—Baꞌn tuꞌna, aju ja jatum najlkoꞌ puro tal chꞌin tuj. 2 Kꞌontza ambil keye tuꞌn kxiꞌye ttzi nima Jordán, ex teylex te junjun tuꞌn tcnet jun viga tuꞌn, tuꞌntzun tbaj kbinchaꞌne jun ja ma chixin tuꞌn kten tuj, che chi.

—Baꞌn tuꞌn cyxiꞌye, chi Eliseo xi ttzakꞌweꞌn.

3 —Binchama xtalbil, txiꞌya kucꞌile, chi jun cyxol.

—Baꞌn, jacu chinxe cyucꞌile, chi Eliseo.

4 Xiꞌtzun Eliseo cyucꞌil max ttzi nima Jordán, ex atzun e oc ten txꞌemil tzeꞌ. 5 Pero tej in txꞌemin jun tiꞌj jun ttzeꞌ, etz jilpaj tcꞌuxbil, ex xi tzꞌak tuj nima. Cyjaꞌtzun jaw schꞌin:

—Ay xnakꞌtzal, nok majen saj cꞌuxbil wuꞌne ex ma txi tzꞌak tuj nima.

6 —¿Jatum xcuꞌx tzꞌak? Chi Eliseo aju t-sanjel Dios.

Tzajtzun tyecꞌun jatum cuꞌx tzꞌak. Jawtzun ttxꞌemin Eliseo jun tal tzeꞌ ex xi t-xoꞌn tuj aꞌ, ex jaw ikan cꞌuxbil tibaj aꞌ.

7 —Kꞌin jatza, chi Eliseo xi tmaꞌn.

Xitzun tnukpiꞌn tkꞌab ex jatz tiꞌn tcꞌuxbil tuj aꞌ.

8 Ate rey cye aj Siria attok kꞌoj cyxol cyucꞌil aj Israel, ex bant tiꞌj tuꞌn cyucꞌil keju at cyoclen ttxlaj, alcyechak lugar jatum tuꞌn cycub ten ke t-soldad junjun maj. 9 Xitzun t-samaꞌn Eliseo tkanil te rey cye aj Israel tuꞌn miꞌn cyxiꞌ tuj lugar lu, porque atzun cyjaꞌtok cytzaj ke aj Siria. 10 Cyjaꞌtzun xi t-samaꞌn rey cye aj Israel ke t-soldad queꞌyilte tuj lugar ka axtok ateꞌke, ic tzaꞌnx otok tma t-sanjel Dios, ex cyjaꞌylex o tenba tuꞌn, ex cyjaꞌtzun tten e clet nimcu maj.

11 Aju rey cye aj Siria tzaj tkꞌoj tuꞌn jlu, e tzajtzun ttxcoꞌn keju at cyoclen ttxlaj, ex xi tmaꞌn cye:

—Cymantze weye alcye jun ke ma txi tkꞌon tib te rey cye aj Israel.

12 Xi ttzakꞌweꞌn jun cye:

—Mi jun, Tat Rey. Ate Eliseo aju t-sanjel Dios at cyxol aj Israel, atzunju in kꞌmante te rey cye aj Israel tiꞌj tcyakilju yol in yolina tiꞌj max tuj tjaya jatum in tana.

13 Xitzun tmaꞌn cyrey aj Siria cye:

—Cybime jatum taꞌ, tuꞌntzun cyxi nsamaꞌne junjun xinak tzyulte te.

Tejtzun t-xi kꞌmaꞌn te ka atzun taꞌ tuj tnam Dotán, 14 xi t-samaꞌn txkan soldad cyjax cyibaj chej tuꞌn cyten ma chixin, cyucꞌix carwaj in che ajben tuj kꞌoj, ex cyucꞌix txkan soldad; konicꞌan e pon tuj tnam Dotán, ex baj cytxolban cyib tiꞌjele tnam. 15 Tejtzun kskix tuj juntl kꞌij, jaw weꞌ tmajen Eliseo, ex tej tetz, o til ke soldad cyjax cyibaj chej, cyucꞌix ke carwaj in che ajben tuj kꞌoj otok baj cytxolban cyib tiꞌjele tnam; xiꞌtzun kꞌmalte te Eliseo cyjaꞌ:

—Xnakꞌtzal, ¿ti cꞌoquel kiꞌj jaꞌlo?

16 Atzunte Eliseo xi tmaꞌn te:

—Miꞌn xoba, porque mas nim ke at kucꞌil twitzju cye at cyucꞌil.

17 Octzun ten Eliseo naꞌl Dios ex tma: In chin cubsane twitza Nman, tuꞌn tjaket twitz nmajene tuꞌna tuꞌntzun tbant tqueꞌyin. Jakettzun twitz majen tuꞌn Kman ex o til, lu twi witz nojni cyuꞌn soldad cyjax cyibaj chej, cyucꞌix ke carwaj in cꞌant kꞌakꞌ cyiꞌj, ateꞌ tiꞌjele Eliseo.

18 Tej cyjaꞌtok cyoc tzokpaj aj Siria tiꞌj Eliseo, oc ten naꞌl Dios ex tma:

—In chin cubsane twitza Nman tuꞌn tcub tmoẍsaꞌna cywitz ke xjal lu.

