2 At jun cꞌloj soldad cye aj Siria, tej cyxi aj kꞌojlel cyiꞌj aj Israel, tzaj cytzyuꞌn jun tal txin, ex oc te tmajen t-xuꞌjil Naamán. 3 Aju tal txin lu xi tmaꞌn te t-xuꞌjil Naamán:

—Nokwit baꞌn t-xiꞌ npatrone tucꞌil t-sanjel Dios at tuj Samaria, jacu banix txꞌaꞌc tiꞌj.

4 Xiꞌtzun Naamán tucꞌil rey ex xi ttxꞌolbaꞌn aju otok tma tal txin. 5 Atzunte rey cye aj Siria xi ttzakꞌweꞌn:

—Baꞌn t-xiꞌya, ex jacu txi nsamaꞌne jun uꞌj te cyrey aj Israel.

Xiꞌtzun Naamán; xi tiꞌn wuk quintal tucꞌ 50 libr sak pwak, ex jun quintal tucꞌ 50 libr kꞌan pwak, tucꞌix laj pak xbalun, 6 ex xi tiꞌn aju uꞌj te rey cye aj Israel, ex chi in tmaꞌn tuj uꞌj: Aju til uꞌj lu tuꞌn tel tnicꞌa tiꞌj ka akine ma chinx samante Naamán. Aju xjal lu ajun cyxol keju at cyoclen ntxlaje, ex waje tuꞌn tbanix tuꞌna te jun wik txꞌaꞌc mintiꞌ kꞌanbil tiꞌj.

7 Tejtzun tjaw t-schꞌiꞌn rey cye aj Israel aju uꞌj, el t-sbitꞌun t-xbalun te jun techal tiꞌj tbis, ex tma:

—¿Baka Dios kine, tuꞌn tel wiꞌne tchwinklal jun xjal, ex ka tuꞌn tjaw ankꞌin wuꞌne, tuꞌnju ma tzaj samaꞌn jun xinak wucꞌile tuꞌn toc nkꞌanine ex tuꞌn tbanix txꞌaꞌc tiꞌj wuꞌne? Tzꞌelx cynicꞌe tiꞌj, aju xjal lu in jyon tumel tzaꞌn tten tuꞌn tul kꞌojlel wiꞌje, chi rey.

8 Tej tbinte Eliseo aju t-sanjel Dios ka otok tzꞌel t-sbitꞌun rey t-xbalun tiꞌj, tuꞌn tlaj uꞌj otok pon samaꞌn tucꞌil, xi t-samaꞌn jun tkanil te rey cyjaꞌ: ¿Tikuꞌn ma tzꞌel t-sbitꞌun t-xbaluna tiꞌja? E ttzaj ju xinak lu wucꞌile, ex cꞌelel tnicꞌ tiꞌj ka at jun t-sanjel Dios cyxol aj Israel.

9 Xiꞌtzun Naamán tucꞌix tcarwaj ex ke tchej, ex ax cub weꞌ ttzi tja Eliseo. 10 Atzunte Eliseo xi t-samaꞌn jun t-sanjel tuꞌn t-xi tmaꞌn te Naamán cyjaꞌ: Txiꞌya, ex txꞌjon baj tiba wuk maj tuj nima Jordán, ex aju t-ximlala cbanixel.

11 Tzaj ttxꞌuꞌjil Naamán, icꞌtzun ex tma:

—Kape cꞌeletz ju xjal yolil wucꞌile, nchiwe, ex kape cbel weꞌ tuꞌn tcubsan wiꞌje twitz Tdios, ex tuꞌn tbaj tmacoꞌn ju ntxꞌaꞌque, ex tejwitlo xbant icju, mawtlo chin banixe. 12 Mas baꞌn ke nima Abana ex Farfar, akeju ateꞌ tuj Damasco, cywitz cycyakil nima at tuj cytxꞌotxꞌ aj Israel. ¿Myapetzun mas baꞌn awt ẍinxe txꞌjol wibe cyuj ke nima lu tuꞌn nbanixe? Chi Naamán.

In kꞌojl wen tej ticꞌ tuj lugar lu. 13 Pero e pon lakꞌeꞌ ke tmajen ttxlaj ex xi cymaꞌn te:

—Tat, nokwit mas cyuwxix jun tumel saj kꞌmaꞌn teya tuꞌn t-sanjel Dios tuꞌn tbinchanteya, mawtlo bant tuꞌna. Yajtzun te jlu aju ma tma teya, nok chꞌin t-xilen, tuꞌn ttxꞌjonte tiba tuj aꞌ ex biꞌx cbanixela, che chi majen.

14 Xiꞌtzun Naamán, ex cuꞌx tlamon tib wuk maj tuj nima Jordán ic tzaꞌnx otok tzaj kꞌmaꞌn te tuꞌn t-sanjel Dios, ex aju t-ximlal ic oc ic tzaꞌn t-ximlal jun tal cꞌwaꞌl, ex biꞌx banix. 15 Ate Naamán cyucꞌix cycyakil xjal ucꞌin tuꞌn e jeꞌx tuꞌn cypon tucꞌil Eliseo. Tejtzun cypon tucꞌil, xi tmaꞌn Naamán te:

—Jaꞌlo ma tzꞌel nnicꞌe tiꞌj, tuj tcyakil twitz txꞌotxꞌ mintiꞌ juntl Dios at aju axix toc Dios; nok oꞌcx aju Cydios aj Israel. Cyjaꞌtzun in chin cubsane twitza tuꞌn t-xi tcꞌmoꞌna jun oyaj wuꞌne, akine ajbel teya, chi Naamán.

