—Bintza aju tyol Kman chi in tmaꞌn: Ax or jlu nchiꞌj, barat ctel twi arin ttzi tpwertil tnam Samaria, nok jun sak pwak twiꞌ jun alm, ax icx sebad nok jun sak pwak twiꞌ cabe alm.

2 Atzunte xjal onil te rey xi ttzakꞌweꞌn te t-sanjel Dios:

—Masque che jaket ke tventanil cyaꞌj tuꞌn Kman, pero baka jacu tzul twi cꞌaẍjel ic tzaꞌn ma tmaya.

Atzunte Eliseo xi ttzakꞌweꞌn:

—Oc tilaꞌya tuꞌn twitza, pero teya mlay waꞌna tiꞌj, chi Eliseo.

3 At cyaje xjal at txꞌaꞌc cyiꞌj mintiꞌ kꞌanbil tiꞌj ateꞌ ttzi tpwertil tnam, in cymaꞌn cyxolx:

—¿Ti in bant kuꞌn nok kꞌuklko tzalu, nok in ko ayon tiꞌj tuꞌn kcyim? 4 Ka ma cub kximan tuꞌn kocx tuj tnam ko cymel, porque at nim weꞌyaj tuj tnam; ex ka ax ma ko cub keꞌ tzalu, ax icx ko cymel. Mejor koꞌ tuj campament jatum ateꞌ ke soldad aj Siria; ka mintiꞌ ma ko cub byoꞌn cyuꞌn, ko ankꞌil; ex ka ma ko cub byoꞌn, malo bant-x kcyim.

5 Cyjaꞌtzun, tej toc kax e jaw weꞌ ex cub be cyuꞌn tuꞌn cypon tuj campament jatum ateꞌtok ke soldad aj Siria; pero tej cypon lakꞌeꞌ nikayin, o cyil mi jun xjal at. 6 Porque tbincha Kman tuꞌn cybinte ke cysoldad aj Siria tkꞌajkꞌajel carwaj in che ajben tuj kꞌoj, tucꞌix tkꞌajkꞌajel cykan chej cyjax soldad cyibaj, ex cyucꞌix nimcu soldad. Tuꞌntzun jlu cub cyximan aj Siria ka ate rey cye aj Israel otok txi tkꞌoꞌn pwak cye ke rey cye aj Hetey, ex cye ke rey cye aj Ejipt, tuꞌn cytzaj ex tuꞌn cyoc tzokpaj cyiꞌj. 7 Cyjaꞌtzun, tej toc kax, e jaw weꞌ ex e jeꞌl ok, ex ax cyaj cykꞌoꞌn cyja, xbalun ja, cyucꞌix ke cychej ex ke cybur, ex cyaj cycolin tcyakil ic tzaꞌnx tten, tuꞌntzun cycolpaj ex tuꞌn miꞌn cynaj. 8 Tejtzun cypon ke cyaje xjal at txꞌaꞌc cyiꞌj tuj campament jatum otok che ten ke soldad aj Siria, e ocxtzun tuj jun xbalun ja, e oc ten waꞌl ex cꞌal; etz cyiꞌn sak pwak ex kꞌan pwak ex xbalun, ex e jeꞌx ewal te. E aj juntl maj, ex e ocx tuj juntl xbalun ja, ax icx cybincha, etz cyiꞌn ke tiꞌxti, ex e jeꞌx ewal te. 9 Pero ul tuj cyximbetz ex cyma:

—Mya tuj tumel aju in kbinchaꞌn. Aju kꞌij lu jun kꞌij tuꞌn t-xi kꞌot jun baꞌn tkanil, ex atzun ke mintiꞌ in kkꞌoꞌn tkanil. Ka ma cub kyoꞌn te nchiꞌjxi, at kil tiꞌj jlu. Mejor koꞌ ma tja rey kꞌmalte tkanil.

10 E ultzun, ex tzaj cytxcoꞌn ke cwentil tnam ex xi cymaꞌn cye:

—Ma koꞌx aje tuj campament jatum ateꞌtok ke soldad aj Siria, pero mi jun xjal at, ex misicyer tkꞌajkꞌajel twiꞌ jun xjal in yolin. Oꞌcx ke chej ex ke bur cꞌaloꞌn, ex ke xbalun ja ateꞌ ke ic tzaꞌnx cyten.

