—Kꞌontza ju txꞌotxꞌ te weye, aju awaꞌn tkan uva tuj tuꞌna, tuꞌn toc wawaꞌne itzaj tuj, tuꞌnju ax tcub ttxlaj njaye; ex jacu txi nkꞌoꞌne juntl piẍ txꞌotxꞌ te t-xel at tkan uva mas tbanil tuj; ex ka mas baꞌn tuj twitza jacu txi nchjoꞌne tuꞌn pwak.

3 Atzunte Nabot xi ttzakꞌweꞌn te Acab:

—Mlay tzaj tkꞌoꞌn Dios ambil weye tuꞌn t-xi nkꞌoꞌne teya aju wetzbile cyaj cykꞌoꞌn ktzan nmane. 4 Xiꞌtzun Acab tja in bisun ex in kꞌojin tuꞌn tlaj aju ttzakꞌwebl Nabot, tuꞌn miꞌn t-xi tkꞌoꞌn aju tetzbil cyajni kꞌoꞌn tuꞌn ktzan tman. Pontzun ma tja ex cub coẍeꞌ twi twatbil, cyjaꞌ aj tkꞌoꞌn twitz twitz ja ex mintiꞌ tajbe tuꞌn twaꞌn. 5 Pontzun lakꞌeꞌ Jezabel aju t-xuꞌjil ttxlaj, ex xi tmaꞌn te:

—¿Tikuꞌn in bisuna ex tcꞌiꞌya waꞌn?

6 Atzunte Acab xi ttzakꞌweꞌn:

—Ma chin yoline tucꞌil Nabot aju aj Jezreel, ex ma txi nkanine aju ttxꞌotxꞌ at tkan uva tuj, tuꞌn ttzaj tcꞌayin weye ex ka mas baꞌn tuj twitz tuꞌn t-xi nkꞌoꞌne jun piẍ txꞌotxꞌ awaꞌn tkan uva tuj te t-xel tkan t-uva. Atzunte Nabot tcꞌiꞌ tzaj tkꞌoꞌn weye.

7 Atzunte Jezabel aju t-xuꞌjil, xi ttzakꞌweꞌn:

—¿Myapetzun aya cawil cyibaj aj Israel? Weꞌctza, chux waꞌna, ex miꞌn bisuna. Jacu txi nkꞌoꞌne ttxꞌotxꞌ Nabot teya, aju at tkan uva tuj, aju tcub tuj Jezreel.

8 Cubtzun ttzꞌiban Jezabel txkan uꞌj ex oc ttzꞌiban tbi Acab cyiꞌj ex oc tkꞌoꞌn t-sey rey cyiꞌj; e jeꞌxtzun t-samaꞌn ke uꞌj lu cye ke tij xjal ex cye ke nejenel ax najlke tuj ttanmi Nabot. 9 Ex chi ju yol in tmaꞌn cyuj ke uꞌj: Cymanxe cye xjal tuꞌn toc cychmon cyib ex tuꞌn tcub cyyoꞌn weꞌyaj tuj jun kꞌij, ex cykꞌon cube Nabot cywitz tnam xjal. 10 Cykꞌon cube twitz Nabot cabe xjal jumajx mya baꞌn ke, tuꞌntzun cymante ka ax toc otok yolin Nabot mya baꞌn tiꞌj Dios ex tiꞌj rey. Te tibajxi, cyiꞌn exe tiꞌjxi tnam ex cybyoncuye tuꞌn abj.

11 O cybincha ke tij xjal ex ke nejenel ateꞌ tuj ttanmi Nabot ic tzaꞌnx tyol Jezabel in tmaꞌn cyuj ke tuꞌj pon t-samaꞌn cye: 12 Xi cymaꞌn cye xjal tuꞌn toc cychmon cyib, ex tuꞌn tcub cyyoꞌn weꞌyaj tuj jun kꞌij, ex cub cykꞌoꞌn Nabot cywitz tnam xjal. 13 E pontzun keju cabe xjal jumajx mya baꞌn ke tuꞌn cynicꞌan yol tiꞌj Nabot cywitz xjal, ex cyma ka otok yolin Nabot mya baꞌn tiꞌj Dios ex tiꞌj rey. Extzun kꞌiꞌn Nabot ttxaꞌn tnam cyuꞌn, oc cyxoꞌn tuꞌn abj ex cyim. 14 Xitzun cysamaꞌn tkanil te Jezabel ka otok baj xoꞌn Nabot tuꞌn abj, ex ya otok cyim.

