—O cyim nchmile, ex baꞌn tuꞌna o niman te Kman. Atzun jaꞌlo ma tzul jun xjal tzaj kꞌonte tchꞌex, ex taj tuꞌn cyxi tiꞌn ke cabe wale tuꞌn cyoc te tmajen, tuꞌntzun tchjet cꞌas.

2 Xitzun tmaꞌn Eliseo te:

—¿Alcye tajbila tuꞌn nbinchanteye teya? Kꞌmantza weye alcye jun tiꞌxti at teya tuj tjaya, chi Eliseo.

Xi ttzakꞌweꞌn xuꞌj:

—Akine ajbel teya, misicyer jun tiꞌxti at tuj njaye, nok oꞌcx jun tal xar chibj aseyt at.

3 Xitzun tmaꞌn Eliseo te:

—Chux txiꞌya ex kaninxa ke tmajena xar cye ke tvesina, chmon baja nimcu xar, cycyakil keju mintiꞌ cyuj. 4 Ex tocxtzuna tuj tjaya cyucꞌix ke tala, lamoꞌn etza tlamel ja ex nojsaꞌn cuꞌxa cycyakil ke xar tuꞌn aseyt, ex part che bel tkꞌoꞌna keju otok che noj.

5 Ajtzun xuꞌj ex ocx tuja cyucꞌix ke tal ex etz tlamoꞌn tja. Octzun ten xuꞌj nojsalte cye xar akeju in che pon cyiꞌn ke tal. 6 Tejtzun cynoj cycyakil ke xar, xi tmaꞌn te jun tal cyjaꞌ:

—Kꞌintza txkantl xar.

Pero xi ttzakꞌweꞌn tal:

—Ya mintiꞌ mastl xar.

Biꞌxtzun weꞌ tuꞌn tbet aseyt. 7 Te tibajxi jlu, xiꞌ xuꞌj tucꞌil t-sanjel Dios kꞌmalte tiꞌj aju otok bant, ex xi tmaꞌn t-sanjel Dios te:

—Txiꞌtzuna jaꞌlo cꞌayilte aseyt ex chjon aja tcꞌasa. Ex aju csobryil cꞌajbel teya ex cye ke tala tuꞌn cyankꞌine.

8 At jun kꞌij icꞌ aj Eliseo tuj tnam Sunem ex attok jun xuꞌj maꞌ toclen najl tuj tnam lu, nimxix o cubsan twitz tuꞌn ticꞌ Eliseo waꞌl tja. Tcyakil maj oc ticꞌ Eliseo tuj tnam lu, atzun in waꞌn. 9 Atzunte xuꞌj xi tmaꞌn te tchmil:

—Bintza, baꞌn wuꞌne aju xinak lu cocꞌx nnicꞌ aj visitarilte ke, jun xjal xjan, t-sanjel Dios te. 10 ¿Myape baꞌn tuj twitza tuꞌn tbant jun tal ja kuꞌn ma twi ja, tuꞌn tajben te te? Ex cꞌoquex kkꞌoꞌn jun watbil tuj, tucꞌix jun mes ex jun siy, tucꞌix jun candil. Octzun ticꞌ betzalte ke, baꞌn tuꞌn tocx ten tuj, chi xuꞌj.

11 At jun kꞌij pon Eliseo ex ax cyaj ten tuj tal ja lu, ma twi ja, ex ax o tan. 12 ex xi tmaꞌn te Giezi aju tmajen:

—Txcontza aju xuꞌj aj Sunem.

Tzajtzun txcoꞌn xuꞌj tuꞌn majen, ex tej tpon xuꞌj twitz, xitzun tmaꞌn Eliseo te tmajen:

13 —Kꞌmanxa te xuꞌj cyjaꞌ: Puro baꞌn ma tbinchaya keye. ¿Alcye tajbila tuꞌn tbant kuꞌne teya? ¿Tajpeya tuꞌn kyoline tiꞌja twitz rey ex ka twitz nejenel cye soldad? Chicuya, txi tmaꞌna te xuꞌj.

—Baꞌn atinwe cyxol ke nxjalile, chi xuꞌj tzaj ttzakꞌweꞌn.

14 ¿Titzun cbantel kuꞌn teju xuꞌj lu? Chi Eliseo.

Xi ttzakꞌweꞌn Giezi:

—Aju xuꞌj lu misicyer jun tal at, ex aju tchmil ya ma tijin.

15 —Txcontza xuꞌj juntl maj, chi Eliseo.

Xiꞌtzun ju majen txcolte xuꞌj, ex aju xuꞌj ax cub weꞌ ttzi ja. 16 Xitzun tmaꞌn Eliseo te:

—Tuj juntl abkꞌi, ax tyemp jlu, tzul itzꞌj jun tala, ex cbel tchleꞌna tuj tkꞌaba.

Atzunte xuꞌj xi ttzakꞌweꞌn:

—Miꞌn tat aya t-sanjel Dios, miꞌn chin cub t-sbuꞌna.