11 E jeꞌxtzun ke xkꞌukil ttzi tpwertil tnam kꞌmalte tkanil cyucꞌil keju ateꞌ tuj tja rey. 12 Jawtzun weꞌ rey, masque te konicꞌan, ex xi tmaꞌn cye keju at cyoclen ttxlaj:

—Cxel nchicꞌbaꞌne cyeye aju ma cub cyximan ke aj Siria kiꞌj. Baꞌntl cyuꞌn in ko yajlanjtz tuꞌn weꞌyaj, cyjaꞌtzun ma che ex tuj campament jatum ateꞌ ke, ma txi cyewan cyib tuj cojbil, ex in che ayon kiꞌj tuꞌn kex tuj tnam tuꞌntzun ktzyet cyuꞌn itzꞌx koꞌ, ex tuꞌn cyoctz tuj tnam, chi rey.

13 Pero o tma jun cyxol keju at cyoclen ttxlaj rey:

—E cytzaj kꞌit jweꞌ chej cyxol keju itzꞌx ke, e cyxi samet junjun xinak cyibaj, ex octzun kilaꞌ ti ma baj. Ka tuꞌn cyankꞌin ex ka tuꞌn cycyim keju che xel samet, pero mya mas baꞌn ex mya mas ploj te cye cywitz mastl aj Israel, akeju che najel oc cycyaj ten tzalu.

14 E tzajtzun kꞌiꞌn cabe carwaj cyucꞌix ke chej te jawolte cye, e jeꞌxtzun samaꞌn tuꞌn rey tuꞌn cyxi lpeꞌ cyiꞌj ke soldad aj Siria, ex xi tmaꞌn cye yucul cye carwaj tuꞌn tbaj cyqueꞌyin jatum ateꞌ ke. 15 E jeꞌxtzun, ex ax e jeꞌx lpeꞌ tiꞌj texlen cykan aj Siria tejxi cypon ttzi nima Jordán, ex o cyil tuj tcyakil be at nim xbalun tucꞌix mastl tiꞌxti otok cyaj tzꞌak cyuꞌn aj Siria, tuꞌn tlaj nok elacyim e jeꞌl ok ke tuꞌn cycolpaj. E ajtztzun meltzꞌaj ke xjal otok cheꞌx t-samaꞌn rey, ex xi cytxꞌolbaꞌn te rey tiꞌj tcyakilju otok cyil tuj be. 16 Atzun ke xjal tuj Samaria e jeꞌx naj, ex tzaj cyiꞌn tcyakilju o cnet cyuꞌn tuj cycampament aj Siria. Ex atzun o japun ju yol otok tma Kman, o cꞌayinjtz arin tuꞌn jun sak pwak twiꞌ jun alm; ex jun sak pwak twiꞌ cabe alm sebad.

17 Xitzun tmaꞌn rey te xjal aju at toclen ttxlaj tuꞌn tcub ten cwentil ttzi tpwertil tnam, pero biꞌx cyaj tjakꞌ cykan xjal ttzi tpwertil tnam, ex axtzun cyim, ic tzaꞌnx otok tma t-sanjel Dios tej t-xi aj rey tucꞌil.

18 Cyjaꞌtzun tten o bant jlu ic tzaꞌnx otok tma t-sanjel Dios te rey, tej tmante ka ttzi tpwertil tnam Samaria tuꞌn tlakꞌet jun alm arin nok tuꞌn jun sak pwak twiꞌ, ex nok tuꞌn jun sak pwak tuꞌn tlakꞌet cabe alm sebad. 19 Ex atzunte xjal aju at toclen ttxlaj rey otok txi ttzakꞌweꞌn te t-sanjel Dios: Masque che jaket ke tventanil cyaꞌj tuꞌn Kman, pero baka jacu bant ic tzaꞌn in tmaꞌna, chi xjal. Atzunte Eliseo xi tmaꞌn te ka attok tuꞌn ticꞌ twitz tiꞌj, pero mya ajun tuꞌn twaꞌn tiꞌj. 20 Ex o japun icju, porque biꞌx o cyaj tjakꞌ cykan xjal ttzi tpwertil tnam, ex biꞌx cyim.