Tejtzun toc twukin xjaw tej otok bant cyten aj Israel tujile cytanmi, cycyakil xjal oc cychmon cyib tuj Jerusalén. 2 Ate Jesúa aju tcyꞌajal Josadac, cyucꞌix ke mastl pal akeju tucꞌil, tucꞌix Zorobabel aju tcyꞌajal Salatiel ex ke xjal at cyxilen tucꞌil, e oc ten binchalte altar te Cydios aj Israel, tuꞌntzun cycub patit ke alumaj te chojbil, ic tzaꞌnx in tmaꞌn tley Moisés aju tmajen Dios. 3 Jaw cybinchaꞌn aju altar ax jatum cub ten nej tibaj tkꞌukbil, masque in che xobtok cywitz ke xjal najlke nikayin; tcyakil prim ex tcyakil kale in cub cypatun ke chojbil tibaj altar te nimbil te Kman. 4 Ax icx cub cyicꞌsaꞌn ninkꞌij, tkꞌijlalil tuꞌn cyjaw binchet ke tal ja t-xak tzeꞌyin cywiꞌ, ic tzaꞌn tzꞌiban tuj ley, ex tcyakil kꞌij xi cykꞌoꞌn chojbil ic tzaꞌnx otok kꞌmanjtz cye tuꞌn tbant cyuꞌn, ex ic tzaꞌnx tajlal banimaj tiꞌj tuꞌn t-xi cykꞌoꞌn tuj junjun kꞌij, 5 ax icx xi cykꞌoꞌn ke chojbil in che cub patit tcyakil kꞌij, ex ke oyaj in xi cykꞌoꞌn oc in tzaj queꞌyin juntl acꞌaj xjaw, cyucꞌix ke mastl chojbil in xi cykꞌoꞌn tuj junjun ninkꞌij banimaj tiꞌj, ex ke oyaj tuꞌn cyex cygan in xi cykꞌoꞌn te Kman. 6 Atxix tuj tnejel kꞌij te twukin xjaw tzaj xeꞌt tuꞌn t-xi cykꞌoꞌn chojbil in cub patit te Kman, masque naꞌnxtok tcub keꞌ t-simyentil tja Dios. 7 Xitzun kꞌoꞌn pwak cye albañil ex cye calpinter, ax icx xi kꞌoꞌn wabj, cꞌabj ex chibj aseyt cye aj Tiro ex cye aj Sidón, tuꞌntzun ttzaj cyiꞌn ke tzeꞌ wiꞌten max twi witz Líbano, ex tuꞌn ttzaj cyiꞌn tibaj mar, tuꞌn tpon max tuj tnam Jope, ic tzaꞌnx permis otok kꞌonjtz cye tuꞌn Ciro aju rey cye aj Persia.