4 Tzaj nimxix cyxobil tuꞌn jlu ex cyma: Mintiꞌ e xcyeꞌ cabe rey tiꞌj, ¿tzaꞌntzun tten tuꞌn kxcyeꞌ ke tiꞌj?

5 Atzunte mayordom tuj tja rey, tucꞌix gobernador tuj tnam, cyucꞌix ke cytijil xjal ex cyucꞌix ke xjal cyocsaꞌn te cwentil cye ke tcyꞌajal rey, xi cysamaꞌn tkanil lu te Jehú: Lu koꞌye lu, jacu ko ajbene teya, ex jacu kbinchaye tcyakil aju ctzajel tmaꞌna, pero mlay tzꞌoc kkꞌoꞌne toclen jun tcyꞌajal ktzan Acab tuꞌn toc te rey. Binchama nok alcye baꞌn tuj twitza, che chi.

6 Xitzun ttzꞌiban Jehú juntl uꞌj, ex chi cyjaꞌ: Ka cykꞌon cyibe wucꞌile ex ka cyaje tuꞌn t-xi cynimane ke orden che xel nkꞌoꞌne, tlokju nchiꞌj bix che tzaje wucꞌile tuj Jezreel ex cyiꞌntze cywiꞌ ke tcyꞌajal cypatrone.

Setenta cybaj ke tcyꞌajal rey Acab ateꞌtok tuj tnam cyucꞌil ke xjal maꞌ cyoclen, akeju otok che chꞌisante cye. 7 Tejtzun cycꞌmonte ke xjal aju uꞌj lu, tzajtzun cytzyuꞌn ke 70 tcyꞌajal rey ex e cub cybyoꞌn; cuꞌxtzun cykꞌoꞌn ke cywiꞌ tuj junjun chiꞌl ex xi cysamaꞌn tucꞌil Jehú tuj Jezreel. 8 Pontzun jun sanjel ex xi tmaꞌn te Jehú:

—Ma che ul kꞌiꞌn cywiꞌ ke tcyꞌajal rey.

Xitzun tmaꞌn Jehú:

—Te cabe byuj tzꞌel cyuꞌne, ex cykꞌon cube ttzi tpwertil tnam, ex axtzun cykꞌon cyaje te nchiꞌj.

9 Te prim te juntl kꞌij etz Jehú, cub weꞌ ex xi tmaꞌn cye cycyakil tnam xjal:

—Cyeye mintiꞌ cyile. Akine in cub ximante tuꞌn tjaw wiꞌn wibe tiꞌj npatrone ex o cub nbyoꞌne; pero ¿alcye ma cub byonte cye cycyakil jlu? 10 Tzꞌelx cynicꞌe tiꞌj, mi jun yol mintiꞌwt ma japun aju o tma Kman cyiꞌj ke tcyꞌajal rey Acab. Ax te Kman ma binchante ic tzaꞌnx ju tyol o kꞌmanjtz tuꞌn Elías aju tmajen, chi Jehú.

11 Ex tuj Jezreel e cub tbyoꞌn cycyakil mastl tiyjil Acab, cyucꞌix cycyakil ke xinak maꞌ cyoclen, cyucꞌix ke xjal tamiwxix tib Acab cyucꞌil, ex cyucꞌix ke pal in che ajben te. Mi jun o cyaj ankꞌin tuꞌn.

12 Te tibajxi xiꞌ tuj Samaria, ex tmij be jatum taꞌ ju ja in che ten ke pastor tuj, 13 oc noj cyiꞌj ke terman Ocozías aju rey te Judá. Xitzun tkanin Jehú cye:

—¿Alcye keye?

Atzun cye tzaj cytzakꞌweꞌn:

—Terman Ocozías koꞌye, ex ma koꞌxe kꞌolbel cye ke tcyꞌajal rey Joram ex cye ke tal xuꞌj rey Jezabel.

14 Xitzun tmaꞌn Jehú cye ke xjal ateꞌ tucꞌil:

—Cytzyuꞌntze ke.

