—Bincham ttena. Kꞌinxa tcubil aseyt lu ex txiꞌya tuj tnam Ramot aju at tuj Galaad; 2 octzun tpona ma chixin, bix txiꞌya jyolte Jehú aju tcyꞌajal Josafat ex tal tchman Nimsi. Bix tzꞌocxa jatum taꞌ, ex cꞌelel tpaꞌna cyiꞌj ke tucꞌil ex cxel tiꞌna tuj juntl ja; 3 bixtzun tzaj ttzyuꞌna tcubil aseyt ex jax tkoꞌna tuj twiꞌ, ex kꞌmanxa te cyjaꞌ: Chi Kman in tmaꞌn: Akine chin oquel kꞌonte teya te rey cye aj Israel. Bixtzun jaket naj tlamel ja tuꞌna, bix tzꞌel oka ex miꞌn weꞌya.

4 Xiꞌtzun te cuꞌxun aju t-sanjel Dios max tuj tnam Ramot aju at tuj Galaad, 5 ex tejtzun tpon ma chixin, lutok ke nejenel cye soldad cychmon cyib. Xitzun tmaꞌn:

—Aya nejenel, at jun nyole teya.

—¿Alcye jun kxole kcyakile? Chi Jehú xi ttzakꞌweꞌn.

—Te teya, aya nejenel, chi t-sanjel Dios xi tmaꞌn.

6 Jawtzun weꞌ Jehú ex ocx tuj ja. Jax koꞌn aseyt tuj twiꞌ tuꞌn t-sanjel Dios ex xi tmaꞌn te cyjaꞌ:

—Ate Kman aju Cydios aj Israel in tmaꞌn cyjaꞌ: Aya cꞌoquel nkꞌoꞌne te rey cye aj Israel aju tnam etzan wuꞌne. 7 Tuꞌna che najel cycyakil ke tiyjil Acab aju tpatrona, ex cyjaꞌtzun tten cxelil wuꞌne aju cychcꞌel ke nsanjele ex cycyakil ke nmajene, aju o tzꞌel chitj tuꞌn Jezabel. 8 Cycyakil ke tiyjil Acab che najel; wuꞌne che najel cycyakil ke xinak tiyjil Acab cyxol aj Israel, ex mi jun cyjel ankꞌin. 9 Icx cbantel wuꞌne cyiꞌj tiyjil Acab ic tzaꞌn o nbinchaye cyiꞌj tiyjil Jeroboam aju tcyꞌajal Nabat, ex ic tzaꞌn o nbinchaye cyiꞌj tiyjil Baasa aju tcyꞌajal Ahías. 10 Atzunte Jezabel, cxel chyoꞌn cyuꞌn txꞌyan tuj tcojbil Jezreel, ex mi aꞌl jun cbelex makunte te, chi Kman, chi t-sanjel Dios.

Tej tbaj tmaꞌn jlu, ocxtzun tjakoꞌn t-sanjel Dios tlamel ja ex el ok. 11 Ex tej tpon meltzꞌaj Jehú cyxol keju at cyoclen ttxlaj tpatrón, xi cykanin ke jlu te:

—¿Ti ma baj? ¿Ti ma tzul aj tzcaj xjal lolte tucꞌila? Che chi.

—Ojtzkiꞌn xjal lu cyuꞌne, ax icx baꞌn cyuꞌne tzaꞌn yolin, chi Jehú.

12 —Miꞌn ko cub t-sbuꞌna, chux kꞌmantza keye tcyakil aju ma tma teya, che chi xi cytzakꞌweꞌn.

Xitzun ttzakꞌweꞌn Jehú:

—Atzun jlu ma tzaj tmaꞌn weye: Chi Kman in tmaꞌn: Aya cꞌoquel nkꞌoꞌne te rey cye aj Israel, chi Jehú.

13 Tujxtzunju or lu, teyle junjun cye tzaj cyiꞌn cyẍjoꞌw ex cub cylicꞌun cyibaj ke grad tuꞌn tcub weꞌ Jehú tibaj. Jurattzun oc cykꞌajtzaꞌn tcach ẍneꞌl ex e jaw schꞌin cyjaꞌ: Ate Jehú rey.

