25
Tuj laj tajlal tlajin xjaw te tbelajin abkꞌi toclen Sedequías te rey, cub be tuꞌn rey Nabucodonosor, cyucꞌix cycyakil t-soldad, tuꞌn cykꞌojin tiꞌj tnam Jerusalén, ex baj cytxolban cyib tiꞌjele. Oc cyjocan txꞌotxꞌ tiꞌj muro tuꞌn cyoc tzokpaj tiꞌj tnam. 2 Cucxtok txolin tiꞌj tnam tujxi tjunlajin abkꞌi toclen Sedequías te rey. 3 Tuj belaj tajlal tcyajin xjaw te abkꞌi lu, tzaj nim weꞌyaj tuj tnam, ex ya mintiꞌtl cywa xjal at. 4 Extzun cyxoptzꞌiꞌn jun toyꞌ muro toc tiꞌjele tnam, ex masque txolin tiꞌj tnam cyuꞌn aj Babilonia, pero te konicꞌan ex ok rey tuj tnam cyucꞌix cycyakil ke soldad. Ex atzun e ex ttzi pwert tcub cyxol cabe muro, tuj be nneꞌx cyxol tkan tawal rey, ex atzun be xi cyiꞌn aju in cuꞌx tuj chkꞌajlaj te nima Jordán. 5 Pero e jeꞌx lpeꞌ ke soldad aj Babilonia tiꞌj rey Sedequías tuꞌn tcub tiꞌj cyuꞌn, ex atzun cub tiꞌj cyuꞌn tuj chkꞌajlaj te tnam Jericó. Cycyakil ke t-soldad otok che el sputj ex otok cyaj colin cyuꞌn. 6 Tzyettzun rey cyuꞌn aj Caldey ex xi cyiꞌn twitz rey te Babilonia tuj tnam Ribla. Atzun cub kꞌoꞌn t-sentens Sedequías tuꞌn Nabucodonosor, 7 Xi tmaꞌn Nabucodonosor tuꞌn cycub byet ke tcyꞌajal Sedequías twitzx; atzunte Sedequías e jatz kꞌiꞌn ke tbakꞌ twitz, ex baj cꞌaloꞌn tuꞌn caden tuꞌn t-xi kꞌiꞌn pres tuj Babilonia.Tej tcub xitj tja Dios
8 Tuj twukin kꞌij te jweꞌyin xjaw te tbelajlajin abkꞌi toclen Nabucodonosor te rey tuj Babilonia, pon Nabuzaradán tuj Jerusalén. Aju xjal lu maꞌ toclen ex nejenel cye soldad cwentil tja rey Nabucodonosor. 9 Oc tkoptzꞌiꞌn kꞌakꞌ tiꞌj tja Kman ex tiꞌj tja rey, ex cyiꞌj ke mastl ja ateꞌ tuj tnam, ax icx cyiꞌj cyja cycyakil xjal maꞌ cyoclen. 10 Atzun cycyakil ke soldad aj Caldey akeju e jeꞌx tucꞌil, baj cyxitun ke muro toc tiꞌjele tnam Jerusalén. 11 E jeꞌxtzun tiꞌn Nabuzaradán ke xjal e cnet tuꞌn tuj tnam, cyucꞌix keju otok txi cykꞌon cyib tuj tcwent rey te Babilonia, ex cyucꞌix junjuntl xjal, tuꞌn cypon tiꞌn tuj Babilonia. 12 Oꞌcx ke xjal mas tal meba e cyaj tkꞌoꞌn tuꞌn cyakꞌnan tjakꞌ tkan uva ex tuj cojbil.
13 Atzun cye aj Caldey baj cybuchin cycyakil ke tiꞌxti kꞌan cꞌuxbil ttxꞌotxꞌil akeju ateꞌ tuj tja Kman: ke tkan ja, ke tkꞌukbil tcubil aꞌ ex ju nintz pil, ex xi cyiꞌn tcyakil kꞌan cꞌuxbil lu tuj Babilonia. 14 Ax icx xi cyiꞌn ke cꞌil, ke palet, ke matzbil tuꞌn cyel cꞌput cywi mech cye candil, ke pacꞌ, cyucꞌix mastl macbil kꞌan cꞌuxbil ttxꞌotxꞌil in che ajben tuj cꞌulbil. 15 Ax icx xi tiꞌn nejenel cye soldad cwentil tja rey cycyakil tiꞌxti kꞌan pwak ex sak pwak cytxꞌotxꞌil, ke ẍlaꞌc ex ke lak. 16 Tuꞌnju nimxix, cyjaꞌtzun mintiꞌ baj cymloꞌn talil kꞌan cꞌuxbil cyiꞌj cabe tkan ja, tucꞌix nintz pil tcubil aꞌ, ex ke cykꞌukbil tcubil aꞌ, akeju tuꞌn Salomón xi tmaꞌn tuꞌn cybaj bant tuꞌn cyajben tuj tja Dios. 17 Cycabil tkan ja belaj var twaꞌl junjun, ex tcub jun adorn kꞌan cꞌuxbil tuj twiꞌ junjun te cabe var tucꞌ mey twaꞌl, ex tocsaꞌn kꞌan cꞌuxbil cyiꞌjele xawcꞌin tten, ex cyocsaꞌn tilbilal carnad ẍokꞌ tiꞌj. Cycabil tkan ja lu junx taꞌ binchben cye.
