Xmaybil cyuꞌn aj kꞌoj
4
Tej tbinte Sanbalat in ko binchantoke juntl maj muro tiꞌjele tnam, tzaj nim tkꞌoj ex ttxꞌuꞌjil ex oc ten xmayil cyiꞌj ke xjal Judiy, 2 ex xi tmaꞌn cye ke tucꞌil ex cye ke soldad te Samaria cyjaꞌ: ¿Ti nbaj cye ke txunyab Judiy? ¿Che chipetzun ka cxel kꞌot ambil cye tuꞌn t-xi cykꞌoꞌn chojbil te Cydios juntl maj? ¿Ex baka tuj junx kꞌij cbantel akꞌuntl cyuꞌn? ¿Baka tiꞌj cytzaꞌjil abj o che baj tzꞌeꞌy che bantel juntl maj ke abj cyuꞌn? Chi Sanbalat.3 Waꞌltok Tobías aju aj Amón ttxlaj Sanbalat ex xi tmaꞌn ju yol lu: Aju muro niban tjaw cybinchaꞌn juntl maj, ka ma jax jun wech twiꞌ, biꞌxlo jacu cub xitj tjakꞌ.
Aju tnaꞌj Dios Nehemías
4 In octzun tene naꞌl Dios ex xi nmaꞌne cyjaꞌ: Kman Dios: Bintza aju cyxmaybil xjal kiꞌje. Binchama ax tuꞌn tcub tzꞌak cyxmaybil cyibaj; cuchiwt che cub tzꞌak tuj cykꞌab aj kꞌoj cyiꞌj, ex baꞌnwt cyxi kꞌiꞌn pres tuj juntl tnam. 5 Miꞌn cub tnajsaꞌna cybinchben mya baꞌn ex miꞌn cub tnajsaꞌna cyil; tuꞌnju ma che oc ten icꞌlelte cye keju in che akꞌnan tuꞌn tjaw binchet juntl maj muro tiꞌjele tnam.
Aju xobtzabl cyuꞌn aj kꞌoj
6 Lajoꞌnxtok akꞌuntl kuꞌne tuꞌn tjaw binchet juntl maj muro tiꞌjele tnam, ex otok mijin muro tuꞌn tbinchet, porque ake xjal nim cygan tuꞌn cyakꞌnan. 7 Pero tej cybinte Sanbalat, Tobías, ke aj Arabia, ke aj Amón ex ke aj Asdod, ka cucxtok toc akꞌuntl tiꞌj muro tiꞌjele tnam, ex chꞌixtok cybaj maket ke toyꞌ muro jatum baꞌn tuꞌn cyocx xjal tujxi tnam Jerusalén, tzaj nimxix cykꞌoj, 8 ex cycyakil ke jlu mojeꞌ cyyol tuꞌn cyoc tzokpaj kꞌojlel tiꞌj tnam Jerusalén ex tuꞌn ttzpet knable cyuꞌn. 9 Atzun keye o oc tene naꞌl Dios ex e cub kkꞌoꞌne ke xkꞌukil tuꞌn cycwentin kꞌijl ex konicꞌan, tuꞌntzun kclete tuj cykꞌab aj kꞌoj. 10 Atzun cye aj Judá o cymaꞌ: Chꞌix tbaj cyipun keju in che ikan tuꞌnju nimxix ttxꞌakan abj; ax icx keye mlay ko xcyeꞌye tiꞌj tuꞌn tjaw kbinchaꞌne juntl maj muro tiꞌjele tnam.
11 Ex in cymaꞌntok aj kꞌoj kiꞌje cyjaꞌ: Nok minaben e koc tzokpaj cyiꞌj tuꞌn cycub kuꞌn, tuꞌntzun tweꞌ akꞌuntl. 12 Pero ke xjal Judiy, akeju najlke nikayin cytxlaj aj kꞌoj kiꞌje, elaꞌ maj e ul kꞌmalte keye ka at cyoquel tzokpaj aj kꞌoj kiꞌje tuj tcyakil pacꞌ. 13 Xitzun nmaꞌne cye cycyakil cꞌloj xjal judiy at cyxilen cyxolx, tuꞌn cycub ten tiꞌjxi muro te tnam, t-xeꞌyile muro ex cyuj ke lugar naꞌnxtok cybaj maket, ex tuꞌn t-xi cyiꞌn cyspad, cylans, ex cyxobl plech. 14 Tej tel nnicꞌe tiꞌj ka in che xobtok, in cub weꞌye ex xi nmaꞌne cye ke xjal maꞌ cyoclen, cye ke cawil ex cye mastl xjal: Miꞌn che xobe cywitz aj kꞌoj. Cynaꞌntze, ate Kman at nimxix tipumal ex xobajilxix. Cykꞌonc cyipune tuꞌn cycolpet ke cyxjalile, ke cycyꞌajale, ke cymeꞌjele, ke cyxuꞌjile ex ke cyjaye, nchiye cye.
15 Tejtzun cybinte ke aj kꞌoj kiꞌje ka otok tzꞌel knicꞌe tiꞌj cyximbetz ex otok baj tzpet cyximbetz tuꞌn Dios, kcyakiltzune o akꞌnane juntl maj tuꞌn tjaw binchet muro, ex teylex te junjun oc ten akꞌnal tiꞌj ttarey. 16 Tujxtzun kꞌij lu, mijcu xinak akeju ateꞌ wucꞌile e akꞌnan tiꞌj akꞌuntl, atzun mijtl list e cub ten tucꞌil cylans, cymakbil in che ajben tuj kꞌoj, cyxobl plech ex cychicyet cꞌuxbil. Ke nejenel xi cycyuwsaꞌn cye ke xjal aj Judá tuꞌn tten cyipun. 17 Ke xjal in che akꞌnan tiꞌj muro ex ke ikal iktz cucx e ikan, pero tuꞌn junx cykꞌab e akꞌnan, atzun juntl cykꞌab kꞌiꞌn spad tuꞌn. 18 Cycyakil keju in che akꞌnan, toclex cyspad cycꞌuꞌj, atzunju kꞌajtzal chun ax waꞌl cub ntxlaje. 19 Otok txi nmaꞌne cye keju maꞌ cyoclen ex cye ke cawil ex cye mastl xjal cyjaꞌ: Aju akꞌuntl lu maꞌxix ex najchak poninbaj, atzun ke kpaꞌn kib tuj cꞌlojin najchak kxol, 20 cyjaꞌtzun, oc cybinteye jatum oc tkꞌajt chun, jurat che tzaje kucꞌile tuꞌn kten junx, ex ate Kdios cꞌonil kiꞌj tuꞌn tcub cyiꞌj aj kꞌoj kuꞌn, nchiye cye.
21 Atzun jlu bant kuꞌne tej kakꞌnane, in tzyet kuꞌne oc ttzaj t-xe cyaꞌj ex in weꞌ ocxi ttzaj klolj, ex mij xjal kꞌiꞌn lans cyuꞌn tuj cykꞌab. 22 Ax icx xi nmaꞌne cye xjal cyjaꞌ: Teyle junjun xinak tuꞌn tcyaj ten te konicꞌan tuj Jerusalén junx tucꞌil ju onil te, tuꞌntzun cyxkꞌukin te konicꞌan, ex tuꞌn cyakꞌnan kꞌijl. 23 Akine ex ke xjal at nxilene cyucꞌil, ke onil, ex ke soldad ucꞌin wuꞌne, mintiꞌ el kiꞌne kxbalune, nok oꞌcx oc kxiꞌye chil, ex teylex te junjun kꞌiꞌn tlans tuj tkꞌab.