj tja Dios, akeju ateꞌtok tuj tcwent Obed-edom, cyucꞌix ke kꞌinumabl ateꞌ tuj tja rey. Ax icx e tzyet junjun xjal maꞌ cyoclen tuꞌn, tuꞌn cyxi tiꞌn tucꞌil, ex ajtzun meltzꞌaj tuj tnam Samaria.

25 O ankꞌintl Amasías aju tcyꞌajal Joás, aju rey cye aj Judá, olaj abkꞌitl tcyimlenxi Joás aju tcyꞌajal Joacaz aju rey cye aj Israel. 26 Aju chꞌintl txꞌolbaben tiꞌj Amasías, tej ttzaj tkeꞌ tcawin ex tejxi tpon baj, atzun tzꞌiban tuj uꞌj jatum tzꞌiban tcyakil txꞌolbaben cyiꞌj ke rey cye aj Judá ex cye aj Israel. 27 Atxix tej tel tpaꞌn tib Amasías tiꞌj Kman, jaw cyiꞌn cyib xjal tiꞌj tuj Jerusalén, ex atzunte xi ok tuj tnam Laquis, pero e jeꞌx lpeꞌ xjal tiꞌj max tuj tnam lu, ex matzun cub cybyoꞌn. 28 Tzajtzun cyiꞌn t-ximlal tibaj jun chej cabay ex cuꞌx cymakuꞌn cyxol ktzan t-xeꞌchel tuj tnam toc tbi Ttanmi David.