Cyajbiltok aj kꞌoj tuꞌn tmayet akꞌuntl
4
Tejtzun cybinte ke aj kꞌoj cyiꞌj aj Judá ex cyiꞌj aj Benjamín, ka otok che etz tuj Babilonia ex in che akꞌnantok tuꞌn tjaw binchet juntl maj tja Dios, aju Cydios aj Israel, 2 e jeꞌx queꞌyil cye Zorobabel ex Jesúa ex ke nejenel cye junjun cꞌloj cyiyjil aj Israel ex cyma:—Kꞌontza ambil keye tuꞌn konine cyucꞌile tuꞌn tjaw binchet tja Dios, porque akoꞌye ex akeye in ko cꞌulun twitz Dios aju Cydiose, ex in xi kkꞌoꞌne chojbil te atxix tuj tkꞌijlalil Esar-hadón, aju rey cye aj Asiria, aju ul kꞌinte keye tzalu.
3 Atzun cye Zorobabel, Jesúa ex ke nejenel cye junjun cꞌloj cyiyjil aj Israel xi cytzakꞌweꞌn:
—Mintiꞌ cyoclene tuꞌn cyakꞌnane junx kucꞌile tuꞌn tjaw binchet tja Kdiose. Oꞌcx keye ko jawil binchante te juntl maj, porque oꞌcx keye ma tzaj kꞌoꞌn orden tuꞌn rey Ciro tuꞌn tjaw kbinchaꞌne.
4 Atzun cye xjal najlke tuj lugar lu e oc ten xobtzal cye aj Judá tuꞌn t-xi cycolin akꞌuntl tiꞌj tja Dios. 5 Ax icx e oc ten ke xjal lu kꞌol pwak cye junjun xjal maꞌ cyoclen ttxlaj rey, tuꞌntzun t-xi cycolin aj Judá akꞌuntl tiꞌj tja Dios. O cybincha jlu tuj tcyakil tkꞌijlalil Ciro aju rey cye aj Persia, ex max tuj tkꞌijlalil tej tcawin rey Darío aju rey cye aj Persia. 6 Matok in tzyet tcawin rey Asuero, e pon ke xjal tucꞌil kꞌmalte yol mya baꞌn cyiꞌj aj Judá ex cyiꞌj aj Jerusalén. 7 Ex tuj tkꞌijlalil Artajerjes aju rey cye aj Persia, ate Bislam tucꞌix Mitrídates, Tabeel ex mastl cyucꞌil, cub cytzꞌiban jun uꞌj ex xi cysamaꞌn te rey Artajerjes. Aju uꞌj lu tzꞌibantok tuj yol aramey. 8 Ate Rehum aju gobernador toc tuꞌn rey, tucꞌix Simsai aju aj tzꞌibal, xi cytzꞌiban jun uꞌj te rey Artajerjes, jatum in yolin mya baꞌn cyiꞌj cycyakil xjal najlke tuj Jerusalén. 9-11 Atzunju uꞌj lu xi cysamaꞌn Rehum aju gobernador, tucꞌix Simsai aju aj tzꞌibal ex ke mastl cyucꞌil akeju jwes ke, cyucꞌix mastl gobernador, ex ke xjal maꞌ cyoclen otok che tzaj tuj Persia, tuj Erec, tuj Babilonia ex tuj Susa ex ka tuj Elam, ex ke mastl xjal te junjun tnam e ul kꞌiꞌn tuꞌn rey Asnapar aju maꞌ toclen, tuꞌn cynajan tuj txꞌotxꞌ Samaria ex cyuj mastl txꞌotxꞌ tcubsaꞌn tuj telex kꞌij te nima Éufrates.
Atzun tyol uꞌj lu, aju xi cysamaꞌn:
Aya Tat Rey Artajerjes, akoꞌye tmajena najlkoꞌye jlajtzi nima Éufrates in xi kkꞌolbeꞌne:
12 Kajbile tuꞌn tbinteya Tat Rey: Ke xjal judiy ẍe tzaj tucꞌila tuꞌn cyul kucꞌile ma che ul tuj Jerusalén, jumajx txꞌuꞌj cywiꞌ ex miban che bin. Ma tzyet tuꞌn tjaw cybinchaꞌn juntl maj tnam tucꞌix muro toc tiꞌjele, ex niban t-xi cybinchaꞌn ke t-simyentil muro.
