Tej t-xiꞌ Elías tuj cyaꞌj
2
Tej chꞌixtok tpon tyemp tuꞌn t-xi kꞌiꞌn Elías tuj cyaꞌj tuꞌn Kman tuj jun xcyakinpaẍ, cub be tuꞌn Elías tucꞌix Eliseo, ex e etz tuj Gilgal. 2 Xitzun tmaꞌn Elías te Eliseo:—Tencja tzalu, porque ma tma Kman weye tuꞌn nxiꞌye tuj tnam Betel.
Atzunte Eliseo xi ttzakꞌweꞌn:
—Cxel nmaꞌne jun yol axix toc twitz Kman ex twitza, mlay cyaj ncolina tjunalxa.
E jeꞌliltzun cycabil max tuj Betel. 3 Atzun ke t-sanjel Dios najlke tuj Betel e etz canul tiꞌj Eliseo, ex xi cymaꞌn te:
—¿Biꞌnpe tuꞌna ka cꞌelel kꞌiꞌn aju xnakꞌtzal teya tuꞌn Kman jaꞌlo?
—Biꞌmaj jlu wuꞌne, pero miꞌn che kꞌajte, chi Eliseo xi ttzakꞌweꞌn.
4 Te tibajxi xi tmaꞌntl Elías te Eliseo:
—Tencja tzalu, porque ma tma Kman weye tuꞌn nxiꞌye tuj tnam Jericó.
Atzunte Eliseo xi ttzakꞌweꞌn:
—Cxel nmaꞌne jun yol axix toc twitz Kman ex twitza, mlay cyaj ncolina tjunalxa.
E jeꞌliltzun cycabil max tuj tnam Jericó. 5 Atzun ke t-sanjel Dios najlke tuj tnam Jericó e etz canul tiꞌj Eliseo, ex xi cymaꞌn te:
—¿Biꞌnpe tuꞌna ka cꞌelel kꞌiꞌn aju xnakꞌtzal teya tuꞌn Kman jaꞌlo?
—Tencja tzalu, porque ma tma Kman weye tuꞌn nxiꞌye ttzi nima Jordán.
Pero xi ttzakꞌweꞌn Eliseo:
—Cxel nmaꞌne jun yol axix toc twitz Kman ex twitza, mlay cyaj ncolina tjunalxa.
E jeꞌxtzun bettl cycabil. 7 Cyucꞌix 50 t-sanjel Dios e jeꞌx lpeꞌ cyiꞌj ex najchakyin e tzaj weꞌ: Atzunte Elías tucꞌix Eliseo e cub weꞌ ttzi nima Jordán. 8 Eltzun tiꞌn Elías aju t-ẍjoꞌw ex baj tbalkꞌiꞌn, ex cub tjubin tibaj nima ex aju nima biꞌx weꞌ; e icꞌxtzun cycabil jlajxi nima puro tuj tzkij. 9 Tejtzun cyicꞌpun jlajxi nima, xi tmaꞌn Elías te Eliseo:
—Kanintza weye alcye tajbila tuꞌn nbinchanteye teya naꞌnxtok wel kꞌiꞌne ttxlaja.
Atzunte Eliseo xi ttzakꞌweꞌn:
—Waje tuꞌn ttzaj tkꞌoꞌna tlamal toclena weye ic tzaꞌn jun wetzbile, mer ic tzaꞌn nej tcꞌwaꞌla kine.
10 Baka nok chꞌin t-xilen aju ma tzaj tkanina, pero ka ma tila oc wel kꞌiꞌne tiꞌja, ctzajeltzun kꞌoꞌn teya. Katzun mi ẍin tila oc wel kꞌiꞌne tiꞌja, mlayx tzaj kꞌoꞌn teya, chi Elías.
11 Tej in che bettok ex in che yolintok, nok minaben jaw jlet jun carwaj in cꞌant kꞌakꞌ tiꞌj ex jawoꞌn cyuꞌn chej in cꞌant kꞌakꞌ cyiꞌj, atzun ke jlu el paꞌnte cye, xitzun kꞌiꞌn Elías tuj cyaꞌj tuj jun nintz xcyakinpaẍ. 12 Tejtzun tqueꞌyinte Eliseo jlu, jaw schꞌin ex tma: Nman, nman, ic ma tena cye aj Israel ic tzaꞌn jun cꞌloj soldad at nim cyipun te colol cyiꞌj, chi Eliseo.
