Cub cyximan jun cꞌloj xjal tuꞌn cyoc tzokpaj tiꞌj Nehemías
6
Tejtzun cybinte Sanbalat, Tobías, Gesem aju aj Arabia, ex mastl aj kꞌoj kiꞌje, ka otok jaw nbinchaꞌntle muro ex otok makset tcyakil jatum baꞌn tuꞌn cyoctz aj kꞌoj, (oꞌcxcu ke pwert naꞌnxtok cyoc baj nkꞌoꞌne), 2 ul cysamaꞌn Sanbalat ex Gesem jun tkanil wucꞌile tuꞌn tpon kchmon kibe cyucꞌil tuj jun aldey tuj chkꞌajlaj Ono tbi. Pero aju mer cyximbetz tuꞌn cybinchante mya baꞌn wiꞌje. 3 E jeꞌxtzun nsamaꞌne ke sanjel kꞌmalte cye cyjaꞌ: Mintiꞌ ambil wiꞌje ex at nim wakꞌune ilxix tiꞌj tuꞌn tbant, cyjaꞌtzun mlay chinxe; jacu weꞌ akꞌuntl ka ma chinxe jatum in cymaꞌne tuꞌn npone, nchiye cye. 4 Cyaje maj ul cysamaꞌn ax tkanil lu wucꞌile, pero ax tzakꞌwebl aj nkꞌoꞌne ic tzaꞌnx otok txi nmaꞌne nej.5 Ul t-samaꞌn Sanbalat tjweꞌyin maj jun tmajen kꞌolte ax tkanil lu tzꞌiban tuj jun uꞌj jakoꞌmaj. 6 Chi in tmaꞌn tuj uꞌj cyjaꞌ: In bet tkanil cyxol mastl nasyon, ax icx in tmaꞌn Gesem ka ax toc, ka aya ex ke xjal Judiy in che ximane tiꞌj tuꞌn tjaw cyiꞌn cyibe tiꞌj rey ex tuꞌntzunju ma jaw cybinchaꞌne muro tiꞌjele tnam, ax icx in cymaꞌn ka aya taja tuꞌn toca te rey, 7 ex ma tzꞌoc tkꞌoꞌna cyoclen ke t-sanjel Dios tuꞌn t-xi cymaꞌn cye xjal aj Jerusalén ka at rey tuj Judá. Mya yajcu binjtz tkanil lu tuꞌn rey Artajerjes, cyjaꞌtzun baꞌn tuꞌn ttzaja tuꞌn kyolin oꞌcx ke, chi Sanbalat tuj uꞌj.
8 Atzun weye aj nsamaꞌne tzakꞌwebl ex xi nmaꞌne te ka mya ax toc aju in tmaꞌn, ex ka nok tuꞌnx otok jaw jlet jlu tuj tnabl. 9 Atzun cye o che jyon tumel tuꞌn koc secꞌpuꞌne cyuꞌn; tuj cyximbetz ka tuꞌn ttzaj baj kcꞌuꞌje, tuꞌntzun miꞌn tpon baj akꞌuntl kuꞌne, atzun weye xi nmaꞌne te Dios cyjaꞌ: Nman Dios, chin tonintza tuꞌn tpon baj akꞌuntl wuꞌne. 10 Te tibajxi inxe tja Semaías aju tcyꞌajal Delaía ex tal tchman Mehetabel; otok tzꞌocx tlamon tib tuj tja ex tzaj tmaꞌn weye: Ko ocx tuj tja Dios ex che eletz klamoꞌn ke pwert, porque tuj akꞌbil lu che ul xjal byolte teya. 11 Atzun weye xi ntzakꞌweꞌne: ¿Baꞌnpe tuꞌn tel ok jun xinak ic tzaꞌn kine tuꞌn tocx tclon tib tuj tja Dios tuꞌn miꞌn tcub byoꞌn? Mlay chinx oke tuj tja Dios, nchiye te.
12 Ax icx el nnicꞌe tiꞌj, mya tuꞌn Dios otok tzaj kꞌmaꞌn ju yol lu te; tzaj tmaꞌn icju porque otok tcꞌam pwak tuꞌn Sanbalat ex Tobías; 13 xi cykꞌoꞌn xjal pwak lu te, tuꞌntzun woc xobtzane cyuꞌn ex tuꞌn nbinchane il twitz Dios. Nokwit o nbinchaye icju, owtlo che yolin mya baꞌn wiꞌje ex owtlo chin ele tuj nchꞌixwiye cyuꞌn. 14 Nman Dios: Naꞌntza aju ma cybincha Sanbalat ex Tobías. Ax icx miꞌn tzicꞌ tnaꞌl tuꞌna aju ma tbincha Noadías wiꞌje, aju xuꞌj oc tkꞌon tib te t-sanjela, ex ke mastl xjal oc cykꞌon cyib te t-sanjela, akeju o cyajbe tuꞌn ttzaj baj ncꞌuꞌje cyuꞌn.
15 Baj bant muro tuj 25 tajlal xjaw Elul tbi, ex 52 kꞌij xi tiꞌn tuꞌn tbaj bant. 16 Tej cybinte aj kꞌoj kiꞌje, ex ke xjal ateꞌ cyuj ke nasyon ateꞌ kiꞌjele ka otok baj bant muro kuꞌne, tzaj nim cyxobil ex biꞌx naj cynimbil cyib, porque el cynicꞌ tiꞌj ka aju akꞌuntl lu otok bant nok tuꞌnju onbil tuꞌn Dios.
17 Tuj enter 52 kꞌij lu, nim uꞌj ul t-samaꞌn Tobías cyucꞌil xjal Judiy maꞌ cyoclen, ax icx ke xjal Judiy xi cysamaꞌn elaꞌ uꞌj tucꞌil Tobías, 18 porque nim xjal Judiy otok mojeꞌ cyyol tucꞌil Tobías, porque ate Tobías otok tzꞌoc te tjiꞌ Secanías aju tcyꞌajal Ara, ex aju tcyꞌajal Tobías, aju Johanán tbi, otok mojeꞌ tucꞌil tmeꞌjel Mesulam aju tcyꞌajal Berequías. 19 Cucx in che pon aj xjal kꞌmalte weye ka baꞌn tmod Tobías, ax icx in cheꞌx aj kꞌmalte tucꞌil Tobías aju in chin yoline tiꞌj. Atzunte Tobías nim uꞌj ul t-samaꞌn wucꞌile tuꞌn ttzaj baj ncꞌuꞌje tuꞌn.