Tej tcub byoꞌn Gedalías
41
Tuj twukin xjaw xiꞌ Ismael visitarilte Gedalías tuj tnam Mizpa, ex xi tucꞌin laj xinak tucꞌil, cyucꞌix junjun xjal at cyoclen ttxlaj rey. Ate Ismael tcyꞌajal Netanías ex tal tchman Elisama aju at t-xilen cyucꞌil ke tiyjil rey, ex tej matok in che waꞌn tucꞌil Gedalías, 2 jaw weꞌ Ismael cyucꞌix laj xinak ucꞌin tuꞌn ex cub cybyoꞌn Gedalías tuꞌn spad, aju otok tzꞌoc kꞌoꞌn toclen tuꞌn rey Nabucodonosor tuꞌn tcawin tuj tnam Judá. 3 Ax icx e cub tbyoꞌn Ismael cycyakil xjal Judiy ex ke soldad aj Caldey, akeju ateꞌtok tucꞌil Gedalías tuj tnam Mizpa.4 Ewtok tcublen byoꞌn Gedalías, mi jun otok binte te, 5 e ul 80 xinak tzajni ke tuj tnam Siquem, tuj tnam Silo ex tuj tnam Samaria, matzonlex cyxmatz ex sbitꞌnaj cyxbalun toc, ex nojni tiꞌj cyximlal tuꞌn ẍil cyuꞌnx otok bant, kꞌiꞌn cyoyaj twitz awal ex storac tuꞌn tpon cyiꞌn tuj tja Dios. 6 Etztzun Ismael tuj Mizpa canul cyiꞌj ke xjal lu in okꞌtok, ex tej tpon canun cywitz ke xjal xi tmaꞌn cye cyjaꞌ:
—Cytzaje queꞌyilte Gedalías aju tcyꞌajal Ahicam.
7 Tejtzun cypon tuj tnam, ate Ismael cyucꞌix laj xinak tucꞌil, e oc ten byolte cye ke xjal lu ex e cuꞌx cyxoꞌn tuj jun jul in chmet aꞌ tuj. 8 Pero cyxol ke xinak lu, at laj cyma te Ismael cyjaꞌ:
—Miꞌn ko cub tbyoꞌna, porque at triw, sebad, aseyt ex taꞌl cab ewan kuꞌne tuj cojbil, che chi.
Entons mintiꞌ e cub tbyoꞌn Ismael laj xinak lu. 9 Aju jul jatum cuꞌx t-xoꞌn Ismael cyximlal ke xinak otok che cub tbyoꞌn, ax aju otok bant tuꞌn rey Asa tej in che kꞌojintok tucꞌil Baasa aju rey cye aj Israel. Aju jul lu matij wen, pero biꞌx noj tuꞌn cyximlal ke xjal otok che cub tbyoꞌn Ismael. 10 Ax icx e jeꞌx tiꞌn Ismael ke tmeꞌjel rey ex ke xjal otok che cyaj kꞌoꞌn tuj tcwent ktzan Gedalías tuj Mizpa tuꞌn Nabuzaradán aju nejenel cye soldad. E jeꞌx tiꞌn Ismael ke xjal lu tuꞌn cypon tiꞌn tuj cytanmi aj Amón.
11 Tej tbinte Johanán aju tcyꞌajal Carea, cyucꞌix ke nejenel cye soldad ateꞌtok tucꞌil, ka otok che cub tbyoꞌn Ismael nimcu xjal, 12 e baj cychmoꞌn cycyakil xinak ateꞌ tuj cycwent ex e jeꞌx kꞌojlel tiꞌj Ismael; max cub tiꞌj cyuꞌn jatum taꞌ nintz pil tuj tnam Gabaón. 13 Nimxix e jaw tzalaj ke xjal otok cheꞌx kꞌiꞌn pres tuꞌn Ismael, tej cylonte lu Johanán cyucꞌix cycyakil ke nejenel cye soldad cyjaꞌ cyxiꞌ; 14 e ajtz meltzꞌaj cycyakil xjal lu ex ul cychmon cyib tucꞌil Johanán. 15 Atzunte Ismael cyucꞌix wajxak xinak tucꞌil, cabal e tzokpaj tuj tkꞌab Johanán, ex cyjaꞌ e jeꞌx ok tuj cytanmi aj Amón.
16 Atzunte Johanán cyucꞌix ke nejenel cye soldad ateꞌ tucꞌil, ajtz cyiꞌn cycyakil xjal; ke soldad, ke xuꞌj, ke cꞌwaꞌl ex ke xjal at cyoclen, akeju otok cheꞌx presin tuꞌn Ismael tuj Mizpa tcublenxi byoꞌn Gedalías tuꞌn, ex e ajtz tiꞌn Johanán cycyakil xjal lu, akeju otok che pon kꞌiꞌn tuj Gabaón. 17 Tzyettzun be cyuꞌn ex tej cycanun tuj lugar Gerut-quimam, aju tcub nikayin ttxlaj tnam Belén, axtzun e weꞌ porque ximantok cyuꞌn tuꞌn cypon max tuj Ejipt, 18 tuꞌn cytzokpaj tuj cykꞌab aj Caldey, porque in che xobtok cywitz, tuꞌn tlaj otok cub byoꞌn Gedalías tuꞌn Ismael. Ate Gedalías otok cyaj kꞌoꞌn toclen tuꞌn rey te Babilonia tuꞌn tcawin tuj Judá.