Etz jun orden tuꞌn Darío tuꞌn cucx cyakꞌnan tiꞌj tja Dios
6
Atzunte rey Darío xi tmaꞌn tuꞌn tbaj jyet cyxol ke uꞌj cꞌuꞌn tuj Babilonia. 2 Ex tuj tja rey at tuj Ecbatana tuj txꞌotxꞌ Media, cnet jun uꞌj cyuꞌn jatum tzꞌiban jun acta in tmaꞌn cyjaꞌ:3 Tuj tnejel abkꞌi ttzyetlen tcawin rey Ciro, ex jun orden tuꞌn in tmaꞌn cyjaꞌ:
E tjaw binchet juntl maj tja Dios tuj Jerusalén, tuꞌntzun t-xi kꞌot chojbil te Dios. E tcub keꞌ t-simyentil ex e t-xiꞌ 30 var twaꞌl ex 30 var tuj t-ẍcyin;
4 ex oc tex ox txol abj nmak, e t-xiꞌ jun txol tzeꞌ, ax icx oc tex juntl ox txol abj. Aju cchjolte tcyakil jlu, atzunju cꞌuꞌl tpwak rey.
5 Atzun ke macbil kꞌan pwak ex sak pwak cytxꞌotxꞌil, akeju e jeꞌtz tiꞌn Nabucodonosor tuj tja Dios tuj Jerusalén ex e ul tiꞌn tuj Babilonia, e cyaj juntl maj tuꞌn cypon tuj Jerusalén ex tuꞌn cyocx kꞌot tuj tja Dios tujx cylugar, chi orden tuꞌn Ciro.
6 Cyjaꞌtzun, aya Tatnai gobernador tuj partament tcub tiꞌjxi nima Éufrates tuj telex kꞌij, ex aya Setar-boznai ex ke mastl cyucꞌile, akeju at cyoclen tujx partament:
Miꞌn cheꞌxe tuj Jerusalén labtel cyiꞌj xjal judiy;
7 cykꞌonxe ambil te gobernador cye xjal Judiy cyucꞌix ke nejenel cye, tuꞌn tjaw cybinchaꞌn juntl maj tja Dios tujx tlugar.
8 Atzun orden jlu wuꞌne, alcye tumel tuꞌn cyonine cyiꞌj ke nejenel cye xjal Judiy tuꞌn tjaw cybinchaꞌn tja Dios: Tuꞌn tcyakilju chojenj in tcꞌmon chmol pwak te rey tuj partament tiꞌjxi nima Éufrates tuj telex kꞌij, e tchjet gast tiꞌj tja Dios tujxix kꞌij banimaj tiꞌj, tuꞌntzun miꞌn tweꞌ akꞌuntl.
9 Ex tcyakil kꞌij tuꞌn t-xi kꞌot cye ke pal tuj Jerusalén aju in cykanin tuꞌn tajben cyuꞌn te oyaj patun in cub te Dios at tuj cyaꞌj: ka tal tor, ka ẍneꞌl, ka tal tman ẍneꞌl, ka twitz triw, ka atzꞌan, ka taꞌl twitz uva ex ka chibj aseyt,
10 tuꞌntzun t-xi cykꞌoꞌn ke chojbil in tzalaj Dios cyiꞌj, aju Dios at tuj cyaꞌj, ex tuꞌn cynaꞌn Dios wiꞌje ex cyiꞌj ke ncꞌwaꞌle, tuꞌntzun ktene tuj txubtxaj.
11 Ax icx cxel nkꞌoꞌne jun orden cyeye: Ka at jun mi ma txi tniman ley lu, cbeletz kꞌit jun viga twi tja, cbelex awet, ex atzun cbel xoꞌt xjal tibaj twi tzeꞌ lu tuꞌntzun tcyim, ex atzunju tja biꞌx cbel xitun.
12 Ate Dios jaw scꞌonte tnam Jerusalén tuꞌn ttzaj naꞌn tbi tuj, cyjaꞌtzun ka at jun rey ex ka jun tnam ma cub t-ximan tuꞌn tchꞌexpet orden lu, ex ka tuꞌn tcub t-xitun tja Dios tuj Jerusalén, najxwit xjal tuꞌn Dios. Akine Darío, wuꞌne ma txi nkꞌoꞌne orden lu. Japunx orden lu cyuꞌne ic tzaꞌnx tzꞌiban, chi orden in tmaꞌn tuj uꞌj.