14 Ate Jehú aju tcyꞌajal Josafat ex tal tchman Nimsi jaw tiꞌn tib tiꞌj Joram. (Otok ten Joram cyucꞌil cycyakil aj Israel, tuꞌn tclet tnam Ramot aju at tuj Galaad, tuj kꞌoj oc tuꞌn Hazael aju rey te Siria, 15 ex otok tzꞌajtz meltzꞌaj Joram tuꞌn tpon tuj tnam Jezreel tuꞌn tkꞌanit ẍil tiꞌj, aju otok tzaꞌw cyuꞌn aj Siria tuj kꞌoj oc tucꞌil Hazael.) Xitzun tmaꞌn Jehú cye ke tucꞌil: Ka axix toc cyaje tuꞌn woque te cyreye, miꞌn txi cykꞌoꞌne ambil tuꞌn tex jun xjal tuj tnam tuꞌn t-xiꞌ kꞌmalte tkanil tuj Jezreel. 16 Jaxtzun Jehú tuj tcarwaj in ajben tuj kꞌoj, ex xiꞌ tuj Jezreel jatum in kꞌananjtztok Joram. Ax icx te Ocozías aju rey te Judá otok pon queꞌyilte Joram. 17 Tjaxtok jun xkꞌukil twi ja maꞌ twaꞌl tuj Jezreel, o til cyjaꞌ ttzaj Jehú cyucꞌix jun cꞌloj xjal ucꞌin tuꞌn, ex jaw schꞌin cyjaꞌ:

—At txkan xjal che ul, chi xjal.

Xitzun tmaꞌn Joram tuꞌn t-xiꞌ jun xjal tibaj chej canul cyiꞌj, tuꞌn t-xi tkanin cye ka tkanil tzalajbil kꞌiꞌn cyuꞌn.

18 Xiꞌtzun xjal tjax tibaj chej canul tiꞌj Jehú, ex xi tmaꞌn te cyjaꞌ:

—Tajbil rey tuꞌn tbinte ka tkanil tzalajbil kꞌiꞌn cyuꞌne.

Xi ttzakꞌweꞌn Jehú:

—A jlu mintiꞌ toclena tiꞌj. Chux lpetza wiꞌje.

Xitzun tmaꞌn ju xkꞌukil te Joram:

—Aju sanjel ma pon max jatum ateꞌ ke, ex naꞌnx tajtz meltzꞌaj.

19 Xi t-samaꞌn rey juntl xjal tibaj chej, ex pon max jatum ateꞌ ke, ex xi tmaꞌn:

—Tajbil rey tuꞌn tbinte ka tkanil tzalajbil kꞌiꞌn cyuꞌne, chi xjal.

Xi ttzakꞌweꞌn Jehú:

—A jlu mintiꞌ toclena tiꞌj. Chux lpetza wiꞌje.

20 Xi tmaꞌn xkꞌukil juntl maj:

—Ax icx ma pon juntl max jatum ateꞌ ke, pero naꞌnx tajtz meltzꞌaj. Ex aju yuculte carwaj mer ic tzaꞌn a Jehú aju tal tchman Nimsi, porque cyuwxix in bet carwaj tuꞌn, ic tzaꞌnx tmod.

21 Xitzun tmaꞌn Joram:

—Cybinchame tten ncarwaje aju in ajben tuj kꞌoj.

Banttzun tten tcarwaj cyuꞌn, atzunte Joram aju rey cye aj Israel, tucꞌix Ocozías aju rey cye aj Judá, teylex te junjun ocx tuj tex tcarwaj, ex e jeꞌxtzun canul tiꞌj Jehú. Atzun oc cycꞌulban cyib tucꞌil tuj txꞌotxꞌ etzantok tuꞌn ktzan Nabot aju aj Jezreel. 22 Tejtzun ttil Joram ka a Jehú, xitzun tmaꞌn te:

—¿Tkanil tzalajbilpe kꞌiꞌn tuꞌna, Jehú?

Xi ttzakꞌweꞌn Jehú:

—¿Tzaꞌn tten tuꞌn tten tzalajbil ka cucx tcꞌulun Jezabel aju ttxuꞌya cywitz ke tilbilal ex cucx tcyꞌaꞌn?

23 Kꞌontzun Joram welt ex el ok in schꞌintok ex in tmaꞌn:

—Ocozías, ma jaw tiꞌn tib Jehú tuꞌn tkꞌojin kiꞌj.

