Xi kꞌmaꞌn alcye akꞌuntl tuꞌn tbant cyuꞌn junjun cꞌloj xjal
3
Atzunte Eliasib aju tnejel pal, cyucꞌix mastl pal, jaw cybinchaꞌntl tpwertil tnam toc tbi Pwert cye Ẍneꞌl. Cub cyicꞌsaꞌn tkꞌijlalil tuꞌn tajben, oc cykꞌoꞌn tpwertil ex jaw cybinchaꞌn juntl maj jun piẍ muro, xiꞌx keꞌ cyuꞌn jatum taꞌ ja maꞌ twaꞌl Hamea tbi ex pon baj jatum taꞌ juntl ja maꞌ twaꞌl Hananeel tbi. 2 Atzun juntl piẍ muro jaw cybinchaꞌn ke xinak aj Jericó, ex atzun juntl piẍ jaw tbinchaꞌn Zacur aju tcyꞌajal Imri. 3 Ke tiyjil Senaa jaw cybinchaꞌn Pwert cye Cyiẍ tbi; jax cykꞌoꞌn tmarquil ex oc cykꞌoꞌn tpwertil cyucꞌix ke matij pasador tiꞌj, tucꞌil cabe t-ẍcyin tuꞌn cycuꞌx ten ke pasador cyuj. 4 Atzun juntl piẍ muro jaw tbinchaꞌn Meremot aju tcyꞌajal Urías ex tal tchman Cos; atzun juntl piẍ jaw tbinchaꞌn Mesulam aju tcyꞌajal Berequías ex tal tchman Mesezabeel; atzun juntl piẍ jaw tbinchaꞌn Sadoc aju tcyꞌajal Baana. 5 Atzun juntl piẍ muro jaw cybinchaꞌn ke xjal aj Tecoa, masque mintiꞌ o cyajbe ke xinak maꞌ cyoclen tuꞌn cyonin cyiꞌj ke nejenel tiꞌj akꞌuntl. 6 Atzunte Joiada aju tcyꞌajal Paseah, tucꞌix Mesulam aju tcyꞌajal Besodías, jaw cybinchaꞌn aju pwert toc tbi Jesana. Jax cykꞌoꞌn tmarquil ex oc cykꞌoꞌn tpwertil cyucꞌix ke pasador tiꞌj, tucꞌil cabe t-ẍcyin tuꞌn cycuꞌx ten ke pasador cyuj. 7 Atzun juntl piẍ muro jaw tbinchaꞌn Melatías aju aj Gabaón tucꞌix Jadón aju aj Merenot ex ke xjal aj Gabaón ex aj Mizpa. Ke lugar lu ateꞌtok tjakꞌ tcawbil gobernador tuj tumlal tjawitz kꞌij te nima Éufrates. 8 Atzun juntl piẍ muro jaw tbinchaꞌn Uziel aju tcyꞌajal Harhaía aju txꞌinol sak pwak, atzun juntl piẍ jaw tbinchaꞌn Hananías aju binchal perjum; tuꞌn cycabil jaw cybinchaꞌn jun piẍ muro tiꞌj Jerusalén max pon baj jatum taꞌ ju muro maꞌ twitz. 9 Atzun juntl piẍ muro jaw tbinchaꞌn Refaías aju tcyꞌajal Hur, aju toc te ajcal tuj mij txꞌotxꞌ Jerusalén. 10 Atzun juntl piẍ jaw tbinchaꞌn Jedaías aju tcyꞌajal Harumaf, aju muro lu tcubsaꞌn tumlal twitz tja Jedaías, atzun juntl piẍ jaw tbinchaꞌn Hatús aju tcyꞌajal Hasabnías.11 Ate Malquías aju tcyꞌajal Harim, tucꞌix Hasub aju tcyꞌajal Pahat-moab, jaw cybinchaꞌn juntl piẍ muro tucꞌix ju ja maꞌ twaꞌl, Ja cye Jorni tbi. 12 Atzun juntl piẍ muro jaw tbinchaꞌn Salum cyucꞌix ke tmeꞌjel; ate Salum tcyꞌajal Halohes, aju toc te ajcal te mijtl txꞌotxꞌ Jerusalén. 13 Ate Hanún ex ke xjal najlke tuj Zanoa jaw cybinchaꞌn aju pwert toc tbi Chkꞌajlaj; ex oc cykꞌoꞌn tpwertil cyucꞌix ke pasador matij, cyucꞌix cabe t-ẍcyin tuꞌn cycuꞌx ten ke pasador cyuj; winkin ech tnukbil muro jaw cybinchaꞌn, ex pon baj cyuꞌn max ttzi tpwertil tnam jatum nneꞌx chitet tzꞌis. 14 Ate Malquías aju tcyꞌajal Recab, aju toctok te gobernador tuj txꞌotxꞌ Bet-haquerem, jaw tbinchaꞌn ju pwert jatum nneꞌx chitet tzꞌis, oc tkꞌoꞌn tpwertil cyucꞌix ke pasador matij, tucꞌil cabe t-ẍcyin tuꞌn cycuꞌx ten pasador cyuj.
