Tej tcawin rey Sedequías tuj Judá
52
Toctok Sedequías twiꞌ 21 abkꞌi tej toc te rey, ex junlaj abkꞌi o cawin tuj Jerusalén. Aju ttxuꞌ, Hamutal tbi aju aj Libna, ex tmeꞌjel juntl xjal Jeremías tbi, 2 Akeju tbinchben Sedequías mya baꞌn e eꞌla tuj twitz Kman, ic tzaꞌn ke tbinchben rey Joacim. 3 Cyjaꞌtzun tzaj tkꞌoj Kman cyiꞌj aj Jerusalén ex cyiꞌj aj Judá ex e ex tlajoꞌn tuꞌntzun mi cytentl twitz.Tej tcub tiꞌj tnam Jerusalén
Jawtzun tiꞌn tib rey Sedequías tiꞌj rey te Babilonia, 4 cyjaꞌtzun, tuj tlajin kꞌij te tlajin xjaw tuj tbelajin abkꞌi toclen Sedequías te rey, tzaj rey Nabucodonosor cyucꞌil cycyakil t-soldad, baj cytxolban cyib tiꞌjele tnam Jerusalén, ex jaw cybinchaꞌn cyxwetzbil tiꞌjele muro toc tiꞌj tnam, tuꞌntzun cyoc tzokpaj tiꞌj. 5 Cucxtok cytxolban cyib soldad tiꞌjele tnam tej tjapun tjunlajin abkꞌi toclen Sedequías te rey. 6 Tuj belaj tajlal tcyajin xjaw tujx abkꞌi lu, tzaj mas weꞌyaj tuj tnam ex ya mintiꞌtl cywa xjal. 7 Ocxtzun cyxoptzꞌiꞌn aj kꞌoj jun toyꞌ muro toc tiꞌjele tnam, ex masque cytxolbantok cyib aj Babilonia tiꞌjele tnam, pero te konicꞌan ex ok rey Sedequías cyucꞌil cycyakil t-soldad, ttziꞌ jun pwert tcubsaꞌn t-xol cabe muro, tuj be nneꞌx tuj tkan tawal rey, ex atzun be xi cyiꞌn, aju in cuꞌpun tuj chkꞌajlaj ttzi nima Jordán. 8 Pero akeju soldad aj Babilonia e jeꞌx lpeꞌ tiꞌj rey Sedequías, ex max cub tiꞌj cyuꞌn tuj tchkꞌajlajil tnam Jericó. Atzun ke t-soldad Sedequías cyaj colin cyuꞌn, ex e baj sputj. 9 Tzyettzun rey Sedequías cyuꞌn aj kꞌoj ex xi cyiꞌn twitz rey te Babilonia max tuj tnam Ribla tuj cytxꞌotxꞌ aj Hamat. Atzun cub t-sentens Sedequías tuꞌn rey Nabucodonosor, 10 ex twitzx e cub byoꞌn ke tcꞌwaꞌl cyucꞌix cycyakil xjal maꞌ cyoclen tuj Judá. 11 Atzunte Sedequías e jatz kꞌiꞌn ke tbakꞌ twitz tuꞌn Nabucodonosor aju rey te Babilonia, baj cꞌaloꞌn tuꞌn caden, xi kꞌiꞌn tuj Babilonia, ex atzun ocx kꞌoꞌn tuj pres max tejxi tcyim.
Tej tcub xitun tja Dios
12 Tuj tlajin kꞌij te tjweꞌyin xjaw ex tuj tbelajlajin abkꞌi toclen Nabucodonosor te rey tuj Babilonia, ate Nabuzaradán aju at toclen ttxlaj rey te Babilonia ex nejenel cye t-soldad rey, pon tuj Jerusalén, 13 ex oc tkꞌoꞌn tkꞌakꞌal tja Dios, tucꞌix tja rey ex cycyakil ja tuj tnam, ax icx oc tkꞌoꞌn tkꞌakꞌal cyja xjal maꞌ cyoclen, 14 atzun cye soldad ucꞌin tuꞌn cub cyxitun muro toc tiꞌjele tnam Jerusalén. 15 E jeꞌx tiꞌn Nabuzaradán aju nejenel cye soldad junjun xjal mas meba ke, cyucꞌix xjal otok che cyaj clet tuj Jerusalén, cyucꞌix keju otok txi cykꞌon cyib tuj tcwent rey te Babilonia, ex junjuntl xjal baꞌn che binchan tcyakil txcaj akꞌuntl, tuꞌn cypon tiꞌn tuj Babilonia. 16 Oꞌcx e cyaj tkꞌoꞌn Nabuzaradán junjun xjal mas tal meba, tuꞌn toc cycwentin tkan uva ex tuꞌn cyakꞌnan tuj cojbil.