17 Pero o bant ic tzaꞌnx o tma Eliseo, oc ten tal xuꞌj, ex tuj juntl abkꞌi ul itzꞌj jun tal. 18 O chꞌiy tal kꞌa. Pon jun kꞌij, xiꞌ queꞌyilte tman, porque matok taꞌ tman cyucꞌil keju in che chmon twitz awal, 19 ex minaben oc ten cꞌwaꞌl schꞌil tiꞌj tman:

—Ay nwiꞌye, nchyon nwiꞌye wen.

Xitzun tmaꞌn tman te jun majen:

—Kꞌinxa cꞌwaꞌl lu tucꞌil ttxuꞌ.

20 Tzajtzun kꞌiꞌn cꞌwaꞌl tuꞌn majen ex xi kꞌiꞌn tucꞌil ttxuꞌ. Cubtzun tkꞌukbaꞌn txubaj twi tkan, ex tej tpon chilcukꞌij o cyim cꞌwaꞌl. 21 Pero jax kꞌiꞌn cꞌwaꞌl tuꞌn ttxuꞌ ma tuj tal ja in ajben te t-sanjel Dios ex cub tkꞌoꞌn tibaj watbil. Etztzun, ex bix cyaj tlamoꞌn tlamel ja. 22 Tzaj ttxcoꞌn naj tchmil ex xi tmaꞌn te:

—Samantza jun majen tuꞌn t-xiꞌ wucꞌile tucꞌix jun bur, porque ma chinxe tucꞌil t-sanjel Dios, ex jaꞌlo chin ul meltzꞌaje.

23 —¿Tikuꞌn ma txiꞌya lolte t-sanjel Dios jaꞌlo? Baka tnejel kꞌij te xjaw, ex baka kꞌij te ojlabl jlu, chi tchmil xi tkanin.

—Miꞌn bisuna, chi xuꞌj xi ttzakꞌweꞌn.

24 Xitzun tmaꞌn xuꞌj te tmajen tuꞌn tbant tten ju bur tuꞌn, ex xi tmaꞌntl te:

—Koꞌ, nejcuya. Miꞌn ko weꞌ tuꞌna tuj be; maxi ko webil ocxi t-xi nmaꞌne teya.

25 Cyjaꞌtzun tten xiꞌ xuꞌj ex pon twi witz Carmelo jatum taꞌtok t-sanjel Dios. Tejtzun tqueꞌyinte Eliseo xuꞌj lu najchak cyjaꞌ ttzaj, xi tmaꞌn te Giezi aju tmajen:

—Queꞌyinxa, lu ju xuꞌj aj Sunem tzul. 26 Kelinxa canul tiꞌj, ex kaninxa te tzaꞌn taꞌ, ex tzaꞌn taꞌ tchmil ex tal.

Xiꞌtzun ju majen, atzunte xuꞌj tma ka baꞌn ateꞌtok. 27 Tejtzun tpon xuꞌj twi witz jatum taꞌtok Eliseo, e tzaj tchleꞌn ke tkan Eliseo. Xitzun lakꞌeꞌ Giezi tuꞌn tel tpaꞌn ju xuꞌj tiꞌj, pero xi tmaꞌn Eliseo te:

—E tten xuꞌj, porque nim tbis at ex naꞌnx ttzaj tmaꞌn Kman weye ti in baj.

28 Xitzun tmaꞌn ju xuꞌj te Eliseo:

—Tat, ¿baka xi nkanine teya tuꞌn ttzaj jun wale? ¿Baka mintiꞌ xi nmaꞌne teya tuꞌn miꞌn ncub t-sbuꞌna?

29 Atzunte Eliseo xi tmaꞌn te Giezi:

—Bincham ttena, kꞌinxa ncyꞌakoꞌche ex txiꞌya. Ka ma tzꞌoc tcꞌulban tiba tucꞌil jun xjal, miꞌn txi tkꞌolbeꞌna; ex ka at jun ma tzaj kꞌolben teya, miꞌn txi ttzakꞌweꞌna. Octzun tpona, bix cub tkꞌoꞌna ncyꞌakoꞌche tibaj twitz tal cꞌwaꞌl, chi Eliseo.

30 Atzunte ttxuꞌ tal cꞌwaꞌl xi tmaꞌn te Eliseo:

—Cxel nmaꞌne jun yol axix toc twitz Kman ex twitza, mlay chin aj meltzꞌaje ka mya ajuna ma txiꞌ wucꞌile.

Xiꞌtzun Eliseo tucꞌil xuꞌj. 31 Otok txiꞌ nej Giezi cywitz, ex otok cub tkꞌoꞌn cyꞌakoꞌch tibaj twitz tal kꞌa, pero aju tal kꞌa mintiꞌ ul tnabl, cyjaꞌtzun etz Giezi canul tiꞌj Eliseo, ex xi tmaꞌn te:

—Aju tal cꞌwaꞌl mintiꞌ ma tzul tnabl.

