2 Part xi kꞌiꞌn Jeremías tuꞌn nejenel cye soldad ex xi tmaꞌn te cyjaꞌ: Ate Kman aju Tdiosa o tma tuꞌn ttzaj mya baꞌn tibaj txꞌotxꞌ lu, 3 ex matzun japun jaꞌlo aju o tma, ma tzaj jlu cyiꞌj t-xjalila porque o che binchan il twitz Kman ex mintiꞌ xi cyniman. 4 Bintza, texju jaꞌlo cꞌelel wiꞌne caden tiꞌj tkꞌaba, aju cꞌaloꞌna tuꞌn. Ka tajbila tuꞌn t-xiꞌya wucꞌile tuj Babilonia, baꞌn tuꞌn t-xiꞌya, jacu tzꞌoc ncwentina, pero ka tcꞌiꞌya tuꞌn t-xiꞌya wucꞌile, baꞌn tuꞌn tcyaj tena. Queꞌyinxa, lu tcyakil txꞌotxꞌ tcub twitza, ex baꞌn tuꞌn t-xiꞌya nok jatum taja. 5 Ka tajbila tuꞌn tcyaj tena, txiꞌya tucꞌil Gedalías aju tcyꞌajal Ahicam ex tal tchman Safán, aju ma tzaj kꞌoꞌn toclen tuꞌn rey te Babilonia tuꞌn tcawin cyibaj ke tnam te Judá; tencja tucꞌil ex cyucꞌil ke ttanmila. Ex ka miꞌn, baꞌn tuꞌn t-xiꞌya nok jatum taja, chi nejenel cye soldad. Xitzun tkꞌoꞌn jun oyaj te Jeremías, tucꞌix chꞌin twa, ex baj cykꞌolben cyib. 6 Xiꞌtzun Jeremías tucꞌil Gedalías ma tuj tnam Mizpa, axtzun cyaj ten tucꞌil ex cyucꞌil ke xjal otok che cyaj ten tuj Judá.

7 Tej cybinte cycyakil nejenel cye soldad Judiy, cyucꞌix ke cyxjalil akeju ateꞌtok tuj cojbil, ka otok txi tkꞌoꞌn rey te Babilonia toclen Gedalías aju tcyꞌajal Ahicam, tuꞌn tcawin tuj txꞌotxꞌ Judá, ex ka tuj tcwent otok che cyaj kꞌoꞌn ke xinak, ke xuꞌj ex ke cꞌwaꞌl, akeju mas tal mebaxix, akeju mintiꞌ e jeꞌx kꞌiꞌn pres tuj Babilonia, 8 e jeꞌx tucꞌil Gedalías tuj tnam Mizpa ex atzun ke jlu: Ismael aju tcyꞌajal Netanías, Johanán ex Jonatán akeju tcyꞌajal Carea, Seraías aju tcyꞌajal Tanhumet, cyucꞌix ke tcyꞌajal Efai aju aj Netofa, ex Jezanías aju tcyꞌajal jun xinak aj Maacat, cyucꞌix ke cyxjalil. 9 Atzunte Gedalías xi tcyuwsaꞌn jun yol axix toc cye ke xinak lu ex cye cyxjalil: Miꞌn che xobe tuꞌn tocx cykꞌon cyibe tjakꞌ cycawbil aj Caldey, ax che ankꞌine tuj txꞌotxꞌ lu, cykꞌon ocx cyibe tjakꞌ tcawbil rey te Babilonia ex baꞌn cꞌelel te cyeye. 10 Atzun weye, ax chin cyjel tene tuj tnam Mizpa tuꞌntzun nyoline cyiꞌje cywitz aj Caldey oc cyul tzalu. Cychmoꞌn baje taꞌl twitz uva, tucꞌix twitz awal ex chibj aseyt, cycꞌuꞌnxe cyuj ke cꞌubl cye ex axtzun che tencje cyuj tnam jatum ateꞌye, chi Gedalías. 11 Ax icx ke xjal Judiy, akeju ateꞌ tuj tnam Moab, tuj Amón, tuj Edom ex cyuj txkantl tnam, o cybi ka otok txi tkꞌoꞌn rey te Babilonia ambil cye junjun xjal Judiy tuꞌn ax tuꞌn cycyaj ten tuj txꞌotxꞌ Judá, ex ka otok txi tkꞌoꞌn toclen Gedalías tuꞌn tcawin cyibaj. 12 E tzajtzun tuj tcyakil part jatum otok che baj sputj, e ul meltzꞌaj juntl maj tuj Judá, ex e ul tucꞌil Gedalías tuj tnam Mizpa. Ax icx cye baj cychmoꞌn taꞌl twitz uva ex nimxix twitz awal.

13 Ate Johanán aju tcyꞌajal Carea, cyucꞌix mastl nejenel cye soldad, akeju ax ateꞌtok tuj cojbil, e jeꞌx tucꞌil Gedalías tuj tnam Mizpa, 14 ex xi cymaꞌn te cyjaꞌ:

—¿Mintiꞌpe baꞌn tuꞌna, ma tzaj samaꞌn Ismael aju tcyꞌajal Netanías, tuꞌn Baalis aju rey cye aj Amón, tuꞌn tcub byoꞌna tuꞌn? Che chi.

Atzunte Gedalías mintiꞌ xi tniman. 15 Xitzun tmaꞌn Johanán te Gedalías tuj ewaj:

—Kꞌontza ambil weye tuꞌn nxiꞌye byolte te Ismael ex mi jun jacu binte alcye otok cub byonte te. ¿Tikuꞌntzun cxel kkꞌoꞌn ambil te tuꞌn tcub byoꞌna tuꞌn? Porque ka ma cub byoꞌna tuꞌn, jacu che el sputj ke xjal ma tzꞌoc cychmon cyib tucꞌila ex jacu che baj naj aj Judá, akeju nicꞌxi cybaj ma cyaj ten.

16 Atzunte Gedalías xi ttzakꞌweꞌn:

—Miꞌn tbinchaya icju, aju in tmaꞌna tiꞌj Ismael mya ax toc.