4 Ate Mesa aju rey cye aj Moab oꞌcx takꞌun te almil ẍneꞌl, ex at tuꞌn t-xi tkꞌoꞌn chojenj te rey cye aj Israel; jun syent mil tal tman ẍneꞌl ex jun syent mil tman ẍneꞌl nneꞌl lan cyiꞌj. 5 Pero tej tcyim Acab, jawtzun tiꞌn tib rey cye aj Moab tiꞌj rey cye aj Israel. 6 Etztzun rey Joram tuj Samaria ex e baj tchmoꞌn cycyakil ke soldad aj Israel. 7 Ex xi t-samaꞌn Joram tkanil te rey te Judá cyjaꞌ: Aju rey cye aj Moab ma jaw tiꞌn tib wiꞌje, ¿Mlaype txiꞌya wucꞌile kꞌojlel tiꞌj?

Tzaj ttzakꞌweꞌn Josafat aju rey te Judá cyjaꞌ: Jacu chinxe tucꞌila, cyucꞌix ke nsoldadiye ex cyucꞌix keju cyjax cyibaj ncheje, lu koꞌye te tucꞌila ex te cyucꞌil ke t-xjalila. 8 Pero, ¿alcye be cxel kiꞌn? Chi Josafat. Xi ttzakꞌweꞌn Joram cyjaꞌ: Tuj be in xiꞌ tuj lugar tzkij txꞌotxꞌ te Edom.

9 Cyjaꞌtzun, cub be tuꞌn rey cye aj Israel tucꞌix ju rey cye aj Judá ex tucꞌix ju rey cye aj Edom. Pero tuꞌnju e bet wuk kꞌij, baj ju aꞌ kꞌiꞌn cyuꞌn tuꞌn tajben cye soldad ex cye alumaj. 10 Tmatzun Joram aju rey cye aj Israel cyjaꞌ:

—Mer ic tzaꞌn ma ko tzaj tiꞌn Kman, akoꞌ rey ox kbaj, tuꞌn kxi tkꞌoꞌn tuj cykꞌab aj Moab.

11 Xitzun tkanin Josafat:

—¿Mintiꞌpe jun t-sanjel Dios at tzalu, tuꞌn t-xi tkanin te Kman alcye tuꞌn tbant kuꞌn? Chi Josafat.

At jun cye keju at cyoclen ttxlaj rey cye aj Israel tma:

—Atzun taꞌ Eliseo tzalu aju tcyꞌajal Safat, aju ajben te Elías, chi xjal.

12 —Jaculo tzaj tmaꞌn ke jun yol tzajni tucꞌil Kman, chi Josafat xi ttzakꞌweꞌn.

Jurattzun xiꞌ rey cye aj Israel, tucꞌix Josafat ex tucꞌix ju rey cye aj Edom, tucꞌil Eliseo; 13 Atzunte Eliseo xi tmaꞌn te rey cye aj Israel:

—¿Ti woclene tiꞌja? Txiꞌya kanil onbil cye t-sanjel cydios ktzan tmana ex ttxuꞌya.

Atzunte rey cye aj Israel xi tmaꞌntl:

—Mlay, porque ate Kman ma tzaj kꞌinte keye, akoꞌye rey ox kbaje, tuꞌn kcub tzꞌake tuj cykꞌab aj Moab.

14 Xitzun tmaꞌn Eliseo:

—Cxel nmaꞌne jun yol axix toc twitz Kman aju Tajaw Tcyakil, aju in chin ajbene te, nokwit mintiꞌ in chin nimane te Josafat aju rey te Judá, mlaywitlo txi nbiꞌne tyola ex mintiꞌwtlo ma txi nqueꞌyine twitza. 15 Pero baꞌn tuꞌn ttzaj cyiꞌne jun xjal baꞌn chimban tiꞌj arpa, chi Eliseo.