17 Baj cybuchin aj Babilonia cycyakil ke macbil kꞌan cꞌuxbil cytxꞌotxꞌil: Ke tkan ja, ke tkꞌukbil tcubil aꞌ ex ju pil matij, akeju ateꞌ twitz tja Dios, ex xi cyiꞌn tcyakil kꞌan cꞌuxbil lu tuꞌn tpon tuj Babilonia. 18 Ax icx xi cyiꞌn ke cꞌil, ke palet, ke matzbil cywi mech, ke lak, ke pacꞌ ex tcyakil macbil kꞌan cꞌuxbil ttxꞌotxꞌil in che ajben tuj cꞌulbil. 19 Atzunte nejenel cye soldad xi tiꞌn tcyakil tiꞌxti kꞌan pwak ex sak pwak cytxꞌotxꞌil; e jeꞌx tiꞌn ke palangán, ke ẍlaꞌc, ke lak, ke tcubil tzaꞌj, ke candil, ke pacꞌ, ex ke copa tcubil oyaj taꞌl twitz uva. 20 Atzun keju cabe tkan ja, tucꞌix matij pil tcubil aꞌ ex keju cablaj tilbilal tor kꞌan cꞌuxbil cytxꞌotxꞌil in che ajben te tkꞌukbil pil, ex keju tkꞌukbil tcubil aꞌ, akeju otok txi tmaꞌn Salomón tuꞌn tbaj cybinchaꞌn tuꞌn cyajben tuj tja Dios, mintiꞌ o bant ttantearj tajlal kꞌan cꞌuxbil lu. 21 Akeju cabe tkan ja, belaj var twaꞌl junjun ex kak var tcꞌitz; catl cyuj ex te cyaje kꞌab tpimil ju kꞌan cꞌuxbil. 22 Teyle junjun tkan ja tcub jun adorn kꞌan cꞌuxbil xawcꞌin tten tuj twiꞌ, te cab var tucꞌ mey twaꞌl, ex cyoc tilbilal carnad ẍokꞌ tiꞌjele, kꞌan cꞌuxbil cytxꞌotxꞌil. Cycabil tkan ja lu junx binchben cye. 23 Jun syent tilbilal carnad ẍokꞌ txolin tten toc tiꞌjele adorn tcub twi tkan ja, ex nok 96 at tuj kꞌanchaꞌl.
E jeꞌx kꞌiꞌn xjal Judiy tuj juntl nasyon najchak
24 Ax icx tzaj tzyuꞌn Seraías aju tnejel pal tuꞌn nejenel cye soldad aj Babilonia, tucꞌix Sofonías tzaj tzyuꞌn, aju tcabin tnejel pal, cyucꞌix ox xkꞌukil ttzi tja Dios. 25 Cyxol ke xjal ateꞌtok tuj tnam, xi ttzyuꞌn aju nejenel cye cysoldad xjal Judiy, cyucꞌix wuk xinak kꞌol tconsej rey, akeju ax otok che cyaj ten tuj tnam, tucꞌix ju chmol xjal tuꞌn cyoc te soldad ex 60 xinak ateꞌtok tuj tnam. 26 E jeꞌxtzun tiꞌn Nabuzaradán cycyakil xjal lu tucꞌil rey te Babilonia max tuj tnam Ribla. 27 Ex atzun tma rey te Babilonia tuꞌn cycub byoꞌn ke xjal lu tuj tnam Ribla tuj cytxꞌotxꞌ aj Hamat.
Cyjaꞌtzun tten e ex kꞌiꞌn aj Judá tuj cytanmi tuꞌn cyxi kꞌiꞌn tuj juntl nasyon najchak. 28 Aju cyajlal xjal e jeꞌx tiꞌn Nabucodonosor, atzun jlu: Tuj twukin abkꞌi toclen te rey, e jeꞌx tiꞌn 3,023 xjal aj Judá; 29 tuj twajxaklajin abkꞌi toclen te rey, e jeꞌx tiꞌn 832 aj Jerusalén, 30 ex tuj 23 abkꞌi toclen te rey, e jeꞌx tiꞌn Nabuzaradán 745 xjal aj Judá. Tuꞌn cycyakil xjal japun jun cyajlal te 4,600.
Tzokpet Joaquín ex tcꞌam nimbilte tuj Babilonia
31 Tuj 25 tajlal tcablajin xjaw tuj 37 abkꞌi tocxlen presin Joaquín aju rey te Judá, oc Evil-merodac te rey tuj Babilonia, tbincha xtalbil te Joaquín ex etz tiꞌn tuj pres. 32 O tbincha baꞌn te ex mas maꞌ toclen oc tkꞌoꞌn cywitz mastl rey ateꞌ tucꞌil tuj Babilonia. 33 Cyjaꞌtzun tten, xi tmaꞌn tuꞌn tel chꞌexpuꞌn t-xbalun Joaquín, aju tocsaꞌntok tuꞌn tej tocxtok tuj pres, ex ax o waꞌn junx tucꞌil rey tuj tcyakil kꞌij te tankꞌibl. 34 Ax icx o tcꞌam Joaquín chꞌin pwak tcyakil kꞌij tuꞌn rey te Babilonia tuj tcyakil tankꞌibl tejxi tcyim.