Cubtzun moẍix cywitz xjal tuꞌn Kman ic tzaꞌnx otok txi tkanin Eliseo. 19 Xitzun tmaꞌn Eliseo cye aj Siria:

—Mya a be kꞌiꞌn cyuꞌne, ex mya a tnam jlu aju in che jyone tiꞌj. Che lpetze wiꞌje, ex jacu cheꞌx nẍakluꞌne tucꞌil ju xjal in che jyone tiꞌj.

E jeꞌxtzun tiꞌn Eliseo ke soldad lu tuj tnam Samaria. 20 Tejtzun cypon ma chixin, oc ten Eliseo naꞌl Dios ex tma: Jaꞌlo Nman, jakoma cywitz tuꞌn tbant cyqueꞌyin. Tejtzun tjaw cyqueꞌyin cywitz, lu ateꞌtok tuj Samaria. 21 Tejtzun cyilwaj tuꞌn rey cye aj Israel, xi tkanin te Eliseo:

—¿Che belpe nbyoꞌne ke jlu, Tat?

22 Atzunte Eliseo xi ttzakꞌweꞌn:

—Miꞌn, miꞌn che cub tbyoꞌna. ¿Baka in che cub tbyoꞌna keju in che tzyet tuꞌna tuj kꞌoj? Kꞌonxa cywa ex cycꞌa ex samaꞌn aja ke tucꞌil cypatrón, chi Eliseo.

23 Tbinchatzun rey jun nintz waꞌn te cye; tejtzun cybaj waꞌn ex tej cybaj cꞌaꞌn, xi tmaꞌn rey cye tuꞌn cyaj meltzꞌaj ex e ajtzun tucꞌil cypatrón. Ex biꞌxtzun xi cycolin ke aj Siria tuꞌn cypon kꞌojlel cyiꞌj aj Israel.

24 Te tibajxi jlu, ate Ben-adad aju rey te Siria oc tchmoꞌn cycyakil ke t-soldad, e jeꞌx ex baj cytxolban cyib tiꞌjele tnam Samaria, tuꞌn cyoc tzokpaj tiꞌj. 25 Tzajtzun jun nintz weꞌyaj tuj tnam Samaria tuꞌnju baj cytxolban cyib aj kꞌoj tiꞌj, ex tuꞌntzun jlu japun 80 sak pwak tiꞌj tbakil twiꞌ jun bur, ex atzun tiꞌj jun lak ttxa palom, jweꞌ sak pwak japun tiꞌj.

26 At jun kꞌij in bettok rey cye aj Israel twi muro te tnam, ex xi schꞌin jun xuꞌj tiꞌj ex tma:

—Onina wiꞌje, Tat Rey.

27 Atzunte rey xi ttzakꞌweꞌn:

—Ka mintiꞌ in onin Kman tiꞌja, ¿tzaꞌntzun tten taja tuꞌn wonine tiꞌja? ¿Jacupetzun cnet triw te twaya wuꞌne, ex taꞌl twitz uva te tcꞌaꞌya? 28 ¿Titzun ma baj tiꞌja? Chi rey.

Atzunte xuꞌj xi ttzakꞌweꞌn:

—Aju xuꞌj lu tzaj tmaꞌn weye: Kꞌintza tala tuꞌn t-xi kchyoꞌn jaꞌlo, ex atzun weye wal cxel kchyoꞌn nchiꞌj, chi xuꞌj weye. 29 Bajtzun ktzkꞌajsaꞌne aju weye wal ex baj kchyoꞌne. Tujtzun juntl kꞌij, xi nmaꞌne te tuꞌn ttzaj tkꞌoꞌn te tal tuꞌn t-xi kchyoꞌne, atzun te ma tzꞌel tewan tal, chi xuꞌj.

30 Tejtzun tbinte rey tyol xuꞌj, el t-sbitꞌun t-xbalun tiꞌj te jun techal tiꞌj tbis. Ex tuꞌnju tjaxtok twi muro te tnam, o cyil ke xjal ka chꞌiꞌx twitz t-xbalun toc te tujxi. 31 Tmatzun rey cyjaꞌ: Tzajxwit nim ncastiwoye tuꞌn Dios ka miꞌn sel ntxꞌemine twiꞌ Eliseo tujx ju kꞌij jaꞌlo, aju tcyꞌajal Safat.

32 Kꞌukltok Eliseo ma tja cyucꞌil ke cytijil xjal. Otok txi t-samaꞌn rey jun cyxol ke xinak ateꞌ tucꞌil, pero tej naꞌnxtok tpon t-sanjel rey, xi tmaꞌn Eliseo cye ke tij xjal:

—Cykꞌonque cwent tiꞌj rey byol xjal ma tzaj t-samaꞌn jun xjal tuꞌn tel txꞌemin nwiꞌye tuꞌn. Ex cykꞌonque cwent tiꞌj oc tul xjal ma tzaj lajoꞌn, bix tzꞌex cylamoꞌne tlamel ja ex ax che oc tene tzyulte tuꞌn miꞌn toctz tjakoꞌn, porque kꞌajkꞌaj tbinx tkan tpatrón lepchix ttzaj tiꞌj.

33 Matok in yolin Eliseo cyucꞌil ke tij xjal tej tpon t-sanjel rey twitz ex tma:

—Tcyakilju mya baꞌn ma tzaj kiꞌj, tuꞌn Kman ma tzaj tkꞌoꞌn. ¿Ti tten tuꞌn toc keꞌtl ncꞌuꞌje tiꞌj? Chi t-sanjel rey.