2 Ke tbinchben Jotam baꞌn e eꞌla tuj twitz Kman ic tzaꞌnx ke tbinchben Uzías aju ktzan tman, ex mintiꞌ ocx patul storac tuj tja Dios ic tzaꞌn tbincha ktzan tman. Atzun ke tnam xjal cucx o cybincha mya baꞌn. 3 Baj tbinchaꞌn Jotam aju pwert tcub te jawni te tja Dios, ax icx baj tbinchaꞌn aju muro toc tiꞌj tnam tumlal lugar Ofel tbi. 4 Ax icx e jaw tbinchaꞌn ke tnam tuj tiwitz txꞌotxꞌ Judá ex e jaw tbinchaꞌn ke ja te cycolbil cyib xjal ex ke ja maꞌ cywaꞌl cyuj chcꞌul. 5 O kꞌojin tucꞌil rey cye aj Amón ex o cub cyiꞌj tuꞌn. Tuj abkꞌi lu aju chojenj chjet cyuꞌn aj Amón, 75 quintal sak pwak tucꞌix 37 mil quintal triw ex 37 mil quintal sebad. Ax tajlal jlu xi cykꞌoꞌn tej tel tcabin ex toxin abkꞌi.

6 O ten nim tipumal Jotam porque o bet tuj tumelxix twitz Kman. 7 Aju chꞌintl txꞌolbaben tiꞌj Jotam ex cyiꞌj cycyakil ke kꞌoj e oc tuj tcwent ex cyiꞌj ke akꞌuntl e bant tuꞌn, atzun tzꞌiban tuj uꞌj cye rey cye aj Israel ex cye aj Judá.

8 Otok japun Jotam twiꞌ 25 abkꞌi tej ttzyet tcawin ex o cawin kaklaj abkꞌi tuj Jerusalén. 9 Tejtzun tcyim, cuꞌx makuꞌn cyxol ktzan t-xeꞌchel tuj tnam toc tbi Ttanmi David. Te tibajxi, aju o cawin te t-xel, atzun Acaz aju tcyꞌajal.