4 Atzunte rey cye aj Israel ajtz t-samaꞌn ju tzakꞌwebl cyjaꞌ: Ic tzaꞌnx ma tmaya tat rey, akine tucꞌix tcyakilju at weye cꞌoquel te teya.

5 E jeꞌx juntl maj ke sanjel tucꞌil Acab ex xi cymaꞌn te: Chi Ben-adad in tmaꞌn: O txi nmaꞌne teya tuꞌn ttzaj tkꞌoꞌna weye aju sak pwak ex kꞌan pwak at tucꞌila, cyucꞌix ke t-xuꞌjila ex ke tcyꞌajala. 6 Mya oꞌcx jlu, ax icx ax or nchiꞌj che xel nsamaꞌne ke xjal at cyoclen ntxlaje, tuꞌn tbaj cyjyoꞌn tuj tjaya ex tuj cyja ke xjal at cyoclen ttxlaja, ex tcyakil aju wiꞌyilxix at teya, ctzajel cyiꞌn, chi Ben-adad, che chi sanjel.

7 Atzunte rey cye aj Israel e tzaj ttxcoꞌn cycyakil cytijil aj Israel ex xi tmaꞌn cye:

—Cybintze, aju xjal lu in jyon tumel tuꞌn tbinchante mya baꞌn kiꞌj, atzun weye mintiꞌ ma cub nxcꞌayine tuꞌn cyxi nkꞌoꞌne ke nxuꞌjile te, cyucꞌix ke ncyꞌajale ex tucꞌix sak pwak ex kꞌan pwak at wucꞌile, chi Acab.

8 —Miꞌn txi tnimana ex miꞌn tbinchaya aju ctzajel tkanin teya, che chi ke tij xjal, xi cytzakꞌweꞌn. Ex ax cyyol cycyakil xjal.

9 Xitzun tmaꞌn Acab cye ke xjal otok che tzaj t-samaꞌn Ben-adad:

—Cykꞌmanxe te tat rey cyjaꞌ: Jacu bant wuꞌne tcyakil aju tzaj tkanin nej, atzunju in tzaj tkanin jaꞌlo, mlay nbinchaye, che chicuye te.

Atzun cye sanjel xi cyiꞌn ju tzakꞌwebl lu tucꞌil Ben-adad. 10 Tzaj tmaꞌntl Ben-adad te Acab cyjaꞌ: Awt ke ndiose che cub kꞌonte ncastiwoye cyuwxix wen ka miꞌn ma tzaꞌjix tnam Samaria wuꞌne, ex mlaylo canun jun yub ttzaꞌjil te junjun soldad akeju lepchoꞌc wiꞌje.

11 Atzunte rey cye aj Israel aj ttzakꞌweꞌntl cyjaꞌ: Miꞌn jaw tniman tiba ka ma cambana tuj kꞌoj ex naꞌnx tcambana.

12 Tejtzun tbinte Ben-adad aju tzakꞌwebl lu, in cꞌantok kꞌeꞌn cyucꞌil txkantl rey cyuj ke ja xbalun otok jaw cybinchaꞌn. Xitzun tmaꞌn cye ke xjal at cyoclen ttxlaj: Cybincham cytene. Cycyakiltzun bant cyten tuꞌn cyoc tzokpaj tiꞌj tnam.

13 Pontzun jun t-sanjel Dios tucꞌil Acab aju rey cye aj Israel, ex xi tmaꞌn te:

—Chi Kman ma tma: Masque in tila nimxix cyajlal aj kꞌoj tiꞌja, pero akine chin xel kꞌonte cye tuj tkꞌaba jaꞌlo, tuꞌntzun tel tnicꞌa tiꞌj ka akine Dios aju Cymane.

14 —¿Al uꞌn cbel cyiꞌj ke jlu? Chi Acab xi tkanin.

Xi ttzakꞌweꞌn t-sanjel Dios:

—Cyuꞌn ke cuꞌxun, akeju in che onin cye ke gobernador cye junjun partament, chi Kman ma tma.

—¿Alcye cꞌoquel tzokpaj tnejel? Chi Acab xi tkanintl.

—Aya, chi t-sanjel Dios, xi ttzakꞌweꞌn.

15 Atzunte Acab icꞌ twitz cyiꞌj ke cuꞌxun in che onin cyiꞌj ke gobernador cye junjun partament, attok cab syent tucꞌ 32 cybaj, ax icx e oc tchmoꞌn cycyakil ke soldad aj Israel, japun wuk mil cybaj. 16 E etztzun ke soldad lu te chilcukꞌij, atzunte Ben-adad cyucꞌix 32 rey akeju otok mojeꞌ cyyol tucꞌil, cucxtok cycꞌan kꞌeꞌn cyuj ke xbalun ja. 17 Tnejel e etz ke onil cye ke gobernador. Tejtzun tbinte Ben-adad aju tkanil ka attok junjun xinak otok che etz tuj tnam Samaria, 18 xi tmaꞌn cyjaꞌ: Ka ma che etz tucꞌil jun tkanil tuꞌn tweꞌ kꞌoj ex ka tuꞌn toc kꞌoj, pero wajbile tuꞌn tul cyiꞌne tzalu, itzꞌx ke.

