4 Tujtzun twukin abkꞌi xi tmaꞌn Joiada tuꞌn cyxi txocbaj ke capitán cyucꞌix ke xkꞌukil tja rey, e ocx tiꞌn tuj tja Kman, ex bant tiꞌj jun yol tuꞌn cyucꞌil, tuꞌn ttzaj cymaꞌn jun yol axix toc tuj tja Kman, ex tzajtzun yecꞌun Joás cye, aju tcyꞌajal ktzan rey, tuꞌn Joiada. 5 Ex xi tmaꞌn cye: Atzun jlu cbantel cyuꞌne: Te ox cꞌloj cꞌelel cybaje, jun cꞌloj cybaje cꞌoquel ten xkꞌukil tja rey tuj kꞌij te ojlabl; 6 atzun juntl cꞌloj che bel ten jatum taꞌ pwert Shur tbi; atzun juntl cꞌloj che bel ten twitz pwert tiꞌjxi cwartel cye ke xkꞌukil. Cyjaꞌtzun cteꞌla tuꞌn t-xkꞌukinjtz tja rey cyuꞌne. 7 Ax icx, aju cabe cꞌloj xkꞌukil cjawitz cyturn tuj kꞌij te ojlabl, ax che xeꞌl xkꞌukil tuj tja Kman jatum taꞌ rey. 8 Ex atzun cyeye cꞌoquel cytxolban cyibe tiꞌjele rey, ex teyle junjun tzyuꞌn tmacbil aju in ajben tuj kꞌoj, ex ka at jun ma tzꞌocx tlamon tib cyxole, biꞌx cymel. Atzun cyeye che xeꞌle tucꞌil rey nok jatum oc t-xiꞌ.

9 Atzun cye capitán o cybincha tcyakil ic tzaꞌn otok tma pal Joiada. Teyle junjun capitán cyucꞌix ke soldad ateꞌtok tuj cycwent e pon tucꞌil pal Joiada, tzaꞌnxix keju in che ocx xkꞌukil tuj kꞌij te ojlabl, ax icx keju in jatz cyturn. 10 Xitzun tkꞌoꞌn pal ke lans cye ke nejenel cye soldad, cyucꞌix ke makbil in che ajben tuj kꞌoj, akeju tetok rey David nej, ex atzun ateꞌtok tuj tja Kman. 11 E cubtzun ten ke xkꞌukil tuj cylugar, xiꞌx keꞌ tuj tbankꞌab tja Kman ex pon baj tuj tnayaj, ex e cub ten tiꞌjele altar, ex teyle junjun kꞌiꞌn tmacbil in ajben tuj kꞌoj tuꞌn cycwentin tiꞌj rey. 12 Etztzun tiꞌn Joiada aju tcyꞌajal rey, jax tkꞌoꞌn coron tuj twiꞌ ex xi tkꞌoꞌn jun copya te ley te. Te tibajxi jax tkoꞌn aseyt tuj twiꞌ ex tma ka otok tzꞌoc te rey. Cycyakiltzun jaw txakꞌan cykꞌab ex e jaw schꞌin cyjaꞌ: Baꞌnwt tzꞌel tkꞌija, aya rey.

13 Tejtzun tbinte Atalía in che schꞌintok ke soldad xkꞌukil tja rey, ax icx ke xjal, xiꞌtzun tuj tja Kman jatum ateꞌtok cycyakil xjal. 14 O til, lu rey waꞌlcub ttxlaj tkan ja, ic tzaꞌnx in bant cyuꞌn oc nnoꞌc jun rey. Ex ateꞌtok ke nejenel ttxlaj, cyucꞌix ke xjal baꞌn che kꞌajtzan chun, ex lu ke xjal nimxix in che tzalajtok ex in che kꞌajtzantok cyiꞌj ke chun. Eltzun t-sbitꞌun t-xbalun Atalía, ex jaw schꞌin cyjaꞌ:

—Ma che oc meltzꞌaje wiꞌje. Ma che oc meltzꞌaje wiꞌje.

15 Xitzun tmaꞌn Joiada cye ke capitán cye soldad:

—Cyiꞌn exa xuꞌj lu cyxole, ex cybyoꞌncuye keju che xel lpeꞌ tiꞌj, chi Joiada.

Tuꞌnju otok tma pal tuꞌn miꞌn tcub byoꞌn xuꞌj tuj tja Kman, 16 cyjaꞌtzun, tzaj cytzyuꞌn ex xi cyiꞌn ttzi cyja chej, jatum taꞌ tja rey, ex atzun cub cybyoꞌn.

17 Te tibajxi, xi tcyuwsaꞌn Joiada te rey ex cye tnam xjal tuꞌn cyoc te jun tnam etzan tuꞌn Kman, ax icx xi tmaꞌn tuꞌn tbant tiꞌj jun yol tuꞌn rey cyucꞌil tnam xjal. 18 E jeꞌxtzun cycyakil tuꞌn cypon tuj ja te cꞌulbil te Baal ex cub cyxitun, cub cyxitun ke altar cyucꞌix ke tilbilal in che cꞌulun twitz. Atzunte Matán, aju pal in ajben twitz Baal, ax cub cybyoꞌn cywitz altar. E cubtzun tkꞌoꞌn Joiada ke xkꞌukil tuj tja Kman; 19 e tzajtzun tiꞌn ke capitán cye soldad, cyucꞌix ke xkꞌukil tja rey, cyucꞌix cycyakil tnam xjal, ex etz kꞌiꞌn rey cyuꞌn tuj tja Kman ex pon cyiꞌn max tuj ja jatum in che cawin rey, ocxtzun ttzi ja jatum cycubsaꞌn ke xkꞌukil, ex cubtzun keꞌ Joás tuj kꞌukbil te cawbil, 20 ex cycyakil tnam xjal e jaw tzalaj. Tuꞌnju otok cub byoꞌn Atalía tuꞌn spad tuj tja rey, cyjaꞌtzun, cycyakil xjal e cyaj ten tuj tzalajbil, akeju ateꞌ tuj tnam.

21 Toctok Joás twiꞌ wuk abkꞌi tej ttzyet tcawin.