Te tibajxi jlu, ya mintiꞌtl oc tqueꞌyin Eliseo twitz Elías. Eltzun t-sbitꞌun Eliseo t-ẍjoꞌw toc tiꞌj tuꞌn tbis, ex te cabe piẍ el tuꞌn.
Cyaj ten Eliseo te t-xel Elías
13 Jawtzun tiꞌn Eliseo aju t-ẍjoꞌw Elías porque ax otok cyaj tzꞌak; ajtzun meltzꞌaj tuꞌn tpon ttzi nima Jordán ex axtzun cub weꞌ. 14 Tzajtzun tiꞌn ju ẍjoꞌw aju kꞌiꞌntok tuꞌn Elías nej, cub tjubin tibaj nima ex tma: ¿Jatum taꞌ Kman aju Tdios Elías?
Tej tcub tjubin ju ẍjoꞌw tibaj nima, ate nima biꞌx weꞌ, ex icꞌtz juntl maj Eliseo tuj tzkij. 15 Ke t-sanjel Dios otok che tzaj tuj Jericó in che queꞌyintok tiꞌj, ex cyma cyxolx: Jaꞌlo aju toclen Elías ma tzaj kꞌoꞌn te Eliseo.
E jeꞌxtzun canul tiꞌj Eliseo ex e cub mutzkꞌaj ex pon tacl tibaj cywitz twitz txꞌotxꞌ, 16 ex xi cymaꞌn te:
—Bintza, akoꞌye ajbel teya at 50 xjal kxole at nim cyipun ex cyuw cycꞌuꞌj; kꞌontza ambil cye tuꞌn cyxiꞌ jyolte aju xnakꞌtzal teya; mya yajcu ma cyaj kꞌoꞌn twiꞌ jun witz ex ka tuj jun chkꞌajlaj ttzi nima tej xjaw kꞌiꞌn tuꞌn T-xew Kman.
Atzunte Eliseo xi tmaꞌn:
—Miꞌn, mi jun txi cylajoꞌne.
17 Pero mintiꞌ xi cyniman, cucx e oc ten wulil; cyjaꞌtzun xi tkꞌoꞌn Eliseo ambil cye tuꞌn t-xi cysamaꞌn keju 50 xinak; ex e jyon tiꞌj Elías tuj enter ox kꞌij, pero mintiꞌ o cnet cyuꞌn. 18 Tej cyul meltzꞌaj tuj Jericó jatum otok cyaj ten Eliseo, xi tmaꞌn Eliseo cye:
—Baka mintiꞌ o txi nmaꞌne cyeye tuꞌn miꞌn cyxiꞌye.
Tej tbaj kꞌanit twi aꞌ tuj Jericó tuꞌn Eliseo
19 Xitzun cymaꞌn ke xjal te Eliseo, akeju najl tuj tnam:
—Bintza, aju tnam lu puro mejor tten ju lugar jatum tcub ic tzaꞌn in tqueꞌyina, pero aju aꞌ mya baꞌn, ex aju txꞌotxꞌ mintiꞌ in tzaj awal tuꞌn oc toc aꞌ tuj.
20 —Cyiꞌntze jun matij lak acꞌaj wucꞌile, tucꞌix atzꞌan tuj, chi Eliseo xi ttzakꞌweꞌn.
Tejtzun tpon cyiꞌn ju lak ma tij, 21 xiꞌ Eliseo jatum taꞌ twi aꞌ, cuꞌx tkoꞌn ju atzꞌan jatum in jatz jlet aꞌ, ex tma:
—Chitzun Kman in tmaꞌn: Akine ma chin kꞌanante aꞌ lu, ex mlay che cyimtl keju che cꞌal tiꞌj, ex mlay tbinchatl tuꞌn miꞌn ttzaj tawal txꞌotxꞌ tuꞌn.
22 Atxixtzun tkꞌanit aꞌ lu, ex oc te baꞌn tcꞌanjtz ic tzaꞌn o tma Eliseo, ex ttenx jaꞌlo.
23 Cubtzun be tuꞌn Eliseo tuj lugar lu tuꞌn t-xiꞌ tuj Betél, ex tej in bettok tjax e jeꞌtz txkan tal cuꞌxun tuj tnam e oc ten xmayil tiꞌj ex cyma: Tjaxa tzꞌaꞌj tiꞌj twiꞌ, tjaxa tzꞌaꞌj tiꞌj twiꞌ.