16 Atzunte Eliseo xi ttzakꞌweꞌn:

—Cxel nmaꞌne jun yol axix toc twitz Kman aju in chin ajbene te, mlay tzaj ncꞌmone toyaja.

Masque elaꞌ maj xi tmaꞌn Naamán, pero mintiꞌ cub tuj twitz Eliseo tuꞌn t-xi tcꞌmoꞌn. 17 Xitzun tmaꞌn Naamán te:

—Ka icju, kꞌontzniya ambil weye tuꞌn t-xi wiꞌne cabe chej cytxꞌotxꞌ aj Israel, porque mlay cub npatune ke alumaj ex mlay txi nkꞌoꞌne chojbil te junxitl dios, nok oꞌcx te Kman. 18 Nok oꞌcx in chin cubsane twitz Kman tuꞌn tcub tnajsaꞌn wile oc t-xiꞌ rey aju npatrone tuj tja dios Rimón tbi tuꞌn tcꞌulun twitz, tzul-lo tzyuꞌn nkꞌabe tuꞌn ex oclo chin bel ẍmejeꞌye tucꞌil tuj tja tdios; cuchiwt cub tnajsaꞌn Kman wile tuꞌn tlaj jlu, chi Naamán.

19 Atzunte Eliseo xi ttzakꞌweꞌn te:

—Kꞌoncu beya, miꞌn bisuna.

Cubtzun be tuꞌn Naamán.

20 Tej otok txi lakꞌeꞌ chꞌin, ate Giezi tmajen Eliseo aju t-sanjel Dios cub t-ximan: Nok cucx ma tzꞌaj Naamán aju aj Siria tuꞌn npatrone, ex mintiꞌ ma cyaj tiꞌn aju oyaj sul tiꞌn. Cxel nmaꞌne jun yol axix toc twitz Kman, chin xel kelane tuꞌn tpon cnet wuꞌne, kape jacu tzaj tkꞌoꞌn jun oyaj weye.

21 Xitzun lpeꞌ Giezi tiꞌj Naamán tuꞌn tpon cnet tuꞌn; tejtzun tajtz tqueꞌyin Naamán lepchix t-xiꞌ Giezi tiꞌj, cuꞌtz naj tuj tcarwaj tuꞌn tcꞌmonte, ex xi tkanin te:

—¿Ti ma baj?

22 —Miꞌn, mintiꞌ jun tiꞌxti ma baj, chi Giezi xi ttzakꞌweꞌn, —pero ma chin tzaj samaꞌne tuꞌn npatrone tuꞌn t-xi nmaꞌne teya at cabe cuꞌxun t-sanjel Dios ma ẍe ul jaꞌlo, ex ma ẍe tzaj tuj tiwitz txꞌotxꞌ cye Efraín, cyjaꞌtzun in chin cubsane twitza tuꞌn ttzaj tkꞌoꞌna ox mil sak pwak tucꞌix cabe pak xbalun, chi Giezi.

23 Atzunte Naamán xi ttzakꞌweꞌn:

—Binchama xtalbil, kꞌinxa kak mil sak pwak.

Nimxix o cubsan Naamán twitz Giezi tuꞌn t-xi tcꞌmoꞌn, ex cuꞌx tkꞌoꞌn tuj cabe sac junx tucꞌil cabe pak xbalun, ex xi tkꞌoꞌn cye cabe tmajen tuꞌn t-xi cyiꞌn ex tuꞌn cycub nej twitz Giezi. 24 Tejtzun cypon twiꞌ tal witz, xitzun tcꞌmoꞌn Giezi aju sak pwak tuj cykꞌab ke tmajen Naamán, ocx tcꞌuꞌn tuj tja, ex baj tkꞌolben tib cyucꞌil. 25 Pontzun Giezi tucꞌil Eliseo aju tpatrón, atzunte Eliseo xi tkanin te:

—¿Jatum ma txi aja, Giezi?

—Baka at jatum ma chinx aje, chi Giezi xi ttzakꞌweꞌn.

26 Pero xi tmaꞌntl Eliseo te:

—Ma tzꞌel nnicꞌe tiꞌj, at jun xinak xcuꞌtz tuj tcarwaj tuꞌn tcꞌmonjtza tuꞌn. Baka a tkꞌijlalil jlu tuꞌn ttzaj cꞌmet pwak ex xbalun, ex baka a tkꞌijlalil jlu tuꞌn tlakꞌet tkan awal ex ka tkan uva, ex ka ẍneꞌl ex ka wacẍ, ex ka majen xinak ex ka majen xuꞌj. 27 Cyjaꞌtzun, aju txꞌaꞌc toctok tiꞌj Naamán nej, cjawil jlet tiꞌja, ax icx cyiꞌj ke tiyjila te jumajx, chi Eliseo.

Tejtzun tel tpaꞌn tib Giezi tiꞌj Eliseo, aju t-ximlal otok noj tiꞌj tuꞌn txꞌaꞌc sak queꞌyin ic tzaꞌn ttxa cheꞌw.