Tzyet juntl maj akꞌuntl tiꞌj tja Dios tejxi tbaj bant
13 Ate Tatnai aju gobernador tuj partament tiꞌjxi nima Éufrates tuj telex kꞌij, tucꞌix Setar-boznai ex cyucꞌix ke cyucꞌil, o japun orden cyuꞌn, aju otok tzꞌetz tuꞌn rey Darío. 14 Cyjaꞌtzun tzyet juntl maj akꞌuntl tiꞌj tja Dios cyuꞌn ke nejenel cye xjal Judiy, ic tzaꞌnx xi kꞌmaꞌn cye cyuꞌn Hageo ex Zacarías aju tcyꞌajal Iddo akeju t-sanjel Dios, ex baꞌn eꞌla akꞌuntl. Pon baj twi akꞌuntl ic tzaꞌn kꞌmaꞌmaj tuꞌn Cydios aj Israel ex ic tzaꞌnx orden otok tzꞌetz tuꞌn Ciro, tuꞌn Darío ex tuꞌn Artajerjes, akeju rey cye aj Persia. 15 Bant tja Dios tuj ox tajlal xjaw Adar ex tuj tkakin abkꞌi ttzyetlen tcawin rey Darío.
16 Cubtzun cyicꞌsaꞌn ke pal, ke aj Leví ex ke mastl xjal aj Israel akeju otok che etz tuj Babilonia, jun ninkꞌij tucꞌil tzalajbil, tej ticꞌset tkꞌijlalil tja Dios tuꞌn tajben te cꞌulbil te. 17 Tuj icꞌsbil kꞌij lu xi cykꞌoꞌn jun syent tal tor te chojbil, cab syent tman ẍneꞌl ex cyaje syent tal tman ẍneꞌl, ax icx xi cykꞌoꞌn cablaj tman chip, jun tiꞌj junjun cꞌloj cyiyjil aj Israel, te jun oyaj te Dios te chojbil cyil cycyakil aj Israel. 18 Ax icx e oc kꞌoꞌn ke pal tiꞌj cyakꞌun ic tzaꞌnx cyturn, ax icx ke aj Leví, tuꞌn cyajben tuj cꞌulbil tuj tja Dios tuj Jerusalén, ic tzaꞌnx tzꞌibamaj tuj tley Moisés.
19 Ax icx keju otok che ajtz tuj Babilonia ex otok che ul meltzꞌaj tuj Jerusalén cub cyicꞌsaꞌn Xjan Kꞌij tuj cyajlaj tajlal tnejel xjaw. 20 Otok baj cyxjansan cyib ke pal ex ke aj Leví, cyjaꞌtzun sak ke ic tzaꞌnx in tmaꞌn tley Moisés, ex cyjaꞌtzun cub cybyoꞌn ke tal tman ẍneꞌl in che cub byet tuj Xjan Kꞌij, te cye keju otok che etz tuj Babilonia, te cye mastl cyerman pal ex te cyex aj Leví. 21 Cycyakil aj Israel, akeju otok che etz tuj Babilonia, e waꞌn tiꞌj wabj in bant tuj Xjan Kꞌij, junx cyucꞌil cycyakil keju otok tzꞌel cypaꞌn cyib tiꞌj mya baꞌn in bant cyuꞌn mastl tnam, ex otok tzꞌoc cymojban cyib cyucꞌil aj Israel tuꞌn cycꞌulun te Kman aju Cydios aj Israel. 22 Cub cyicꞌsaꞌn xjal wuk kꞌij ninkꞌij tucꞌil tzalajbil, tuꞌn cywaꞌn pan mintiꞌ t-samel tuj tuꞌn tjaw mal tcꞌuꞌj, porque otok noj tuj cyanmi tuꞌn tzalajbil tuꞌn Kman, tuꞌnju xtalbil otok binchanjtz cye tuꞌn rey cye aj Asiria ex tuꞌnju otok onin cyiꞌj tuꞌn tjaw binchet juntl maj tja Dios, aju Cydios aj Israel.