13 Ax icx kaje tuꞌn tbinteya Tat Rey, ka ma jaw binchaꞌn juntl maj tnam lu, ex ka ma jaw binchaꞌntl muro tiꞌjele, entons ke xjal lu mlay chjet chojenj cyuꞌn, ax icx mastl chojbil aju il tiꞌj tuꞌn tchjet, ex tuꞌn jlu cbel lakꞌeꞌ tkꞌinumabla.
14 Ex tuꞌnju in ko ajbene teya Tat Rey, miꞌn kaje tuꞌn ttzaj jun mya baꞌn tiꞌja ic tzaꞌn jlu. Tuꞌntzunju in xi ksamaꞌne tkanil lu teya.
15 Baꞌn tuꞌn tcuꞌx jyet cyuj ke libro jatum tzꞌiban tcyakil txꞌolbaben cyuꞌn ktzan t-xeꞌchela, ex octzun tcnet tuꞌna aju tzꞌiban tuj libro, cꞌeleltzun tnicꞌa tiꞌj, akeju tnam xjal lu miban che bin ex jawni ke cyiꞌj ke rey ex cyiꞌj ke xjal ateꞌ cyuj mastl tnam. Tuj tyemp ojtxi jaw cyiꞌn cyib tuꞌn cykꞌojin cyiꞌj ke rey, ex tuꞌntzun jlu cub xitun cytanmi.
16 Cyjaꞌtzun in xi kkꞌone tkanil lu teya Tat Rey; ka ma jaw binchaꞌn juntl maj tnam lu ex ka ma jaw binchaꞌn juntl maj muro tiꞌjele, cꞌelel kꞌiꞌn toclena tuꞌn tcawina tuj txꞌotxꞌ tuj telex kꞌij te nima Éufrates, chi tuj uꞌj.
17 Atzunte rey Artajerjes aj tkꞌoꞌn tzakꞌwebl cyjaꞌ:
Aya Rehum aju gobernador, tucꞌix Simsai aju aj tzꞌibal, ex ke mastl cyucꞌile najlke tuj Samaria ex tuj txꞌotxꞌ tuj telex kꞌij te nima Éufrates: In cheꞌx nkꞌolbeꞌne.
18 Aju uꞌj tzaj cysamaꞌne weye ma baj pjuꞌn tiꞌj ex ma jaw schꞌiꞌn nwitze,
19 ex ma txi nkꞌoꞌne orden tuꞌn tcuꞌx jyet ka ax toc jlu. Ax toc ma cnet cypaltil tnam xjal lu. Elaꞌ maj jaw cyiꞌn cyib cyiꞌj ke rey ojtxi, ex bant tiꞌj cyuꞌn tuꞌn cykꞌojin cyiꞌj ke rey cye junjun nasyon,
20 ex e ten junjun rey nimxix cyipumal tuj Jerusalén, cub cyiꞌj ke tnam cyuꞌn, cycubsaꞌn tuj tumlal telex kꞌij te nima Éufrates ex akeju tnam lu o chjet tcyakil txcaj chojenj cyuꞌn cye ke rey te Jerusalén.
21 Jaꞌlotzun cykꞌonxe orden cye ke xinak lu tuꞌn tweꞌ akꞌuntl cyuꞌn, tuꞌn miꞌn tjaw binchet tnam juntl maj; maxi cjawil binchet ocxi t-xi nkꞌoꞌne juntl acꞌaj orden.
22 Miꞌn tzicꞌ tnaꞌl jlu cyuꞌne, tuꞌntzun miꞌn ttzaj jun mya baꞌn tiꞌj ncawbile, chi tuj uꞌj.
23 Tejtzun tpon uꞌj lu tuꞌn Artajerjes, jaw schꞌiꞌn cywitz Rehum, Simsai aju aj tzꞌibal, ex ke mastl cyucꞌil; cycyakiltzun ke e jeꞌx naj tuj Jerusalén ex lajwers e oc ke xjal judiy cyuꞌn tuꞌn t-xi cycolin akꞌuntl. 24 Tuꞌntzun jlu cyaj colin akꞌuntl tiꞌj tja Dios tuꞌn miꞌn tjaw binchet tuj Jerusalén; maxi tuj tcabin abkꞌi ttzyetlen tcawin Darío aju rey cye aj Persia, tzaj cynaꞌntl juntl maj tuꞌn tjaw binchet tja Dios.