15 Ate Salum aju tcyꞌajal Colhoze, aju toctok te gobernador tuj txꞌotxꞌ Mizpa, jaw tbinchaꞌn aju pwert toc tbi Pwert Twi Aꞌ, jax tkꞌoꞌn twiꞌ ex oc tkꞌoꞌn tpwertil cyucꞌix ke pasador tiꞌj, tucꞌil cabe t-ẍcyin tuꞌn cycuꞌx ten ke pasador cyuj, ex jaw tbinchaꞌn jun piẍ muro, tzaj keꞌ tuꞌn jatum tcubsaꞌn nintz pil Siloé tbi, aju tcub junx tucꞌil tkan tawal rey, ex pon baj jatum in che cubil ke grad te tnam toc tbi Ttanmi David. 16 Ate Nehemías aju tcyꞌajal Azbuc, aju toctok te gobernador te mij txꞌotxꞌ Bet-sur, jaw tbinchaꞌn juntl piẍ muro, pon baj tuꞌn tumlal twitz tpantyón rey David jatum tcubsaꞌn pil te chembil aꞌ ex max jatum tcubsaꞌn cyja soldad.
17 Atzun juntl piẍ muro jaw cybinchaꞌn aj Leví; ate Rehum aju tcyꞌajal Bani nejenel cyxol; atzun juntl piẍ muro jaw tbinchaꞌn Hasabías aju toctok te gobernador tuj mij txꞌotxꞌ Keila, cyucꞌix ke xjal ateꞌtok tjakꞌ tcawbil. 18 Atzun juntl piẍ muro jaw cybinchaꞌn ke tucꞌil: Ate Bavai tcyꞌajal Henadad nejenel cyxol, ex toctok te gobernador tuj mijtl txꞌotxꞌ Keila. 19 Ate Ezer aju tcyꞌajal Jesúa aju toctok te gobernador tuj Mizpa, jaw tbinchaꞌn juntl piẍ muro tumlal twitz ja te cꞌubl ke ubl, ex pon baj jatum in pon baj arba muro. 20 Atzun juntl piẍ muro jaw tbinchaꞌn Baruc aju tcyꞌajal Zabai tucꞌil tcyakil tanmi, xi keꞌ tuꞌn t-squinil muro ex pon baj tumlal twitz tja Eliasib aju tnejel pal. 21 Ex ate Meremot aju tcyꞌajal Urías ex tal tchman Cos, jaw tbinchaꞌn juntl piẍ muro, xiꞌx keꞌ tuꞌn tumlal ttzi tja Eliasib ex pon baj jatum ponin baj tja Eliasib.
22 Atzun juntl piẍ muro jaw cybinchaꞌn ke pal najlke tuj chkꞌajlaj. 23 Atzunte Benjamín tucꞌix Hasub jaw cybinchaꞌn juntl piẍ muro tcubsaꞌn tumlal twitz cyja. Ax icx te Azarías aju tcyꞌajal Maasías ex tal tchman Ananías, jaw tbinchaꞌn ju muro tcubsaꞌn tumlal twitz tja. 24 Atzun juntl piẍ muro jaw tbinchaꞌn Binúi aju tcyꞌajal Henadad, xiꞌx keꞌ tuꞌn jatum taꞌ tja Azarías ex pon baj max tuj t-squinil muro. 25 Atzun juntl piẍ muro jaw tbinchaꞌn Palal aju tcyꞌajal Uzai, xiꞌx keꞌ tuꞌn max tuj t-scyinil muro jatum tcubsaꞌn ja maꞌ twaꞌl, aju tcubsaꞌn mas nikayin ttxlaj tja rey ttxaꞌn peꞌn te pres. Atzun juntl piẍ muro jaw tbinchaꞌn Pedaías aju tcyꞌajal Faros. 26 Atzun ke ajbel tuj tja Dios, akeju najlke tuj Ofel, jaw cybinchaꞌn juntl piẍ muro tumlal Pwert te Aꞌ tuj tjawitz kꞌij, ex pon baj twitz ja maꞌ twaꞌl ex maꞌ twitz. 27 Ke aj Tecoa jaw cybinchaꞌn juntl piẍ muro, xiꞌx keꞌ cyuꞌn tumlal ja maꞌ twaꞌl ex maꞌ twitz ex pon baj cyuꞌn max jatum taꞌ muro Ofel tbi.
28 Teyle junjun pal jaw tbinchaꞌn muro tcubsaꞌn tumlal twitz tja, xiꞌx keꞌ cyuꞌn ttzi pwert toc tbi Pwert cye Cabay. 29 Ate Sadoc aju tcyꞌajal Imer jaw tbinchaꞌn juntl piẍ muro tcubsaꞌn tumlal twitz tja; atzun juntl piẍ jaw tbinchaꞌn Semaías aju tcyajal Secanías, aju xkꞌukil ttzi pwert tcubsaꞌn tuj tumlal tjawitz kꞌij. 30 Atzun juntl piẍ muro jaw tbinchaꞌn Hananías aju tcyꞌajal Selamías tucꞌix Hanún aju tkakin tcyꞌajal Salaf. Atzunte Mesulam aju tcyꞌajal Berequías jaw tbinchaꞌn juntl piẍ muro tcubsaꞌn tumlal twitz tja. 31 Ate Malquías aju txꞌinol sak pwak jaw tbinchaꞌn juntl piẍ muro jatum taꞌ cyja ke ajbel tuj tja Dios ex jatum najl ke comersyant, aju tcubsaꞌn tumlal pwert jatum in pon cychmon cyib xjal tuꞌn cyex tuj kꞌoj, ex pon baj tuꞌn max jatum tcubsaꞌn ja te xkꞌukbil tuj t-scyinil muro. 32 Ke txꞌinol sak pwak ex ke comersyant jaw cybinchaꞌn juntl piẍ muro, xiꞌx keꞌ cyuꞌn max jatum tcubsaꞌn ja maꞌ twaꞌl tuj t-scyinil muro ex pon baj cyuꞌn max jatum taꞌ pwert aju toc tbi Pwert cye Ẍneꞌl.