5 Toctok Joacim twiꞌ 25 abkꞌi tej toc te rey ex o cawin junlaj abkꞌi tuj Jerusalén, pero mya baꞌn e ela ke tbinchben tuj twitz Kman aju Tdios. 6 Atzunte Nabucodonosor aju rey te Babilonia tzaj kꞌojlel tiꞌj, ex baj tcꞌaloꞌn tuꞌn caden kꞌan cꞌuxbil ex xi tiꞌn tuj Babilonia. 7 Ax icx xi tiꞌn Nabucodonosor txkan macbil ateꞌ tuj tja Kman, pon tiꞌn tuj Babilonia ex e ocx tkꞌoꞌn tuj tja tdios at tuj Babilonia.

8 Aju chꞌintl txꞌolbaben tiꞌj Joacim ex ke tbinchben mya baꞌn ex aju baj tiꞌj, atzun tzꞌiban tuj uꞌj jatum taꞌ tcyakil txꞌolbaben cyiꞌj ke rey cye aj Israel ex ke rey cye aj Judá. Ex aju o cawin te t-xel, atzun Joaquín aju tcyꞌajal.

9 Toctok Joaquín twiꞌ wajxaklaj abkꞌi tej ttzyet tcawin ex o cawin ox xjaw tucꞌil laj kꞌij tuj Jerusalén. Mya baꞌn e ela ke tbinchben tuj twitz Kman.

10 Chꞌixtok tcubil jbal, xi tmaꞌn Nabucodonosor tuꞌn t-xi kꞌiꞌn Joaquín tuj Babilonia junx cyucꞌil ke macbil wiꞌyilxix at tuj tja Dios, ex oc tkꞌoꞌn Nabucodonosor Sedequías aju terman tman Joaquín tuꞌn toc te rey tuj Judá ex tuj Jerusalén.

11 Toctok Sedequías twiꞌ 21 abkꞌi tej ttzyet tcawin ex o cawin junlaj abkꞌi tuj Jerusalén. 12 Ke tbinchben mya baꞌn e elaꞌ tuj twitz Kman aju Tdios. Mintiꞌ xi tniman aju yol tzaj kꞌmaꞌn te tuꞌn Jeremías aju t-sanjel Dios. 13 Ax icx jaw tiꞌn tib tiꞌj rey Nabucodonosor masque otok txi ttziyan jun yol axix toc tuꞌn miꞌn tkꞌojin tiꞌj, ex cub tcyuwsaꞌn tanmi tuꞌn miꞌn tajtz meltzꞌaj tucꞌil Kman aju Cydios aj Israel.

14 Ax icx nimxix il cybincha cycyakil nejenel cyxol pal cyucꞌix ke tnam xjal; e jeꞌx lpeꞌ tiꞌj tcyakil mya baꞌn in cybinchaꞌn ke nasyon mya nimal Dios, ex baj cytzꞌilsaꞌn tja Dios, aju otok jaw t-scꞌoꞌn Dios ex otok baj t-xjansaꞌn tuj Jerusalén. 15 Ate Kman aju Cydios ktzan cyxeꞌchel cocꞌx e tzaj t-samaꞌn ke t-sanjel kꞌmalte tyol cye, tuꞌnju in tzꞌeꞌytok tcꞌuꞌj cyiꞌj xjal etzan tuꞌn ex tiꞌj tja. 16 Atzun cye nok e jaw tzeꞌn cyiꞌj ke t-sanjel Dios, e oc ten xmayil cyiꞌj ex el cyicꞌun aju cyyol; tuꞌntzun jlu tzaj tkꞌoj Dios cyiꞌj xjal etzan tuꞌn, cyjaꞌtzun mintiꞌ icꞌx tiꞌj tuꞌn tcub cycastiw.

17 Tzajtzun tiꞌn Kman aju rey te Babilonia kꞌojlel cyiꞌj, ex cycyakil ke cuꞌxun e cub tbyoꞌn tuꞌn spad ax tuj tja Dios; mintiꞌ tzaj tzꞌeꞌy tcꞌuꞌj cyiꞌj cuꞌxun mi cyiꞌj kꞌapoj, mi cyiꞌj tij xjal ex mi cyiꞌj keju otok che tijin wen. Cycyakil ke jlu e jeꞌx tkꞌoꞌn Kman tuj tkꞌab Nabucodonosor. 18 Cycyakil ke macbil ateꞌ tuj tja Dios, ke nmak ex ke chꞌin, ex ke kꞌinumabl ateꞌ tuj tja Dios tucꞌix tkꞌinumabl rey ex cykꞌinumabl ke xjal maꞌ cyoclen ttxlaj, tcyakil jlu xi tiꞌn rey tuj Babilonia. 19 Ax icx cub cypatun tja Dios, cub cyxitun muro toc tiꞌj tnam Jerusalén, oc cykꞌoꞌn cykꞌakꞌal ke tbanil tja rey ex baj cyxitun tcyakil tiꞌxti wiꞌyilxix.

20 Akeju mintiꞌ e cub byoꞌn tuꞌn spad, e jeꞌx kꞌiꞌn tuj Babilonia, ex e oc te tmajen rey ex te cymajen ke tcyꞌajal, tejxi tcub tiꞌj Babilonia tuꞌn rey cye aj Persia. 21 Baj icju tuꞌntzun tjapun aju tyol Dios otok tma Jeremías aju t-sanjel Dios. Cyjaꞌtzun o tzꞌojlan txꞌotxꞌ atxix tej tbaj xitj tnam cyuꞌn aj kꞌoj ex tejxi tjapun 70 abkꞌi.

22 Tuj tnejel abkꞌi ttzyetlen tcawin Ciro aju rey cye aj Persia, ate Kman o cꞌasunte tnabl tuꞌn tbant jun orden tuꞌn; cub ttzꞌiban aju orden cyuj uꞌj ex xi tmaꞌn tuꞌn cyjaw schꞌit cywitz xjal, ex e jeꞌx t-samaꞌn cyuj cycyakil tnam jatum in cawin. O bant orden lu tuꞌntzun tjapun tyol Kman aju o kꞌmanjtz tuꞌn Jeremías. 23 Aju yol in tmaꞌn tuj uꞌj, atzun jlu: Chitzun Ciro aju rey cye aj Persia: Ate Kman Dios at tuj cyaꞌj ma tzaj tkꞌoꞌn woclene tiꞌj tcyakil cawbil twitz txꞌotxꞌ, ex ma tzaj tmaꞌn weye tuꞌn tjaw nbinchaꞌne jun nintz ja te cꞌulbil te tuj Jerusalén, aju tnam taꞌ tuj txꞌotxꞌ Judá. Cyjaꞌtzun, nok alcyex cyeye toc te tajlal cyxol ke xjal etzan tuꞌn Dios, awt Dios onil te ex baꞌn tuꞌn t-xiꞌ tuj Jerusalén, chi tuj uꞌj.