Ex tej toc ten xjal chimbal, ultzun T-xew Kman tucꞌil Eliseo, 16 ex xitzun tmaꞌn Eliseo:

—Chi Kman ma tma: Cylacuncuxe nimcu jul te chembil aꞌ tuj chkꞌajlaj lu, 17 masque mintiꞌ cykꞌikꞌ ex mintiꞌ jbal oc cyilaꞌye, pero aju chkꞌajlaj lu cnojel tuꞌn aꞌ, ex cycyakiltzune che cꞌale aꞌ, ax icx ke cywacẍe ex cycheje. 18 Ex a jlu nok chꞌin t-xilen tuj twitz Kman, porque ax icx che tzajel tkꞌoꞌn ke aj Moab tuj cykꞌabe, 19 ex cbajel cyxitune cycyakil tnam toc muro cyiꞌj ex ke tnam maꞌ cyoclen, ex cjawil cytxꞌemine tcyakil tzeꞌ baꞌn tloꞌnjtz twitz, cmaksetel tcyakil twi aꞌ cyuꞌne, ex tcyakil txꞌotxꞌ jatum in cub awal che nojel tuꞌn abj cyuꞌne, chi Eliseo.

20 Ex o japun tcyakil jlu. Tuj juntl kꞌij te prim, tuj or oc in xi kꞌot oyaj, cyjaꞌ ttzaj aꞌ tumlal Edom, ex o noj twitz txꞌotxꞌ tuꞌn. 21 Tejtzun cybinte aj Moab ka cyjaꞌtok cyxiꞌ ke rey tuꞌn cyoc tzokpaj cyiꞌj, baj cychmon cyib cycyakil, tzaꞌnx ke cuꞌxun otok pon cyipun tuꞌn cyxiꞌ tuj kꞌoj, ax icx ke tij xjal, ex atzun e cub ten jatum ponin tmojonil cytxꞌotxꞌ. 22 Tuj juntl kꞌij te prim, tej cyjaw weꞌ, in koptzꞌaj tkan kꞌij tibaj aꞌ, ex tej t-xi cyqueꞌyin aj Moab, puro chicꞌ ela tuj cywitz. 23 Cymatzun: Chicꞌ te jlu. Aju ma baj, ax ke rey ma che kꞌojin cyxolx, ex ma baj cybyon cyib jun tucꞌil juntl. Akeye aj Moab, koꞌ kꞌilte ke tiꞌxti ma che cyaj cykꞌoꞌn, che chi.

24 Pero tej cypon aj Moab ttxlaj cycampament ke soldad aj Israel, e oc tzokpaj ke aj Israel cyiꞌj ex e jeꞌl ok. E jeꞌxtzun lpeꞌ aj Israel cyiꞌj ex e cub cybyoꞌn. 25 Ex cub cyxitun ke tnam, baj cynojsaꞌn ke txꞌotxꞌ tuꞌn abj jatum in cub awal, baj cynojsaꞌn cycyakil twi aꞌ, ex jaw cytxꞌemin tcyakil tzeꞌ baꞌn tloꞌnjtz cywitz. Oꞌcx tnam Kir-hareset cyaj ten. Pero ke xinak kꞌiꞌn xobl plech cyuꞌn, baj cytxolban cyib tiꞌjele ex e oc tzokpaj tiꞌj.

26 Tejtzun tel tnicꞌ rey cye aj Moab tiꞌj ka chꞌixtok tcub tiꞌj, tzajtzun tiꞌn wuk syent soldad kꞌiꞌmlex spad cyuꞌn, tuꞌntzun cyex cyxol ke soldad aj kꞌoj, tuꞌn cypon jatum taꞌ ju rey te Edom, pero mintiꞌ o bant icju. 27 Tzajtzun tiꞌn aju nej tcyꞌajal, aju attok toquel te rey te t-xel, ex xi tkꞌoꞌn te jun chojbil patun in cub max tibaj muro. Tzaj nimxix kꞌoj cyiꞌj aj Israel, jawtzun cyiꞌn ke ja xbalun jatum cycubsaꞌn tuj, ex e aj tuj cytanmi.