24 Tzaj tiꞌn Jehú xobl tplech, xi t-xoꞌn jun plech tiꞌj Joram. Aju plech cyjaꞌ xiꞌ ttzal tiꞌj, excu tuj tanmi, axtzun cub tzꞌak Joram tuj tcarwaj ex cyim. 25 Xitzun tmaꞌn Jehú te Bidcar aju onil te:

—Kꞌiꞌn etza ex xoꞌn cuꞌxa tuj tcojbil ktzan Nabot aju aj Jezreel, porque naꞌnx wuꞌne, tej lepchix kxiꞌ tiꞌj Acab aju ktzan tman, atzun tzaj tmaꞌn Kman aju sentens lu tiꞌj, chi cyjaꞌ: 26 Ic tzaꞌn o wile ew aju tchcꞌel Nabot tucꞌix cychcꞌel ke tcꞌwaꞌl, icxtzun cbajel tiꞌja wuꞌne tujx txꞌotxꞌ lu, tuꞌntzun t-xelin aju tcamic Nabot. Akine Cymane in chin kꞌmante jlu, chi Dios tma. Cyjaꞌtzun kꞌinxa ex xoꞌn cuxa tuj tcojbil Nabot ic tzaꞌn o tma Kman.

27 Tejtzun ttil Ocozías aju rey te Judá aju otok baj, xitzun ok tuj Bet-hagán. Atzunte Jehú oc lpeꞌ tiꞌj, ex xi tmaꞌn cye ke tucꞌil:

—Ax icx cybyoꞌncuye jlu.

Baj cycꞌixbisaꞌn tuꞌn plech tuj tcarwaj max twitz jawl Gur tbi, tcub jatum taꞌ tnam Ibleam, pero el ok Ocozías ex pon max tuj tnam Meguido, ex atzun cyim ma chixin. 28 Te tibajxi, xi kꞌiꞌn t-ximlal Ocozías tuj jun carwaj cyuꞌn ke tmajen tuꞌn tpon tuj Jerusalén, ex atzun ocx cymakuꞌn tuj jun pantyón ttxlaj cypantyón ktzan t-xeꞌchel, tuj tnam Ttanmi David tbi.

29 Tzyettzun tcawin Ocozías tuj Judá tuj tjunlajin abkꞌi ttzyetlen tcawin Joram aju tcyꞌajal Acab.

30 Xiꞌ Jehú tuj tnam Jezreel. Tej tbinte Jezabel jlu, oc tkꞌoꞌn tcꞌaꞌ ttxoꞌw twitz, ex baj tbinchaꞌn tten ttzmal twiꞌ, ex etztzun tqueꞌyin ttzi ventan. 31 Tej tpon Jehú ttzi tpwertil tnam, xi tmaꞌn Jezabel te:

—¿Baꞌnpe taꞌya Zimri, aya byolte tpatrona?

32 Jaxtzun tqueꞌyin Jehú jatum taꞌ ventan ex tma:

—¿Alcye tkꞌon tib wucꞌile?

Cab ex ka ox xjal at cyoclen tuj tja rey etz cyqueꞌyin ttzi ventan, 33 ex xi tmaꞌn Jehú cye:

—Cyxoꞌn cuꞌtze xuꞌj.

Cuꞌtztzun cyxoꞌn, ex at tchcꞌel oc txꞌitl twitz ja ex cyiꞌj chej, ex baj cywaban chej t-ximlal Jezabel. 34 Xiꞌtzun Jehú waꞌl ex cꞌal.

Mas yajxi, xi tmaꞌn cye ke tucꞌil:

—Tuj cycwente cyjel ten t-ximlal xuꞌj mya baꞌn lu, ex cymakun cuxe porque tmeꞌjel jun rey jlu, chi Jehú.

35 Tejtzun cyxiꞌ makulte te, oꞌcx tbakil twiꞌ cnet cyuꞌn, cyucꞌix ke tkan ex ke tkꞌab. 36 E ajtzun meltzꞌaj kꞌmalte te Jehú, ex xi tmaꞌn Jehú cye:

—A jlu ojtxi tma Kman, ic tzaꞌnx o tma Elías aju tmajen, aju aj Tisbe, ka txꞌyan tuꞌn cyxi chyoꞌnte tchibjal Jezabel tuj cojbil tuj tnam Jezreel, 37 ex aju t-ximlal tuꞌn tbaj sputj ic tzaꞌn cytxaꞌ alumaj tuj cojbil tuj tnam Jezreel, ocxi tcub naj, ex ya mi jun tuꞌn tel tnicꞌ tiꞌj ka a t-ximlal Jezabel jlu, chi Jehú.