E tzajtzun tzyuꞌn cyuꞌn ke xjal otok che oc lpeꞌ tiꞌj Jehú, ex eltzun cytxꞌemin cywiꞌ ttzi xoch tcub jatum taꞌ ju ja in che ten ke pastor tuj. 42 cybaj ke xinak, ex mi jun cye jlu o cyaj ankꞌin.

15 Tejtzun ticꞌ Jehú tuj lugar ma chixin, oc noj tiꞌj Jonadab aju tcyꞌajal Recab, cyjaꞌtok ttzaj tuꞌn tul tucꞌil. Xi kꞌolben Jehú te ex tma:

—¿Baꞌnpe t-ximbetza wiꞌje, ic tzaꞌnx weye nximbetz tiꞌja?

—Baꞌnwe nximbetz tiꞌja, chi Jonadab xi ttzakꞌweꞌn.

—Katzun icju, chuxni kꞌontz tkꞌaba, chi Jehú.

Xitzun tkꞌoꞌn tkꞌab Jonadab ex jax kꞌiꞌn tuꞌn Jehú tuj tcarwaj, 16 ex tma:

—Koꞌ wucꞌile ex jacutzun tila aju nganiye ma tzaj tuꞌn tbant tajbil Kman wuꞌne.

Cyjaꞌtzun xi kꞌiꞌn Jonadab tuꞌn Jehú tuj tcarwaj. 17 Ex tejtzun tpon Jehú tuj Samaria, e cub tbyoꞌn cycyakil ke tiyjil Acab, akeju otok che cyaj ankꞌin. E cub baj cycyakil, ic tzaꞌnx otok tma Kman te Elías.

18 Te tibajxi jlu oc tchmoꞌn Jehú cycyakil tnam xjal ex xi tmaꞌn cye:

—Ate Acab myaxix nim o cꞌulun twitz Baal, atzun weye nimxix chin cꞌulule twitz. 19 Cyjaꞌtzun, baꞌn tuꞌn cytzaj cytxcoꞌne cycyakil ke t-sanjel Baal, cyucꞌix ke xjal in che cꞌulun twitz, ex cyucꞌix cycyakil ke pal in che ajben te, mi jun tuꞌn tcyaj ten, porque ma bant tten jun nintz chojbil wuꞌne te nimbil te Baal. Ka at jun mintiꞌ ma pon, cbel t-sentens tuꞌn tcyim, chi Jehú.

Pero bant tten aju sbubl lu tuꞌn Jehú, tuꞌntzun cynaj cycyakil ke xjal in che cꞌulun twitz Baal; 20 cyjaꞌtzun xi tmaꞌn tuꞌn tex tkanil tiꞌj ninkꞌij maꞌ t-xilen te Baal, ex banttzun icju. 21 Te tibajxi, e jeꞌx t-samaꞌn ke sanjel cyxol cycyakil aj Israel, ex cycyakil keju in che cꞌulun twitz Baal e pon tuj ja te cꞌulbil te. Mi jun cye mintiꞌwt pon, cyjaꞌtzun o nojxix aju ja in ajben te cꞌulbil te Baal. 22 Xitzun tmaꞌn Jehú te xjal cꞌuꞌl xbalun tuꞌn ttzaj tiꞌn ke xbalun te cye keju xjal in che cꞌulun twitz Baal, ex banttzun tuꞌn icju. 23 Atzunte Jehú tucꞌix Jonadab aju tcyꞌajal Recab e ocx tuj ja te cꞌulbil te Baal, ex xi tmaꞌn Jehú cye xjal cyjaꞌ:

—Cyqueꞌyin baje ka mi aꞌl jun at cyxole, akeju in che cꞌulun te Kman, porque oꞌcx at tuꞌn cyten akeju in che cꞌulun te Baal.