Tej cyxi kꞌiꞌn aj Judá tuj Babilonia
18 Ax icx aju tnejel pal Seraías tucꞌix tcabin pal Sofonías, ex cyucꞌix ox cwentil ttzi tpwertil tja Dios e jeꞌx kꞌiꞌn pres tuꞌnju nejenel cye soldad. 19 Ex cyxol ke xjal ax najlketok tuj tnam, xi tiꞌn Nabuzaradán aju xjal toc te nejenel cye soldad aj Judá, cyucꞌix jweꞌ xinak in che ajben tecu rey, tucꞌix ju nejenel cyiꞌj ke xjal in che pon kꞌiꞌn tuꞌn cyoc te soldad, ex cyucꞌix 60 xinak maꞌ cyoclen ateꞌ tuj tnam. 20 Cycyakil ke jlu e jeꞌx tiꞌn Nabuzaradán twitz rey te Babilonia tuj tnam Ribla tuj txꞌotxꞌ Hamat, porque atzun taꞌtok. 21 Ex atzun xi tmaꞌn rey tuꞌn cycub byoꞌn.
Cyjaꞌtzun tten, e ex kꞌiꞌn ke xjal aj Judá tuj cytanmi tuꞌn cypon kꞌiꞌn tuj juntl tnam najchak.
Ke chꞌintl xjal e cyaj ten e jeꞌx ok tuj Ejipt
22 Ate Nabucodonosor aju rey te Babilonia oc kꞌonte Gedalías te gobernador, aju tcyꞌajal Ahicam ex tal tchman Safán, tuꞌntzun tten te nejenel cyxol ke xjal otok che cyaj ten tuj Judá. 23 Pero tej cybinte ke nejenel cye soldad tuj Judá ex ke mastl xjal ka otok tzꞌoc kꞌoꞌn Gedalías te gobernador tuꞌn rey te Babilonia, e jeꞌxtzun queꞌyilte tuj tnam Mizpa, cyucꞌix mastl xjal cyucꞌil. Atzun ke jlu e jeꞌx: Ismael aju tcyꞌajal Netanías, Johanán aju tcyꞌajal Carea, Seraías, aju tcyꞌajal Tanhumet aju aj Netofa, ex tucꞌix Jaazanías tcyꞌajal jun xinak aj Maaca. 24 Xi ttziyan Gedalías jun yol axix toc cye ex cye ke mastl xinak ucꞌin cyuꞌn, ex tma:
—Miꞌn che xobe cywitz ke nejenel cye aj Caldey, ax che tencje tzalu tuj txꞌotxꞌ Judá ex che ajbene te rey te Babilonia; ka ma bant cyuꞌne icju, baꞌn cꞌelel te cyeye.
25 Pero tuj twukin xjaw pon Ismael aju tcyꞌajal Netanías ex tal tchman Elisama, aju at t-xilen tucꞌil rey te Judá, pon tuj Mizpa cyucꞌix laj xinak tucꞌil. Atzun ke e cub byonte Gedalías cyucꞌix ke xjal aj Judá ex ke aj Caldey, akeju ateꞌtok tucꞌil. 26 Atzun ke mastl xjal e jeꞌx ok tuj Ejipt, tzaꞌnx ke xjal maꞌ cyoclen ax icx ke xjal chꞌin cyoclen, cyucꞌix ke nejenel cye soldad e jeꞌx ok, tuꞌnju tzaj cyxobil cywitz ke aj Caldey.
O tzokpet Joaquín tuj pres ex o tcꞌam nimbil te tuj Babilonia
27 Tuj 27 tajlal tcablajin xjaw tej otok bant 37 abkꞌi tocxlen presin Joaquín aju rey te Judá, tzaj kꞌakꞌan tcꞌuꞌj Evil-merodac tiꞌj ex etz tiꞌn tuj pres. A jlu o bant tuj tnejel abkꞌi ttzyetlen tcawin Evil-merodac aju rey te Babilonia. 28 Puro baꞌn o tbincha rey tiꞌj Joaquín, ex mas maꞌ chintl toclen oc tkꞌoꞌn cywitz ke mastl rey ateꞌ tucꞌil tuj Babilonia. 29 Cyjaꞌtzun tten el tchꞌexpuꞌn Joaquín aju t-xbalun tocsaꞌn tiꞌj tuj pres, ex junx o waꞌn junx tucꞌil rey tcyakil kꞌij tejxi tcyim. 30 Tcyakil kꞌij o tcꞌam Joaquín jun onbil te tuꞌn rey te Babilonia tuj tcyakil tankꞌibl.