Tej tpon Esdras cyucꞌix ke tucꞌil tuj Jerusalén
7
Te tibajxi jlu, tej toctok Artajerjes te rey cye aj Persia, at jun xinak Esdras tbi, tcyꞌajal Seraías, atzunte Seraías tcyꞌajal Azarías, atzunte Azarías tcyꞌajal Hilcías, 2 atzunte Hilcías tcyꞌajal Salum, atzunte Salum tcyꞌajal Sadoc, atzunte Sadoc tcyꞌajal Ahitob, 3 atzunte Ahitob tcyꞌajal Amarías, atzunte Amarías tcyꞌajal Azarías, atzunte Azarías tcyꞌajal Meraiot, 4 atzunte Meraiot tcyꞌajal Zeraías, atzunte Zeraías tcyꞌajal Uzi, atzunte Uzi tcyꞌajal Buqui, 5 atzunte Buqui tcyꞌajal Abisúa, atzunte Abisúa tcyꞌajal Finees, atzunte Finees tcyꞌajal Eleazar, atzunte Eleazar tcyꞌajal Aarón aju tnejel pal. 6 Xnakꞌtzamaj Esdras tiꞌj ley aju otok tzaj tkꞌoꞌn Kman aju Cydios aj Israel te Moisés. O oninjtz Esdras tuꞌn Kman, cyjaꞌtzun xi tkꞌoꞌn rey Artajerjes tcyakil aju xi tkanin Esdras te. 7 Cyjaꞌtzun tten, tuj twukin abkꞌi toclen Artajerjes te rey, ajtz Esdras tuj Babilonia tuꞌn tul tuj Jerusalén cyucꞌix jun cꞌloj aj Israel; cyxol ke jlu at ke pal, at aj Leví, at ke baꞌn che bitzan, at ke cwentil ttzi tja Dios ex at ke xinak ajbel tuj tja Dios. 8-9 Cub be tuꞌn Esdras tuꞌn tajtz tuj Babilonia tuj tnejel kꞌij te tnejel xjaw tuj twukin abkꞌi toclen Artajerjes te rey, ex tuꞌnju onbil tcꞌam tuꞌn t-xtalbil Dios, pon tuj Jerusalén tuj tnejel kꞌij te tjweꞌyin xjaw tex abkꞌi. 10 Nim tgan Esdras tuꞌn t-xnakꞌtzan tib tiꞌj tley Kman, ex tuꞌn tjapun tuꞌn, ex tuꞌn t-xi t-xnakꞌtzaꞌn tley Kman ex ke tmandamyent cye aj Israel.11 Atzun copya jlu tiꞌj uꞌj xi tkꞌoꞌn rey Artajerjes te Esdras aju pal ex xnakꞌtzal tiꞌj ley, ex xnakꞌtzamaj tiꞌj tcyakil tmandamyent Kman ex ke tley aju tzaj tkꞌoꞌn cye aj Israel:
12 Akine Artajerjes aju cawil cyibaj mastl rey, in xi nkꞌolbene aya Esdras, aya pal ex xnakꞌtzal xnakꞌtzamaj tiꞌj tley Dios aju at tuj cyaꞌj.
13 Ma txi nmaꞌne cye cycyakil aj Israel ateꞌ tjakꞌ ncawbile, tucꞌix cye pal ex cye aj Leví, ka cyaj tuꞌn cyxiꞌ tucꞌila tuj Jerusalén, baꞌn tuꞌn cyxiꞌ.
14 Porque wuꞌne ma txi nsamaꞌna, ex cyuꞌn keju wuk onil weye, tuꞌn t-xiꞌya queꞌyilte ka in japun cyuꞌn ke xjal ateꞌ tuj Judá ex tuj Jerusalén aju in tmaꞌn tley Tdiosa, aju at tuj tkꞌaba.
15 Kꞌinxa kꞌan pwak ex sak pwak aju ma txi kkꞌoꞌne, akine cyucꞌix ke onil weye, ic tzaꞌnx tbis kcꞌuꞌje, tuꞌn t-xi kkꞌoꞌne te Cydios aj Israel aju najl tuj Jerusalén,
16 ex kꞌinxa tcyakil sak pwak ex kꞌan pwak jacu cnet tuꞌna tuj tcyakil txꞌotxꞌ Babilonia, tucꞌixju ctzajel cykꞌoꞌn ke xjal ex ke pal tuꞌn cyex cygan, tuꞌn tajben tuj tja Dios tuj Jerusalén.