24 E ocxtzun ke xjal in che cꞌulun te Baal tuj ja te cꞌulbil te, tuꞌntzun t-xi cykꞌoꞌn ke chojbil ex ke oyaj patun in che cub. Ex atzunte Jehú e cub tkꞌoꞌn 80 xinak ttxaꞌn peꞌn, ex biꞌx xi tmaꞌn cye cyjaꞌ:

—Ka at jun ma txi tzokpinte jun cye ke xinak lu, akeju ma cheꞌx nkꞌoꞌne tuj cykꞌabe, axtzun cnajel te t-xel.

25 Te tibajxi, tej tbaj cykꞌoꞌn ke oyaj patun in che cub, xitzun tmaꞌn Jehú cye ke soldad cwentil te ex cye ke xjal maꞌ cyoclen ateꞌ ttxlaj:

—Cyocxe ex che cybyoꞌncuye. Mi jun tuꞌn ttzokpaj.

Atzun ke xinak ateꞌ tucꞌil Jehú e oc ten byol cye tuꞌn spad, ex e jeꞌtz cyxoꞌn tiꞌjxi ja. Te tibajxi e ocx max tujxi ja te cꞌulbil te Baal, 26 etztzun cyiꞌn ke tilbilal cyocx tuj ja te cꞌulbil te, ex cub cypatun. 27 Ax icx cub cypaꞌn aju tilbilal Baal, cub cyxitun ju ja te cꞌulbil te, oc cykꞌon te jun lugar jatum tuꞌn cypon xjal txaꞌl, ex cucx tten jaꞌlo.

28 Cyjaꞌtzun cub t-xitun Jehú cycyakil tilbilal Baal cyxol aj Israel tuꞌntzun miꞌn cycꞌulun cywitz. 29 Masque icju, pero cucx o binchan Jehú il, ic tzaꞌn o tbincha Jeroboam aju tcyꞌajal Nabat, aju e binchan ke aj Israel il tuꞌn, porque cucx o cꞌulun cywitz ke tilbilal tal tor kꞌan pwak cytxꞌotxꞌil, akeju ateꞌ tuj Dan ex tuj Betel.

30 Xitzun tmaꞌn Kman te Jehú: Tuꞌnju baꞌn ma tbinchaya nwitze ex tzꞌaklxix ke tbinchbena, porque ma che cub tbyoꞌna ke tcyꞌajal Acab ic tzaꞌnx otok cub nximane tuꞌn tbant cyiꞌj, cyjaꞌtzun ax jun tcyꞌajala cꞌoquel te rey tuꞌn tcawin cyibaj aj Israel, ax icx jun tchmana ex jun ttxca tchmana, chi Kman. 31 Masque icju, pero mya tuꞌn tcyakil tanmi Jehú o japun tley Kman tuꞌn, aju Cydios aj Israel, porque cucx o binchan il, ic tzaꞌn o tbincha Jeroboam, aju e binchan aj Israel il tuꞌn.

32 Tuj tkꞌijlalil lu, tzyet tuꞌn tel kꞌiꞌn cytxꞌotxꞌ aj Israel tuꞌn Kman. Oc tzokpaj Hazael cyiꞌj aj Israel tuj tcyakil tmojonil cytxꞌotxꞌ: 33 tzajx keꞌ max tuj tumlal tjawitz kꞌij tiꞌjxi nima Jordán, ex tuj tcyakil txꞌotxꞌ Galaad, cyucꞌix cytxꞌotxꞌ aj Gad, aj Rubén ex aj Manasés, ex tzajx keꞌ tuj tnam Aroer, aju tcub ttxlaj tkꞌab xak Arnón, ex pon baj tuj Galaad ex Basán.

34 Aju chꞌintl txꞌolbaben tiꞌj Jehú ex tiꞌj tcyakilju o tbincha, ex cyiꞌj ke tbinchben maꞌxix cyxilen, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 35 Tejtzun tcyim, cuꞌx makuꞌn tuj tnam Samaria, ex aju o cawin te t-xel, atzun Joacaz aju tcyꞌajal. 36 O cawin Jehú 28 abkꞌi cyibaj aj Israel tuj tnam Samaria.