32 Tejtzun tocx Eliseo tuja, aju cꞌwaꞌl cyimnitok ex pacꞌl tcub twi watbil. 33 Tocxlenxitzun Eliseo, etz tlamoꞌn ja ex oc ten naꞌl Dios. Tjunalx te cyaj ten tucꞌil tal cꞌwaꞌl tuja. 34 Jaxtzun Eliseo twi watbil ex cub mutzeꞌ tibaj tal cꞌwaꞌl, oc tmojbaꞌn ttziꞌ tucꞌil ttziꞌ tal cꞌwaꞌl, ax icx ke tbakꞌ twitz, ex ke tkꞌab junx cyucꞌil ke tkꞌab tal cꞌwaꞌl, ex cub tmojbaꞌn t-ximlal tucꞌil t-ximlal tal cꞌwaꞌl. Aju t-ximlal tal cꞌwaꞌl o keꞌ tuꞌn toc tmekꞌmajal. 35 Jawtzun weꞌ Eliseo ex o betjeꞌ ticꞌ wen ma tuja; jax juntl maj twi watbil ex oc tmojbaꞌn juntl maj t-ximlal tucꞌil te tal cꞌwaꞌl. Minabentzun tzaj asyamin wuk maj ttxaꞌn tal cꞌwaꞌl, ex e jaw queꞌyin ke tbakꞌ twitz. 36 Tzajtzun txcoꞌn Giezi tuꞌn Eliseo, ex xi tmaꞌn te:

—Txcontza aju xuꞌj aj Sunem.

Tzajtzun txcoꞌn xuꞌj tuꞌn Giezi, ex tej tpon xuꞌj jatum taꞌ Eliseo, xi tmaꞌn Eliseo te:

—Kꞌinxa tala.

37 Xitzun lakꞌeꞌ xuꞌj, ex cub t-xoꞌn tib twitz txꞌotxꞌ t-xe tkan Eliseo; tzajtzun tiꞌn tal ex etz tuja.

38 Te tibajxi jlu, aj meltzꞌaj Eliseo tuj Gilgal. Tuj tkꞌijlalil lu tzaj nimxix weꞌyaj cyxol aj Israel, ex at jun maj lutok ke t-sanjel Dios kꞌukl ke tiꞌjele Eliseo ex xi tmaꞌn Eliseo te tmajen: Kꞌoꞌn jaxa ju cꞌil matij tibaj kꞌakꞌ, ex binchama chꞌin chibj tucꞌil tcꞌocꞌjal tuꞌn tajben cye ke t-sanjel Dios.

39 At jun cye xiꞌ tuj cojbil jyolte chꞌin itzaj, ex oc noj tiꞌj jun wiꞌ akꞌ tjakꞌ cꞌul, tzaj tiꞌn junjun twitz, mer ic tzaꞌn cꞌum, ex tuꞌn jlu noj t-ẍjoꞌw. Tejtzun tul meltzꞌaj oc ten paẍulte cye ex cuꞌx tkꞌoꞌn tuj chibj, mintiꞌtok baꞌn tuꞌn ti jil ke jlu. 40 Te tibajxi xi kꞌoꞌn te cychiꞌ ke t-sanjel Dios, ex tejtzun t-xi cynicꞌbeꞌn aju chibj, e jaw schꞌin:

—Aya t-sanjel Dios, aju chibj lu at venen tuj.

Ex ya mintiꞌtl xi cychyoꞌn. 41 Xitzun tmaꞌn Eliseo:

—Cyiꞌntza chꞌin arin.

Tejtzun tcuꞌx tkꞌoꞌn arin tuj cꞌil, xi tmaꞌn cye:

—Chuxtzun cykꞌonxe cychiꞌ ke xjal jaꞌlo.

Ex xitzun cychyoꞌn ke xjal, ex ya mintiꞌtl jun mya baꞌn at tuj cꞌil tcubil chibj.

42 Te tibajxi, pon jun xinak tzajni tuj lugar Baal-salisa, xi tkꞌoꞌn te Eliseo winkin pan sebad matok tetzlen tuj jorni, tucꞌix triw acꞌaj tcuꞌx tuj tpa. Xitzun tmaꞌn Eliseo te tmajen:

—Kꞌonxa jlu cye ke xjal tuꞌntzun cywaꞌn tiꞌj.

43 Pero xi ttzakꞌweꞌn majen:

—¿Tzaꞌn tten tuꞌn t-xi nkꞌoꞌne jlu te cye jun syent xjal?

Xi ttzakꞌweꞌn Eliseo:

—Kꞌonxa cye xjal tuꞌntzun cywaꞌn, porque ma tma Kman tuꞌn cywaꞌn ex csobryil.

44 Cyjaꞌtzun xi tkꞌoꞌn majen cywa, ex e waꞌntzun ke xjal, ex atx wabj sobryin ic tzaꞌnx otok tma Kman.