Jaw binchaꞌn juntl maj tja Dios
5
Ate Hageo aju t-sanjel Dios, tucꞌix Zacarías aju tcyꞌajal Iddo, xi cymaꞌn cye xjal judiy akeju najl tuj Judá ex tuj Jerusalén, akeju tkanil in tzaj tmaꞌn Kman cye, aju Cydios aj Israel. 2 Atzunte Zorobabel aju tcyꞌajal Salatiel, tucꞌix Jesúa aju tcyꞌajal Josadac, tzyet juntl maj akꞌuntl cyuꞌn tuꞌn tjaw binchet tja Dios tuj Jerusalén, ex e ten t-sanjel Dios cyucꞌil tuꞌn cyonin cyiꞌj. 3 Tzajtzun Tatnai aju gobernador tuj txꞌotxꞌ taꞌ tuj tumlal telex kꞌij te nima Éufrates, tucꞌix Setar-boznai ex cyucꞌix mastl cyucꞌil, e jeꞌx kꞌmalte cye cyjaꞌ: ¿Alcye ma txi kꞌonte orden cyeye tuꞌn tjaw cybinchaꞌne tja Dios lu ex tuꞌn tbaj cybinchaꞌne tcyakil tuj? 4 Ax icx tzaj cykanin: ¿Ti cybi ke xjal in che akꞌnan tiꞌj ja lu? 5 Masque icju, pero axte Dios o cwentin cye ke nejenel cye xjal Judiy, cyjaꞌtzun mintiꞌ o weꞌ akꞌuntl cyuꞌn. Xi t-samaꞌn Tatnai tkanil lu tucꞌil Darío aju rey cye aj Persia, ex e ayon tuꞌn cycꞌmonte alcye tzakꞌwebl tuꞌn rey.6 Atzun jun copya lu te uꞌj tuꞌn Tatnai aju gobernador te txꞌotxꞌ tcubsaꞌn tuj tumlal telex kꞌij te nima Éufrates, ex tuꞌn Setar-boznai ex ke mastl cyucꞌil ex ke xjal maꞌ cyoclen tuꞌn rey, akeju ateꞌtok tuj tumlal telex kꞌij te nima Éufrates, aju xi cysamaꞌn te rey Darío. 7 Chitzun in tmaꞌn cyjaꞌ:
Tat Rey, cuchiwt baꞌn taꞌya. 8 Kaje tuꞌn tbinteya jlu: O kox aje tuj txꞌotxꞌ Judá, ex aju tja Dios aju Dios maꞌxix toclen, niban tjaw cybinchaꞌn xjal cyuꞌn ke nmak abj xpelimaj ex niban cyjax naj ke tkul; cyuwxix in che akꞌnan tiꞌj akꞌuntl lu ex aju akꞌuntl in bet-xix wen.
9 Xi kkanine cye nejenel cye xjal judiy al uꞌn otok txi kꞌoꞌn orden cye tuꞌn tjaw binchet juntl maj tja Dios ex tuꞌn tjax cykꞌoꞌn tkul,
10 xi kkanine ti cybi ke xjal nejenel tiꞌj akꞌuntl, tuꞌntzun t-xi ksamaꞌne cybi tucꞌila.
11 Atzun cye tzaj cytzakꞌweꞌn: Keye in ko ajbene te Dios, aju Dios tajaw cyaꞌj ex tajaw txꞌotxꞌ, ex in ko akꞌnane tuꞌn tjaw binchet juntl maj tja, aju jaw binchaꞌn tuꞌn jun nintz rey cye aj Israel ojtxi.
12 Pero ke ktzan kxeꞌchele cybincha mya baꞌn, ex tuꞌntzunju tzaj nimxix tkꞌoj Dios cyiꞌj, aju tajaw cyaꞌj; e jeꞌx kꞌoꞌn tuꞌn tuj tkꞌab rey Nabucodonosor aju rey cye aj Babilonia aju aj Caldey, ex aju rey lu cub t-xitun tja Dios ex e jeꞌx tiꞌn nimcu xjal aj Israel tuj Babilonia.
13 Te tibajxi tzaj tkꞌoꞌn Ciro orden tuꞌn tjaw binchet juntl maj tja Dios tuj tnejel abkꞌi ttzyetlen tcawin tuj Babilonia.
14 Ax icx etz tiꞌn Ciro tuj tja cydios xjal aj Babilonia ke macbil kꞌan pwak ex sak pwak in che ajbentok nej tuj tja Dios tuj Jerusalén, akeju otok che pon tiꞌn rey Nabucodonosor tuj Babilonia, ex e jeꞌx tkꞌoꞌn tuj tcwent jun xjal Sesbasar tbi, aju otok tzꞌoc tkꞌoꞌn te gobernador.
15 Ex xi kꞌoꞌn orden te tuꞌn cyajtz tiꞌn ke macbil, tuꞌntzun cyul meltzꞌaj juntl maj tuj Jerusalén, ex tuꞌn tjaw binchaꞌn juntl maj tja Dios tujx tlugaril jatum tcubsaꞌn nej.
16 Tejtzun tul Sesbasar tuj Jerusalén cub keꞌ t-simyentil tja Dios tuꞌn; atxixtzun ttzyetlen tuꞌn tjaw binchet juntl maj tja Dios, pero naꞌnx tbant, che chi xjal judiy keye.
17 Jaꞌlo ka baꞌn tuj twitza, Tat Rey, kajbile tuꞌn tcuꞌx jyet cyuj ke libro cye ke rey cye aj Babilonia, tuꞌntzun kbinteye ka ax toc o tma Ciro tuꞌn tjaw binchet juntl maj tja Dios tuj Jerusalén, ex kajbile tuꞌn kbinteye alcye teya t-ximbetz tiꞌj jlu, Tat Rey, chi tuj uꞌj.