Aju cybi ke xjal e jeꞌtz tuj Babilonia
8
Atzun cybi ke nejenel cye junjun cꞌloj xjal at cyxilen cyxolx, ic tzaꞌnx in cnet tuj libro jatum tzꞌiban cybi cyxeꞌchel, akeju e jeꞌtz tuj Babilonia junx wucꞌile, tuꞌn cyul tuj Jerusalén tuj tkꞌijlalil tej in cawintok rey Artajerjes:2-3 Gersón aju nejenel cye tiyjil Finees; Daniel aju nejenel cye tiyjil Itamar; Hatús aju tcyꞌajal Secanías, nejenel cye tiyjil David; Zacarías aju nejenel cye tiyjil Paros, ex ucꞌin jun syent tucꞌ 50 xinak tuꞌn, tzꞌibantok cybi tuj list;
4 Elioenai aju tcyꞌajal Seraías, nejenel cye tiyjil Pahat-moab, ucꞌin cab syent xinak tuꞌn;
5 Secanías aju tcyꞌajal Jahaziel, nejenel cye tiyjil Zatu, ucꞌin ox syent xinak tuꞌn;
6 Ebed aju tcyꞌajal Jonatán, nejenel cye tiyjil Adín, ucꞌin 50 xinak tuꞌn;
7 Jesaías aju tcyꞌajal Atalías, nejenel cye tiyjil Elam, ucꞌin 70 xinak tuꞌn;
8 Zebadías aju tcyꞌajal Micael, nejenel cye tiyjil Sefatías, ucꞌin 80 xinak tuꞌn;
9 Obadías aju tcyꞌajal Jehiel, nejenel cye tiyjil Joab, ucꞌin cabe syent tucꞌ wajxaklaj xinak tuꞌn;
10 Selomit aju tcyꞌajal Josifías, nejenel cye tiyjil Bani, ucꞌin jun syent tucꞌ 60 xinak tuꞌn;
11 Zacarías aju tcyꞌajal Bebai, nejenel cye tiyjil Bebai, ucꞌin 28 xinak tuꞌn;
12 Johanán aju tcyꞌajal Hacatán, nejenel cye tiyjil Azgad, ucꞌin jun syent tucꞌ laj xinak tuꞌn;
13 Elifelet, Jeiel ex Semaías, nejenel cye tiyjil Adonicam, ucꞌin 60 xinak cyuꞌn, ake jlu yajxi e jeꞌtz tuj Babilonia.
14 Utai ex Zabud, nejenel cye tiyjil Bigvai, ex ucꞌin 70 xinak cyuꞌn.
Ke ajbel tuj tja Dios
15 Akine Esdras e oc nchmoꞌne cycyakil xjal lu ttziꞌ tbe aꞌ in pon tuj nima Ahava, ex ox kꞌij o tene ma chixin. Tejtzun tjaw list wuꞌne cyiꞌj ke xjal ex cyiꞌj ke pal, mintiꞌ jun aj Leví cnet wuꞌne cyxol. 16 Tuꞌntzun jlu e jeꞌx nsamaꞌne junjun xjal maꞌ cyoclen ex atzun ke jlu: Eliezer, Ariel, Semaías, Elnatán, Jarib, Elnatán, Natán, Zacarías ex Mesulam, tucꞌix Joiarib ex Elnatán, akeju kꞌol xnakꞌtzbil, 17 e jeꞌx nsamaꞌne tuꞌn cyxiꞌ yolil tucꞌil Iddo aju nejenel te lugar Casifia, ex xi nmaꞌne cye alcye yol tuꞌn t-xi cymaꞌn te Iddo ex cye ke tucꞌil, akeju ajbel tuj tja Dios otok che pon tuj Casifia, tuꞌn ttzaj cyiꞌn junjun xjal tuꞌn cyajben junx kucꞌile tuj tja Dios. 18 Ex chjonte Dios ul cyiꞌn jun xinak at nimxix tnabl, Serebías tbi, cyucꞌix ke tcꞌwaꞌl ex ke terman, wajxaklaj cybet tuꞌn cycyakil; a jlu tiyjil jun aj Leví Mahli tbi. 19 Ax icx ul cyiꞌn Hasabías ex Jesaías cyucꞌix ke cycꞌwaꞌl ex ke cyerman, tuꞌn cycyakil japun winkin cybaj, ex ake jlu tiyjil Merari ke.
20 Cyxol cyiyjil ke xjal e ajben tuj tja Dios, akeju e oc tkꞌoꞌn David ex cyuꞌn ke nejenel tuꞌn cyonin cyiꞌj ke aj Leví, attok cabe syent tucꞌ winkin cybet, ex cycyakiltzun ke jlu cuꞌx tzꞌibet cybi.
