3 Tzajtzun tchi tiꞌj Elías, ex xi ok clol tib tuj tnam Beerseba aju taꞌ tuj txꞌotxꞌ Judá, ex axtzun cyaj tkꞌoꞌn ju tmajen. 4 Xi oktl Elías tuj be in xiꞌ tuj tzkij txꞌotxꞌ, enter jun kꞌij o bet ex cub keꞌ t-xeꞌ jun wiꞌ tal tzeꞌ. Octzun ten naꞌl Dios ex tma: Acuxtzun jaꞌlo Nman, chin tbyoncuya, porque mya mas baꞌn kine twitz ktzan nmane, tuꞌn wankꞌintle twitz txꞌotxꞌ.

5 Cubtzun coẍeꞌ t-xeꞌ tal tzeꞌ, ex icꞌ tan. Pontzun jun anjel ttxlaj, ocx tyucun ex tma te: Weꞌctza ex waꞌna.

6 Xitzun tqueꞌyin Elías tiꞌjele, ex o til jun pan tzkꞌajsaꞌmaj tuj xkꞌaꞌl tcub nikayin tiꞌj twiꞌ, tucꞌix jun xar aꞌ. Jawtzun weꞌ Elías, o waꞌn o cꞌan ex cub tan juntl maj. 7 Ul t-anjel Kman tcabmajin, ocx tyucun ex xi tmaꞌn te: Weꞌctza ex waꞌna porque atx nim taj tuꞌn tbeta.

8 Jawtzun weꞌ Elías, o waꞌn ex o cꞌan. Tuꞌnju twa baj, oc nim tipun tuꞌn tbet tuj 40 kꞌij ex 40 konicꞌan, tejxi tpon max twi witz te Dios aju Horeb tbi. 9 Tejtzun tpon, ocx tuj jun toyꞌ pic, ex axtzun o ten jun konicꞌan. Tzajtzun yolin Kman tucꞌil, ex chi cyjaꞌ: ¿Ti in baj teya tzalu, Elías? 10 Atzunte xi ttzakꞌweꞌn: Nman Dios, aya Tajaw Tcyakil, nimxix nganiye tuꞌn wajbene teya, atzun cye aj Israel ma tzꞌel cypaꞌn cyib tiꞌj ju yol cyaj bant tiꞌj tuꞌna cyucꞌil; ma baj cykꞌuchin ke t-altara, ex ma che cub cybyoꞌn ke t-sanjela tuꞌn spad. Oꞌcx kine ma chin cyaj ten, ex lu in che jyon wiꞌje tuꞌn ncub byoꞌne cyuꞌn, chi Elías.

11 Atzunte Kman xi tmaꞌn te: Tetza tzalu ex weꞌcuya nwitze twi witz.

Icꞌtzun Kman twitz toyꞌ pic ex tzaj jun nintz cykꞌikꞌ nimxix tipun wen, biꞌx e pax ke witz tuꞌn cykꞌikꞌ ex biꞌx e jeꞌx pax ke pic twitz Kman; pero mya ajuntok Kman tuj cykꞌikꞌ. Tej tweꞌ cykꞌikꞌ, tzaj jun cyaknajnab; ax icx mya ajuntok Kman tuj cyaknajnab. 12 Tej tweꞌ cyaknajnab, jaw jucpaj txkan kꞌakꞌ; pero ax mya ajuntok Kman tuj ju kꞌakꞌ lu. Te tibajxi ju kꞌakꞌ, o binjtz jun tkꞌajkꞌajel cykꞌikꞌ in jubin myaxix cyuw. 13 Tej tbinte Elías jlu, xi tmukꞌan twitz tuꞌn t-xbalun, etz tuj toyꞌ pic ex cub weꞌ ttziꞌ. Tbitzun Elías jun tkꞌajkꞌajel in tmaꞌn: ¿Ti in baj teya tzalu, Elías?

14 Atzunte xi ttzakꞌweꞌn: Nimxix nganiye tuꞌn wajbene teya Kman Dios, aya Tajaw Tcyakil, atzun cye aj Israel ma tzꞌel cypaꞌn cyib tiꞌj ju yol cyaj bant tiꞌj tuꞌna cyucꞌil, ex ma baj cykꞌuchin ke t-altara, ex ma che cub cybyoꞌn ke t-sanjela tuꞌn spad. Oꞌcx kine ma chin cyaj ten, ex lu in che jyon wiꞌje tuꞌn ncub byoꞌne cyuꞌn.

15 Atzunte Kman xi tmaꞌn te: Kꞌoncuya be, taj meltzꞌaja tujx ju be jatum saja, tuꞌn tpona tuj lugar tzkij txꞌotxꞌ te Damasco. Octzun tpona cꞌoquel tkꞌoꞌna toclen ju xjal Hazael tuꞌn toc te rey tuj txꞌotxꞌ Siria. 16 Ax icx kꞌon oca toclen Jehú aju tcyꞌajal Nimsi tuꞌn toc te rey cye aj Israel, ex atzunte Eliseo aju tcyꞌajal Safat aju aj Abel-mehola, kꞌon oca toclen te nsanjele te t-xela. 17 Cyjaꞌtzun, ka at jun ma tzokpaj tuꞌn miꞌn tcub byoꞌn tuꞌn t-spad Hazael, a Jehú cbel byonte te, ex ka at jun ma tzokpaj tuꞌn miꞌn tcub byoꞌn tuꞌn t-spad Jehú, a Eliseo cbel byonte te. 18 Ex akine chin cyjel clonte wuk mil xjal cyxol aj Israel, akeju mintiꞌ ma che cub ẍmejeꞌ twitz Baal, ex mintiꞌ ma tzꞌel cytzꞌuban cyiꞌj ke tkan.

19 Icꞌtzun Elías tuj ju lugar lu ex cnet Eliseo tuꞌn, aju tcyꞌajal Safat, in chꞌocantok. Nejni cablaj moj wacẍ twitz Eliseo ex a in chꞌocan tiꞌj ju mancbil moj. Xitzun lakꞌeꞌ Elías tucꞌil, el tiꞌn t-ẍjoꞌw ex oc tkꞌoꞌn tiꞌj Eliseo. 20 E cyajtzun tkꞌoꞌn Eliseo ke wacẍ, xi kelan tuꞌn tpon canun tucꞌil Elías ex xi tmaꞌn te:

—Kꞌontza ambil weye tuꞌn tel ntzꞌubane twitz nmane ex twitz ntxuꞌye tuꞌn tbaj nkꞌolben wibe cyucꞌil, ex chin xel lpeꞌye tiꞌja.

—Baꞌn tuꞌn t-xiꞌya, chi Elías, mintiꞌ nnoꞌc nmayoꞌna tuꞌn tbinchanteya jlu.

21 Eltzun tpaꞌn tib Eliseo tiꞌj Elías, e cub tbyoꞌn cabe wacẍ aju in chꞌocantok tiꞌj, ex ax aju tzeꞌ in ajben te cyyuw wacẍ tucꞌix punt ajben te siꞌ tuꞌn ttzkꞌaj chibj, ex xi tkꞌoꞌn te cychiꞌ ke xjal. Octzun lpeꞌ tiꞌj Elías ex oc te onil te.