Tzaj mya baꞌn cyxol xjal Judiy
5
Tuj tkꞌijlalil lu tzaj jun yol cyuꞌn ke xinak ex cyuꞌn ke cyxuꞌjil cyiꞌjx cyxjalil ax Judiy ke. 2 At junjun in cymaꞌn cyjaꞌ: At nimcu kcyꞌajale ex kmeꞌjele ex kaje tuꞌn ttzaj kꞌoꞌn chꞌin triw te kwaye tuꞌntzun miꞌn kcyime tuꞌn weꞌyaj; 3 atzun txkantl in cymaꞌn: Ma txi kkꞌoꞌne ktxꞌotxꞌe, tkan k-uvaye ex kjaye te prent nok tuꞌn tlakꞌet kwaye tuꞌn tlaj weꞌyaj, 4 ex at junjuntl in cymaꞌn: Ma tzꞌel kchꞌexoꞌne pwak tuꞌn tchjet chojenj kuꞌne, aju nneꞌl tkanin rey tiꞌj ktxꞌotxꞌe ex tiꞌj tkan k-uvaye. 5 Tzaꞌnx ke kxjalile ax icx keye junx kiyjile; ke kcꞌwaꞌle junx taꞌ cyoclen cyucꞌil ke cye cycꞌwaꞌl. Pero masque icju, il tiꞌj tuꞌn t-xi kkꞌoꞌne kcyꞌajale ex kmeꞌjele tuꞌn cyoc te majen. Ex at junjun kmeꞌjele ateꞌ naj te majen, ex mlayx bant tuꞌn tmayet jlu kuꞌne, porque ma cyaj ten ktxꞌotxꞌe ex tkan k-uvaye tuj tcwent juntl, che chi.6 Tejtzun nbinteye aju in baj cyiꞌj, tzaj nimxix nkꞌoje. 7 Te tibajxi, tej tbaj nximane tiꞌj, e jeꞌx ncawine ke xjal Judiy, akeju kꞌinun ex aj sanjelal at cyoclen tuꞌn gobierni, ex xi nmaꞌne cye: ¿Tikuꞌn nneꞌl cykanine taꞌl chꞌex pwak cye cyxjalile? Extzun jun tkanil wuꞌne tuꞌn cytzaj baj cycyakil xjal tuꞌn tbant tiꞌj jlu, 8 ex xi nmaꞌne cye: Keye nicꞌpunlo ma bant kuꞌne tuꞌn cyclet ke kxjalil, akeju otok cheꞌx cꞌayin cyuj ke nasyon jatum ateꞌ ke xjal mya nimal Dios ke, atzun cyeye jaꞌlo mintiꞌ in xi cykꞌoꞌne triw te cywa cyxjalile ka mintiꞌ ma tzaj cycꞌayin cycꞌwaꞌl te cymajene. Entons il tiꞌj tuꞌn kxiꞌye juntl maj colpil cye.
Atzun cye mintiꞌ e kꞌajt, tuꞌnju mintiꞌ tumel tuꞌn tmojtzet yol cyuꞌn. 9 Ex xi nmaꞌntle cye: Mya baꞌn aju in cybinchaꞌne. ¿Myapelo mas baꞌn tuꞌn cyxobe twitz Kman, tuꞌntzun miꞌn cyxmayin xjal kiꞌj, akeju mya nimal Dios ke, akeju aj kꞌoj kiꞌj? 10 Ax icx weye cyucꞌix keju at nxilene cyucꞌil ex keju onil weye o txi kkꞌoꞌne pwak ex triw te cychꞌex, pero baꞌn tuꞌn tcub knajsaꞌn cycꞌas. 11 Ax icx baꞌn tuꞌn taj cykꞌoꞌne cytxꞌotxꞌ biꞌx jaꞌlo, tucꞌix tkan cy-uva, tkan cy-olivo ex cyja, ex baꞌn tuꞌn tcub cynajsaꞌne cycꞌas, ka pwak, ka twitz awal, ka vin ex ka chibj aseyt, nchiye, xi nmaꞌne cye. 12 Atzun cye tzaj cytzakꞌweꞌn: Jacu tzꞌaj kkꞌoꞌne tcyakil jlu ex mlay txi kkanintle cycꞌas at kucꞌile. Cbantel kuꞌne tcyakil ic tzaꞌnx ma tzaj tmaꞌna keye, che chi.
E tzaj ntxcoꞌne ke pal, ex cywitztzun xi nmaꞌne tuꞌn t-xi cytziyan jun yol axix toc tuꞌn tbant cyuꞌn aju otok cyma. 13 Ax icx el nchitoꞌne tiꞌj nxbalune ex xi nmaꞌne cyjaꞌ: Ictzun cꞌelex tchitoꞌn Dios ke xjal tuj cyja ex tuj cytxꞌotxꞌ, akeju mintiꞌ ma japun yol lu cyuꞌn aju ma txi cytziyan, ex cyjaꞌtzun cꞌelel tiꞌn Dios tcyakilju at cye, nchiye, xi nmaꞌne. Cycyakil xjal tzaj cytzakꞌweꞌn: Bant-xwit icju; jawtzun cynimsaꞌn tbi Kman ex o japun cyuꞌn tcyakilju yol otok txi cytziyan.
Aju xtalbil tbincha Nehemías
14 Ax icx tej woc kꞌoꞌne te gobernador tuj Judá tuꞌn rey Artajerjes, tzyet wuꞌne tej otok bant winkin abkꞌi ttzyetlen tcawin rey ex pon baj tuj 32 abkꞌi te tcawbil, ex tuj cablaj abkꞌi lu, mi akine mi keju onil ateꞌ wucꞌile, mintiꞌ tzaj kcꞌmoꞌne twi kcꞌuꞌje ex mi jun onbil cyuꞌn xjal aj Judá. 15 Atzun ke gobernador e ten tej naꞌnxtok wule, e oc te iktz cye tnam xjal, porque nneꞌl cypeꞌyin xjal 40 sak pwak tuꞌn tajben te twi cywa ex te twi cycꞌa vin, ex ax ke cymajen gobernador e oc ten yajlal cye tnam xjal. Atzun weye mintiꞌ bant wuꞌne icju, tuꞌnju in chin xobe twitz Dios. 16 Ax icx weye ma jaw nbinchaꞌne jun piẍ muro tiꞌj tnam, ax icx cycyakil aj sanjelal ateꞌ ntxlaje ma che akꞌnan tiꞌj akꞌuntl lu ex mintiꞌ ma cub ketzane jun piẍ txꞌotxꞌ. 17 In che cub keꞌ 150 xjal waꞌl tiꞌj nmese; at Judiy ex at maꞌ cyoclen tuj tcawbil gobierni, ex mintiꞌ in che oc te tajlal akeju in che tzaj tuj juntl nasyon visitarilte keye. 18 Ex aju in bant wuꞌne tcyakil kꞌij tuj wexe ncwent, atzun jlu: Ncub byet jun wacẍ, kak ẍneꞌl tbanilxix ex nim ecꞌ; ex tuj lajchak kꞌij in xi nmaꞌne tuꞌn tul kꞌiꞌn nim taꞌl twitz uva te kcꞌaye. Masque icju, mintiꞌ xi nkanine twi ncꞌuꞌje, aju at woclene tiꞌj tuꞌnju gobernador kine, porque nimxix talil iktz tcubtok cyibaj tnam xjal lu. 19 Nman Dios, naꞌntza tcyakil aju baꞌn ma nbinchaye tiꞌj tnam lu, ex kꞌontza tcyꞌiwbila wibaje.