21 Te tibajxi xi nmaꞌne tuꞌn tcub kyoꞌne weꞌyaj ttzi nima Ahava, tuꞌntzun ttzaj knaꞌne aju kpaltile twitz Dios ex tuꞌn t-xi kkanine te tuꞌn koc cwentine tuꞌn tuj be, cyucꞌix ke kcꞌwaꞌle ex tcyakilju at keye. 22 Tzaj nchꞌixwiye tuꞌn t-xi nkanine te rey tuꞌn cytzaj tkꞌoꞌn ke soldad cyjax cyibaj chej te cwentil keye cywitz ke aj kꞌoj tuj be, porque otok txi nmaꞌne te rey ka ate Dios cwentil cye keju kꞌukl cycꞌuꞌj tiꞌj, pero ax icx in tzaj nim tkꞌoj ex ttxꞌuꞌjil cyiꞌj ke xjal nneꞌl cypaꞌn cyib tiꞌj. 23 Cyjaꞌtzun, cub kyoꞌne weꞌyaj ex o cubsane twitz Dios tiꞌj tcyakil jlu, ex tzaj tbiꞌn Dios kkanbetze.
24 Ex jaw nscꞌoꞌne cablaj nejenel cye pal, cyucꞌix Serebías, Hasabías ex lajtl cyucꞌil, 25 baj nmaloꞌne sak pwak, kꞌan pwak ex ke macbil otok che tzaj kꞌoꞌn tuꞌn rey ex cyuꞌn ke xjal onil te rey tuj tcawbil, ex cyuꞌn ke xjal maꞌ cyoclen ttxlaj, ex cyuꞌn cycyakil aj Israel akeju otok tzꞌoc cychmon cyib. Cycyakil ke oyaj lu tuj tja Dios tuꞌn cyajben. 26 E cub nmaloꞌne ke oyaj lu ex xi nkꞌoꞌne jweꞌ syent quintal sak pwak cye, cyucꞌix jun syent macbil sak pwak cytxꞌotxꞌil, 75 quintal cyalil, 75 quintal kꞌan pwak; 27 tucꞌix winkin lak kꞌan pwak cytxꞌotxꞌil te belajlaj libr cyalil, ex cabe macbil kꞌan cꞌuxbil cytxꞌotxꞌil in che koptzꞌaj wen, mas tbanil che queꞌyin cywitz ke mastl ex wiꞌyilxix ke, mer ic tzaꞌn kꞌan pwak.
28 Ex xitzun nmaꞌne cye: Akeye ma che el paꞌne tuꞌn cyajbene oꞌcx te Kman, ax icx ke macbil. Aju sak pwak ex kꞌan pwak jun oyaj te Kman ke, aju Cydios ktzan kxeꞌchel. 29 Cycwentin oque ex cycꞌuꞌnxe maxi ocxi tbaj cymaloꞌne cywitz ke nejenel cye pal, cywitz aj Leví ex cywitz ke nejenel cye xjal aj Israel, cyuj ke cwart ateꞌ tuj tja Kman tuj Jerusalén, nchiye cye. 30 Atzun cye pal cyucꞌix aj Leví xi cycꞌmoꞌn aju sak pwak, kꞌan pwak ex ke macbil, akeju otok che baj maloꞌn tuꞌn t-xi cyiꞌn tuj Jerusalén, tuꞌn cyocx kꞌot tuj tja Kman.
31 Tuj tcablajin kꞌij te tnejel xjaw tzyet be kuꞌne ttzi nima Ahava tuꞌn kpone tuj Jerusalén; a Dios onin keye, o ko clete tuꞌn tuj kbeye tuj cykꞌab ke aj kꞌoj kiꞌje ex tuj cykꞌab xjal elekꞌ. 32 Tejtzun kpone tuj Jerusalén, o ojlane ox kꞌij. 33 Tuj tcyajin kꞌij kponlene, baj kmaloꞌne sak pwak twitz tja Dios, tucꞌix kꞌan pwak ex ke macbil, ex xitzun kkꞌoꞌne tcyakil te pal Meremot aju tcyꞌajal Urías. Atok Eleazar tucꞌil, aju tcyꞌajal Finees, cyucꞌix ke aj Leví, ex atzun ke jlu: Jozabad aju tcyꞌajal Jesúa ex Noadías aju tcyꞌajal Binúi. 34 Ax kꞌij lu baj malet ex baj ajlet tcyakil ex cyaj tzꞌibet tcyakil tajlal iktz.
35 Te tibajxi, akeju e etz tuj Babilonia ex otok che ul tuj Jerusalén xi cykꞌoꞌn ke oyaj patun in che cub te Dios aju Cydios aj Israel, ex xi cykꞌoꞌn cablaj tal tor te jun oyaj te akꞌbil chjonte cyuꞌn cycyakil aj Israel; ax icx xi cykꞌoꞌn 96 tman ẍneꞌl, 77 tal tman ẍneꞌl ex cablaj chip te chojbil il. Tcyakil jlu patun cub te nimbil te Kman. 36 Ex xitzun cykꞌoꞌn aju uꞌj jatum tzꞌiban orden tuꞌn rey cye ke cawil ex gobernador tuj txꞌotxꞌ tcubsaꞌn tuj tumlal telex kꞌij te nima Éufrates; ex atzun ke jlu e onin cyucꞌil tnam xjal tuꞌn tjaw binchet tja Dios.