—Ma tzꞌel nnicꞌe tiꞌja puro bis taꞌ twitza. ¿Ti nbaj tiꞌja? Porque mya yab taꞌya atlo jun bis tuj tanmiya.

Biꞌx tzaj nim nxobile tuꞌn jlu, 3 ex xi nmaꞌne te:

—Baꞌnwt tzꞌel tkꞌija Tat Rey. ¿Tzaꞌn tten tuꞌn miꞌn nbisune? Porque aju tnam jatum makuꞌn ke ktzan nxeꞌchele o baj xitj ex o che baj tzꞌeꞌy ke tlamel tuꞌn kꞌakꞌ. 4 —¿Ti cbantel wuꞌne tiꞌja? Chi rey tzaj tkanin weye. Atzun weye in oc tene naꞌl Dios aju at tuj cyaꞌj, 5 ex xi nmaꞌne te:

—Tat Rey, ka baꞌn jacu tzꞌela tuj twitza, ex ka ma ncambaye xtalbil teya, chin t-samanxa tuj Judá, tuj tnam jatum makuꞌn ke ktzan nxeꞌchele, tuꞌn tjaw nbinchaꞌne juntl maj tnam.

6 Tzajtzun tkanin rey weye, tucꞌix t-xuꞌjil kꞌukltok ttxlaj:

—¿Jteꞌtzun kꞌij ctela tuj tbeya? ¿Ex jtoj baꞌn tul meltzꞌaja?

Atzun weye xi nmaꞌne tajlal xjaw te, ex cub tuj twitz tuꞌn nxi tzokpiꞌne tuꞌn. 7 Ax icx xi nmaꞌne te: Ka baꞌn tuj twitza, kꞌontza jun uꞌj tuꞌn t-xi nyecꞌune cye ke gobernador ateꞌ tiꞌjxi nima Éufrates tuj telex kꞌij, tuꞌntzun wex tzokpiꞌne cyuꞌn tuꞌn npone max tuj Judá; 8 ax icx tuꞌn ttzaj tkꞌoꞌna juntl uꞌj weye tuꞌn t-xi nyecꞌune te Asaf aju toc tuꞌna te cwentil tkan ttzeꞌya, tuꞌntzun cytzaj tkꞌoꞌn ke tzeꞌ weye, tuꞌn cybant ke tlamel cwartel ttxlaj tja Dios, ax icx ke tlamel muro toc tiꞌjele tnam, ex tuꞌn tajben tiꞌj njaye jatum tuꞌn ntene, nchiye te. Ex tzaj tkꞌoꞌn rey tcyakil jlu weye, nok tuꞌnju onbil tuꞌn Dios. 9 Ax icx tzaj t-samaꞌn rey jun cꞌloj soldad cyjax cyibaj chej, wabalte weye, cyucꞌix ke nejenel cye. Tejtzun npone cywitz ke gobernador ateꞌ tiꞌjxi nima Éufrates tuj telex kꞌij, xi nkꞌoꞌne ke uꞌj cye, akeju otok tzaj tkꞌoꞌn rey weye. 10 Pero tej cybinte Sanbalat aju aj Horón, ex Tobías aju aj sanjelal ex aj Amón, mintiꞌ e tzalaj, tuꞌnju otok pon jun xjal nim tbis tcꞌuꞌj tuꞌn tonin cyiꞌj aj Israel.

11 In pontzune tuj Jerusalén, ex tuj toxin kꞌij nponlene ma chixin, 12 in jaw weꞌye te konicꞌan cyucꞌix junjun xinak wucꞌile, ex mintiꞌ xi nmaꞌne te jun xjal aju otok tzaj tyecꞌun Dios weye tuꞌn nbinchanteye tiꞌj tnam Jerusalén. Mintiꞌ mastl chej kꞌiꞌn wuꞌne, oꞌcxju atinjxi tibaj. 13 Tujx konicꞌan lu in exe ttzi tpwertil tnam, Chkꞌajlaj tbi, tlugaril jun xoch Dragón tbi, in pone ttzi tpwertil tnam jatum nneꞌx chitet tzꞌis, ex baj nqueꞌyine muro toc tiꞌjele tnam Jerusalén otok cub xitj, ex ke tpwertil tnam otok che baj tzꞌeꞌy tuꞌn kꞌakꞌ. 14 Inx bet chꞌintle tuꞌn npone ttzi tpwertil tnam jatum taꞌ jun twi aꞌ, ex in pontle jatum taꞌ nintz pil te Rey; pero mintiꞌ bant tuꞌn ticꞌx ncheje tuj lugar lu. 15 Atxtok taj tuꞌn tcub kꞌij, tkanx in jaxe ttziꞌyile tkꞌab xak; tejtzun tbaj nqueꞌyine muro tiꞌjele tnam in ajtztzune, ax in octze ttzi tpwertil tnam, Chkꞌajlaj tbi.

16 Mintiꞌtok biꞌn cyuꞌn ke cawil jatum otok chinx aje ex ti nbaj weye. Ex naꞌnxtok txi nmaꞌne cye xjal Judiy, mi cye ke pal, mi cye ke xjal maꞌ cyoclen, mi cye ke cawil ex mi cye mastl xjal at cyoclen tuꞌn tbinchet akꞌuntl. 17 Cyjaꞌtzun xi nmaꞌne cye:

—Baꞌn cyuꞌne puro bis atoꞌ, porque aju ktanmi Jerusalén o baj xitj ex ke tpwertil o che baj tzꞌeꞌy. E tmojeꞌ kyol ex kbinchan jaw juntl maj aju muro toc tiꞌjele Jerusalén, tuꞌntzun miꞌn cucx cyxmayin xjal kiꞌj.

18 Tejtzun t-xi ntxꞌolbaꞌne cye tiꞌj t-xtalbil Dios otok ncꞌame ex tiꞌj ju yol otok tzaj tmaꞌn rey weye, atzun cye tzaj cytzakꞌweꞌn:

—E ttzyet akꞌuntl kuꞌn tuꞌn tjaw binchet juntl maj muro.

Ex tzyettzun akꞌuntl cyuꞌn. 19 Pero tej tbinte Sanbalat aju aj Horón, tucꞌix Tobías aju aj sanjelal ex aj Amón, ex Gesem aju aj Arabia, e oc ten xmayil kiꞌje ex tzaj cymaꞌn keye tucꞌil icꞌbil cyjaꞌ:

—¿Ti nbaj cyeye? ¿Maj cyaje tuꞌn cyoc tzokpaje kꞌojlel tiꞌj rey?

20 Atzun weye xi nmaꞌne cye:

—Ate Dios aju at tuj cyaꞌj tzul onil keye tuꞌn tel kakꞌunbene baꞌn. Keye tmajen Dios koꞌye, ctzyetel akꞌuntl kuꞌne tuꞌn tjaw binchet juntl maj tnam, atzun cyeye mintiꞌ cyoclene tiꞌj tnam Jerusalén tuꞌnju mya Judiy keye.