17 Tuꞌn tcyakil pwak lu jacu che lakꞌet tal tor, tman ẍneꞌl ex ke tal tman ẍneꞌl, tuꞌn toc junx tucꞌil oyaj twitz triw, sebad ex taꞌl twitz uva, tuꞌntzun t-xi kꞌot te Dios tibaj altar tuj tja Cydiose tuj Jerusalén.
18 Atzunju kꞌan pwak ex sak pwak cyjel sobryin, aya cyucꞌix ke tucꞌila, cybinchame alcye baꞌn tuj cywitze, ic tzaꞌnx tajbil Dios.
19 Atzun ke macbil ma txi kꞌoꞌn tuj tcwenta tuꞌn cyajben tuj cꞌulbil tuj tja Dios, axa cxel kꞌonte cye te Dios tuj Jerusalén.
20 Nok alcyex juntl atx taj tuꞌn tajben tuj tja Tdiosa, baꞌn tuꞌn t-xi tkanina cye ke xjal cꞌuꞌlte nkꞌinumable.
21 Akine rey Artajerjes in xi nkꞌoꞌne orden lu cye cycyakil cꞌuꞌl pwak ateꞌ tiꞌjxi nima Éufrates tuj telex kꞌij, tuꞌn t-xi cykꞌoꞌn tcyakilju ctzajel tkanin Esdras, aju pal ex xnakꞌtzal xnakꞌtzamaj tiꞌj tley Dios aju at tuj cyaꞌj.
22 Baꞌn tuꞌn t-xi cykꞌoꞌne 75 quintal sak pwak te, tucꞌix cyaje syent quintal triw, kak syent galón taꞌl twitz uva, ex kak syent galón chibj aseyt; tcyakil jlu mlay tzicꞌ mastl tibaj, atzun atzꞌan, baꞌn t-xi kꞌot nok nicꞌpun ctzajel tkanin.
23 Tcyakilju ctzajel tkanin Dios aju at tuj cyaꞌj tuꞌn tajben tuj tja, il tiꞌj tuꞌn t-xi kꞌot naj, tuꞌntzun miꞌn ttzaj jun castiw cyibaj ke ncꞌwaꞌle ex cyibaj ke tnam jatum in chin cawine. 24 Ax icx baꞌn tuꞌn cybinteye tuꞌn miꞌn tel kanit mi jun txcaj chojenj cyiꞌj ke pal, ke aj Leví, ke bitzal, ke cwentil ttzi tja Dios, keju in che ajben tuj tja Dios ex nok alcyex juntl xjal in ajben tuj tja Dios.
25 Atzun teya Esdras, ic tzaꞌnx tnabla ma tzaj tkꞌoꞌn Tdiosa, che tkꞌoꞌn oca ke jwes ex ke cawil akeju baꞌn tley Tdiosa cyuꞌn, tuꞌn t-xi cybinchaꞌn tiꞌj cyxtis cycyakil xjal ateꞌ tuj partament tiꞌjxi nima Éufrates tuj telex kꞌij, atzun cye keju mintiꞌ baꞌn tley Dios cyuꞌn, che t-xnakꞌtzanxa ke.
26 Ka at jun mintiꞌ ma japun tley Tdiosa ex nleye tuꞌn, akine rey, il tiꞌj tuꞌn tcub t-sentens; ka tuꞌn tcyim, ka tuꞌn tex lajet tuj ttanmi, ka tuꞌn tchjet tmult, ex ka tuꞌn tocx pres, chi tyol uꞌj.
Aju tnaꞌj Dios Esdras
27 Octzun ten Esdras naꞌl Dios ex tma: Chjonte te Kman aju Cydios kxeꞌchel, tuꞌnju ma yolin tuj tanmi rey tuꞌn tbaj tbinchaꞌn juntl maj tuj tja Dios tbanilxix queꞌyin tuj Jerusalén; 28 ex nok tuꞌn t-xtalbil Dios ma chin jaw scꞌoꞌne tuꞌn rey, ex cyuꞌn keju onilte ex cyuꞌn ke xinak maꞌ cyoclen ttxlaj, tuꞌn woque te nejenel. Ma tzaj tkꞌoꞌn Kman wipumale, porque tuꞌnju onbil tuꞌn ma che oc nchmoꞌne keju mas maꞌ cyoclen cyxol aj Israel, tuꞌn cyex tuj Babilonia junx wucꞌile, chi Esdras.