19 Akeju onil cye ke gobernador e etz tuj tnam Samaria, ex lepchoꞌc ke soldad cyiꞌj. 20 Ex teyle junjun cye cub tbyoꞌn jun aj kꞌoj aju oc tzokpaj cyiꞌj, atzun cye aj Siria e jeꞌl ok; e jeꞌxtzun lpeꞌ ke aj Israel cyiꞌj, atzunte Ben-adad aju rey cye aj Siria o clet tej tel ok tjax tibaj tchej, ex cyucꞌix junjuntl t-soldad cyjaxsaꞌn cyibaj cychej. 21 Etztzun rey Acab, ul cyucꞌil ke soldad aj Israel. E octzun tzokpaj cyiꞌj ke soldad aj Siria cyjax cyibaj chej, ex cyiꞌj keju cyjax cyuj carwaj in che ajben tuj kꞌoj. Cub cyiꞌj cyuꞌn ex nimcu aj Siria e cyim tuj kꞌoj lu. 22 Te tibajxi pon juntl maj t-sanjel Dios tucꞌil rey cye aj Israel ex xi tmaꞌn te:

—Binchama cyten ke t-soldadiya, ex chebaxix ximana tiꞌj alcye cbantel tuꞌna, porque tuj juntl abkꞌi tzul meltzꞌaj juntl maj aju rey cye aj Siria tuꞌn toc tzokpaj tiꞌja.

23 Ke xjal at cyoclen ttxlaj rey cye aj Siria xi cymaꞌn te cyjaꞌ:

—Ke cydios aj Israel atzun ateꞌ cywiꞌ ke witz; cyjaꞌtzun ma ko cub cyuꞌn. Pero ka ma ko kꞌojin cyucꞌil tuj chkꞌajlaj, segur ko cambal cyiꞌj. 24 Aju tuꞌn tbant tuꞌna jaꞌlo Tat Rey, kꞌiꞌn ela cyoclen ke rey ex kꞌoꞌn oca ke xjal at cyoclen ttxlaja te cyxel, 25 ex tuꞌn cybaj tchmoꞌna txkantl soldad ic tzaꞌnx keju o che cub, ax icx ke chej ex ke carwaj ic tzaꞌnx keju ateꞌ nej. Entons ko kꞌojl cyucꞌil tuj chkꞌajlaj ex ko cambal cyiꞌj.

Atzunte Ben-adad xi tbiꞌn ju consej lu ex o tbincha icju. 26 Tbajlenxi jun abkꞌi icꞌ twitz Ben-adad cyiꞌj ke t-soldad, ex cub be cyuꞌn tuꞌn cypon tuj tnam Afec tbi, tuꞌn cykꞌojin cyiꞌj aj Israel. 27 Ax icx cye aj Israel icꞌ cywitz cyiꞌj ke cysoldad ex xi cykꞌoꞌn tcyakil aju at tajben cye, ex e jeꞌxtzun tuꞌn cycꞌulbante cyib cyucꞌil aj kꞌoj. E cubtzun ten ke cywitz aj Siria, mer ic tzaꞌn cabe byuj chip ke, ex atzun cye aj Siria nojni tuj tcyakil lugar lu cyuꞌn.

28 Ex pontzun t-sanjel Dios tucꞌil rey cye aj Israel ex xi tmaꞌn te:

—Chi Kman ma tma cyjaꞌ: Masque ma cyma aj Siria ka akine jun Dios oꞌcx taꞌ twi witz, ex myatzun taꞌ tuj chkꞌajlaj, che xel nkꞌoꞌne cycyakil ke jlu tuj tkꞌaba, tuꞌntzun tel cynicꞌe tiꞌj, axix toc akine Dios aju Cymane.

29 Wuk kꞌij e cub ten aj Siria tuj jun pacꞌ ex ke aj Israel tuj juntl pacꞌ, ex tujx twukin kꞌij tzyet kꞌoj cyuꞌn. Tuj kꞌij lu cub cybyoꞌn aj Israel jun syent mil soldad aj Siria, akeju in che bet tuꞌn cykan. 30 Atzun ke txkantl soldad e jeꞌl ok tuꞌn cypon tuj tnam Afec, pero aju muro toc tiꞌj ju tnam tzaj tzꞌak cyibaj 27 mil soldad, akeju otok che tzokpaj nej. Ax icx te Ben-adad pon tuj tnam lu ex o yutꞌutꞌun ticꞌ cyuj ke ja tuꞌn tclet.

31 Ke xjal in che ajbentok te xi cymaꞌn cyjaꞌ:

—O kbiye akeju rey cye aj Israel in tzaj kꞌakꞌan cycꞌuꞌj cyiꞌj xjal; cyjaꞌtzun cꞌoquel kkꞌoꞌne kxbalune chꞌiꞌx twitz, tucꞌix jun sakbak cbel ten kkule, ex ko xeꞌltzune twitz rey cye aj Israel, kape jacu cyaj ankꞌina tuꞌn.