15 Tejtzun tbinte Jezabel jlu, xi tmaꞌn te Acab:

—Bet-xtzuna jaꞌlo ex toca te tajwil tkan t-uva Nabot aju aj Jezreel, aju mintiꞌ o tcuya tuꞌn ttzaj tcꞌayin teya. Ate Nabot mya itzꞌx, ya ma cyim. 16 Tejtzun tbinte Acab ka otok cyim Nabot, xiꞌtzun ex oc te tajwil ttxꞌotxꞌ ktzan Nabot, aju at tkan uva tuj.

17 Tzajtzun yolin Kman te Elías aju aj Tisbe, ex tma: 18 Kꞌoncuya be ex txiꞌya tucꞌil Acab aju rey cye aj Israel, aju najl tuj tnam Samaria. Lu Acab taꞌ jaꞌlo tuj ttxꞌotxꞌ ktzan Nabot, aju at tkan uva tuj, porque ma tzꞌel tetzan. 19 Kꞌmanxa te: Chitzun Kman ma tma: Tuꞌnju ma cub tbyoꞌna Nabot ex ma tzꞌel tiꞌna ju tetzbil, cyjaꞌtzun tujx ju lugar jatum ma txi cylekꞌan txꞌyan tchcꞌel Nabot, axtzun lugar che lekꞌal ke txꞌyan tiꞌj teya tchcꞌel, chicuya te.

20 Atzunte Acab xi tmaꞌn te Elías:

—¿Mapetzun chin cnete tuꞌna, aya aj kꞌoj wiꞌje?

—Ax toc ma cneta wuꞌne porque ma txi tkꞌon tiba tuꞌn tbinchanteya mya baꞌn twitz Kman. 21 Tuꞌntzun jlu ma tma Kman cyjaꞌ: Tzul nsamaꞌne mya baꞌn tibaja, che bajel naj cycyakil tiyjila wuꞌne, ex che najel cycyakil ke tiyjila xinak cyxol aj Israel, tzaꞌnx ke xjal majen ex ke mya majen. 22 Ex keju ateꞌ tuj tjaya ic che telba wuꞌne ic tzaꞌn e tenba keju ateꞌtok tuj tja Jeroboam aju tcyꞌajal Nabat, ex ic che telba ic tzaꞌn e tenba keju ateꞌtok tuj tja Baasa aju tcyꞌajal Ahías, tuꞌn tlaj ma chin octz ticꞌleꞌna tuꞌn ttzaj nkꞌoje; porque tuꞌna ma che binchan ke aj Israel il, chi Kman in tmaꞌn teya. 23 Ax icx ma tma Kman alcye cbajel tiꞌj Jezabel: Che chyoꞌl ke txꞌyan tiꞌj t-ximlal Jezabel ttxlaj muro te tnam Jezreel. 24 Ex atzun ke mastl tiyjila, akeju che cymel tuj tnam, txꞌyan cxel chyoꞌnte cyximlal, ex atzun keju che cymel tuj cojbil, cꞌutz cxel chyoꞌnte cyximlal, chi Elías te Acab.

25 (Mi aꞌl juntl xjal o pon tbinchben mya baꞌn ic tzaꞌn te Acab, porque xi tkꞌon tib tuꞌn tbinchante mya baꞌn twitz Kman, porque a Jezabel aju t-xuꞌjil oc tenxix kꞌmalte te tuꞌn tbinchante mya baꞌn. 26 Icꞌbilxix aju tbincha twitz Kman, porque oc ten cꞌulul cywitz ke tilbilal ic tzaꞌn in cybinchaꞌn aj Amorrey, akeju otok che icꞌ tlajoꞌn Kman cywitz aj Israel.)

27 Tejtzun tbaj tbiꞌn Acab tcyakil yol lu, el t-sbitꞌun t-xbalun tiꞌj, oc tkꞌoꞌn t-xbalun chꞌiꞌx twitz ex cub tyoꞌn weꞌyaj. Tucꞌix t-xbalun chꞌiꞌx twitz toc tiꞌj oc tcub tan, ex oc tbet in bisun twitz. 28 Tzajtzun yolin Kman tucꞌil Elías aju aj Tisbe, ex chi cyjaꞌ:

29 —¿Mape tila Acab ma cub tmansin tib nwitze? Tuꞌnju ma cub tmansin tib nwitze, jaꞌlo mlay tzaj nkꞌoꞌne castiw cyibaj keju ateꞌ tuj tja acux itzꞌx Acab, maxi tzul nsamaꞌne castiw tuj tkꞌijlalil oc tcawin tcyꞌajal.