24
Tuj tkꞌijlalil tej in cawintok Joacim, ul Nabucodonosor aju rey te Babilonia ex ocx tzokpaj kꞌojlel tuj txꞌotxꞌ, atzunte Joacim cyaj ten ox abkꞌi tjakꞌ tcawbil. Chꞌexpettzun tnabl Joacim ex jaw tiꞌn tib tiꞌj. 2 Pero e tzaj t-samaꞌn Kman txkan elekꞌ tiꞌj Joacim; at aj Caldey, at aj Siria, at aj Moab ex at aj Amón. E tzaj t-samaꞌn ke jlu cyiꞌj aj Judá tuꞌntzun cynaj cyuꞌn, ic tzaꞌn otok tma Kman cye ke tmajen akeju t-sanjel. 3 Tzaj jlu cyiꞌj aj Judá porque otok cub t-ximan Kman tuꞌn tbant icju, tuꞌntzun miꞌn cytentl twitz, tuꞌn cylaj cycyakil ke il otok tbincha Manasés, 4 ax icx tuꞌn tlaj cychcꞌel ke xjal mintiꞌ cyil e cub tbyoꞌn ex o noj tuj tcyakil tnam Jerusalén tuꞌn chicꞌ. Cyjaꞌtzun mintiꞌx cub tnajsaꞌn Kman til.5 Aju chꞌintl txꞌolbaben tiꞌj Joacim ex tucꞌix tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey te Judá. 6 Tejtzun tcyim aju o cawin te t-xel, atzun Joaquín aju tcyꞌajal.
7 Aju rey te Ejipt ya mintiꞌtl etz tuj ttanmi, porque otok tzꞌel kꞌiꞌn tcyakil tetzbil tuꞌn rey te Babilonia, tzajx keꞌ ttzi tkꞌab xak te Ejipt ex pon baj max ttzi nima Éufrates.
Xi kꞌiꞌn Joaquín pres tuj Babilonia, cyucꞌix ke xjal at cyoclen ttxlaj
8 Toctok Joaquín twiꞌ wajxaklaj abkꞌi tej toc te rey, ex nok ox xjaw o cawin tuj Jerusalén. Aju ttxuꞌ Joaquín Nehusta tbi, aju tmeꞌjel Elnatán aju aj Jerusalén. 9 Pero mya baꞌn e eꞌla ke tbinchben Joaquín tuj twitz Kman, ic tzaꞌnx cybinchben ktzan t-xeꞌchel.
10 Tuj tkꞌijlalil lu cub be cyuꞌn ke t-soldad Nabucodonosor aju rey te Babilonia tuꞌn cypon tuj Jerusalén, ex baj cytxolban cyib tiꞌjele tnam tuꞌn cyoc tzokpaj tiꞌj. 11 Tej lu ke cytxolbantok cyib tiꞌjele tnam, pon Nabucodonosor cyucꞌil. 12 Xitzun tkꞌon tib Joaquín aju rey te Judá tuj tcwent rey te Babilonia, tucꞌix ttxuꞌ, cyucꞌix keju at cyoclen ttxlaj, ex ke nejenel ex ke xinak kꞌukli tcꞌuꞌj cyiꞌj, e jeꞌxtzun tiꞌn Nabucodonosor tuꞌn cyxiꞌ kꞌiꞌn tuj juntl txꞌotxꞌ najchak. O baj jlu tuj twajxakin abkꞌi toclen Nabucodonosor te rey.
13 Te tibajxitzun jlu, etz tiꞌn Nabucodonosor tcyakil kꞌinumabl tocx tuj tja Kman, tucꞌix aju tocx tuj tja rey. O bant jlu ic tzaꞌnxju otok tma Kman. E baj tpaꞌn cycyakil ke macbil ttxꞌotxꞌil kꞌan pwak, akeju otok che baj bant tuꞌn Salomón aju rey cye aj Israel tuꞌn cyajben tuj tja Kman. 14 E jeꞌxtzun tiꞌn cycyakil ke xjal aj Jerusalén tuꞌn cyxiꞌ pres, cyucꞌix cycyakil ke nejenel, ex ke soldad cyuw cycꞌuꞌj tuj kꞌoj, ex cycyakil ke xjal baꞌn che binchante tcyakil txcaj akꞌuntl tbanilxix, ex ke txꞌinol cꞌuxbil; laj mil japun cybet ke xjal e jeꞌx tiꞌn. Misicyer xjal cyaj ten tuj Judá, oꞌcx ke xjal mas meba e cyaj ten.
15 Tucꞌix Joaquín xi tiꞌn Nabucodonosor pres, tucꞌix ttxuꞌ, ex ke t-xuꞌjil, cyucꞌix ke xjal at cyoclen ttxlaj, ex ke xjal mas maꞌ cyoclen tuj Judá. E ex kꞌiꞌn tuj Jerusalén tuꞌn cyxiꞌ najal max tuj Babilonia. 16 Wuk mil japun cyajlal xjal maꞌ cyoclen e jeꞌx kꞌiꞌn tuꞌn rey te Babilonia; ex jun mil japun cyajlal xjal baꞌn che binchan tcyakil txcaj akꞌuntl tbanilxix ex ke txꞌinol cꞌuxbil, ex parttzun ke xinak at nim cyipun ex at nim cynabl tuj kꞌoj. 17 Octzun tkꞌoꞌn rey te Babilonia Matanías te rey te t-xel Joaquín. Ate Matanías terman tman Joaquín. Baj tchꞌexpuꞌn rey tbi Matanías ex Sedequías juntl tbi oc tkꞌoꞌn.
Tej tcawin Sedequías tuj Judá
18 Toctok Sedequías twiꞌ 21 abkꞌi tej toc te rey, ex junlaj abkꞌi o cawin tuj Jerusalén. Aju ttxuꞌ Sedequías Hamutal tbi, ex tmeꞌjel Jeremías aju aj Libna. 19 Pero mya baꞌn e eꞌla ke tbinchben tuj twitz Kman, ic tzaꞌnx otok tbincha rey Joacim. 20 Cyjaꞌtzun tzaj tkꞌoj Kman tiꞌj tnam Jerusalén ex cyiꞌj aj Judá, ex e ex tlajoꞌn tuꞌn miꞌn cytentl twitz.
Tej tcub tiꞌj tnam Jerusalén
Te tibajxi jaw tiꞌn tib Sedequías tiꞌj rey te Babilonia.