32 Octzun cykꞌoꞌn cyxbalun chꞌiꞌx twitz ex tucꞌix jun sakbak cub cykꞌoꞌn cykul, e pontzun twitz rey cye aj Israel ex xi cymaꞌn te cyjaꞌ:

—Tat Rey, in cubsan Ben-adad twitza tuꞌn miꞌn tcub tbyoꞌna.

Atzunte Acab xi ttzakꞌweꞌn:

—¿Maj itzꞌxpetzun aju wermaniye Ben-adad?

33 Atzun cye xinak e jaw tzalaj tej cybinte ju yol lu ex jurat xi cytzakꞌweꞌn:

—Tat Rey, ate Ben-adad termaniya.

—Chuxni cyxiꞌye kꞌilte te, chi Acab xi ttzakꞌweꞌn.

Pontzun Ben-adad twitz Acab, ex atzunte Acab jax tkꞌoꞌn tuj tcarwaj.

34 Xitzun tmaꞌn Ben-adad te Acab:

—Jacu che aj nkꞌoꞌne juntl maj ke tnam e jeꞌl tiꞌn ktzan nmane te ktzan tmana, ex jacu ten tcꞌaꞌẍa tuj Damasco, ic tzaꞌn tej tten tcꞌaꞌẍ ktzan nmane tuj Samaria, chi Ben-adad.

Atzunte Acab xi ttzakꞌweꞌn:

—Ka icju, jacu txi ntzokpiꞌne tuꞌn taj meltzꞌaja.

Cyjaꞌtzun tten, bant tiꞌj jun yol tuꞌn Acab tucꞌil Ben-adad, ex xi ttzokpiꞌn tuꞌn taj meltzꞌaj.

35 Attok jun xinak cyxol ke t-sanjel Dios tzaj tmaꞌn Dios te tuꞌn t-xi tmaꞌn te jun tucꞌil cyjaꞌ:

—Binchama xtalbil chin tbyoꞌn oca.

Atzunte juntl mintiꞌ cub tuj twitz tuꞌn toc tbyoꞌn tucꞌil. 36 Xitzun tmaꞌn ju t-sanjel Dios te tucꞌil:

—Tuꞌnju mintiꞌ ma txi tnimana aju ma tma Kman, oꞌcx oc tel tpaꞌn tiba wiꞌje cꞌoquel tzokpaj jun balun tiꞌja.

Tejtzun tel tpaꞌn tib ju xjal lu tiꞌj t-sanjel Dios, etz jun balun tuj tbe ex cub byoꞌn tuꞌn.

37 Te tibajxi oc noj t-sanjel Dios tiꞌj juntl xinak, ax icx xi tmaꞌn te tuꞌn toc cꞌixbisaꞌn tuꞌn, atzunte xinak lu oc ten cꞌixbisalte te ex biꞌx oc jun ẍil tiꞌj tuꞌn. 38 Xiꞌtzun t-sanjel Dios ayol tiꞌj rey max tuj be, oc tmaksiꞌn twitz tuꞌn jun xbalun tuꞌntzun miꞌn tel tnicꞌ rey tiꞌj. 39 Tejtzun ticꞌ rey, xitzun tmaꞌn t-sanjel Dios te tucꞌil tkꞌajkꞌajel twiꞌ cyuwxix:

—Tat Rey, akine ajbel teya tej ẍin ex bete jatum nnoꞌc kꞌoj, etz jun soldad ex tzaj tiꞌn jun pres wucꞌile. Tzaj tmaꞌn weye tuꞌn tcyaj ten ju pres lu tuj ncwente, ax icx tzaj tmaꞌn cyjaꞌ: Ka ma txi tzokpaj tuꞌna, aya cymel te t-xel, ex ka miꞌn, il tiꞌj tuꞌn t-xi tchjoꞌna 75 libr sak pwak te tmulta. 40 Pero ma txi tzokpaj pres wuꞌne tej matok in chin binchane juntl tiꞌxti.

Atzunte rey cye aj Israel xi ttzakꞌweꞌn:

—Axa ma kꞌmante ka at tila, ex ma tmaya aju t-sentensa tuꞌn tcub.

41 Atzunte t-sanjel Dios jurat naj el tiꞌn aju xbalun tocsaꞌn twitz. Eltzun tnicꞌ rey tiꞌj ka jun t-sanjel Dios jlu. 42 Xitzun tmaꞌn t-sanjel Dios te rey cyjaꞌ:

—Atzun jlu ma tma Kman: Tuꞌnju ma txi ttzokpiꞌna aju xinak otok cub t-sentens wuꞌne tuꞌn tcyim, atzun jaꞌlo aya cymel te t-xel, ex akeju t-xjalila oc che najel te cyxel ke t-xjalil.

43 Ajtzun meltzꞌaj ju rey cye aj Israel tuꞌn tpon tja tuj Samaria in bisun ex in kꞌojl wen.