2 In xjikꞌban tuꞌn okꞌel tcyakil konicꞌan; in cuꞌtz taꞌl twitz tiꞌj tkꞌoꞌtx. Cyxol cycyakil keju e cꞌujlante te mi aꞌl jun cye in tzaj kꞌukbante tcꞌuꞌj. Cycyakil ke tamiw ateꞌ nej, ma che oc meltzꞌaj tiꞌj ex ma che oc te aj kꞌoj tiꞌj.

3 Nimxix in che cꞌixbisanjtz ke aj Judá ex ma che ocx kꞌoꞌn tjakꞌ akꞌuntl cyuwxix, ax icx ma cheꞌx kꞌiꞌn tuj juntl nasyon najchak. Ke tnam xjal lu ma che pon najal cyxol mastl nasyon, ex mintiꞌ in cnet chꞌin ojlabl te cye. Ma che pon cnet cyuꞌn ke xjal e oc lpeꞌ cyiꞌj tuꞌn cytzyet, ex ma baj cytxolban cyib cyiꞌjele tuꞌn miꞌn cytzokpaj.

4 Bisbajilxix cyqueꞌyinx ke be in che pon tuj tnam Sión, porque mi jun cyjaꞌ t-xiꞌ cyuj ke ninkꞌij. Mintiꞌtl xjal in che bet cytziꞌ tlamel tnam, in che okꞌ ke pal, in baj cycꞌuꞌj ke kꞌapoj ateꞌ tuj, ex nim cꞌixcꞌoj nnicꞌx cyuꞌn aj Jerusalén.

5 Ke aj kꞌoj cyiꞌj in che cawin cyibaj, akeju icꞌul cye in che tzalaj wen tuꞌnju ate Kman ma baj cꞌixbisante cye, tuꞌnju nim il o cybincha. Ke cycꞌwaꞌl ma cheꞌx tzyuꞌn ex ma cheꞌx kꞌiꞌn cyuꞌn aj kꞌoj tuj juntl nasyon najchak.

6 Tcyakilju tbanil queꞌyin at tuj tnam Sión ma cub naj; ke nejenel cyxol ic cyten ic tzaꞌn ke masat, in che jyon cꞌul te cywa ex mintiꞌ in cnet cyuꞌn; ya mintiꞌtl cyipun tuꞌn cyel ok cywitz keju lajol cye.

7 In tzaj cynaꞌn aj Jerusalén aju bis ex cꞌixcꞌoj otok tzaj cyiꞌj ex in tzaj cynaꞌn tcyakilju cykꞌinumabl o ten ojtxi; ex in tzaj cynaꞌn tej tcub cyiꞌj cyuꞌn aj kꞌoj ex mintiꞌ jun o tzꞌonin cyiꞌj. Tej toc cyqueꞌyin ke aj kꞌoj otok cub xitj tnam e xmayin tiꞌj.

8 Nimxix il ma cybincha aj Jerusalén, cyjaꞌtzun ma che oc ic tzaꞌn jun tiꞌxti puro tzꞌil. Akeju in che niman cye nej, atzun ke in che el icꞌunte cye jaꞌlo, porque ma cyil in che chꞌixwi ic tzaꞌn jun xjal mintiꞌ t-xbalun toc. Cyjaꞌtzun in che okꞌ ex nneꞌl cyewan cywitz tucꞌil nim cychꞌixwi.

9 Kꞌanchaꞌl tzꞌil tiꞌjxi cyxbalun; ic cyten ic tzaꞌn jun xuꞌj in tzꞌilix tuꞌn ẍwoꞌj, ex mintiꞌ e ximan tiꞌj ka te mancbil at tuꞌn tcub cycastiw. Atzun jaꞌlo minaben ma che cub tzꞌak ex mi aꞌl jun baꞌn tkꞌukbante cycꞌuꞌj, ex in cymaꞌn cyjaꞌ: Kman Dios, queꞌyintza aju yajbil keye, ke aj kꞌoj kiꞌje ma jaw cyniman cyib, che chi.

10 Ke aj kꞌoj cyiꞌj ma tzꞌel cyetzan tcyakil cykꞌinumabl at tuj Jerusalén. Ke xjal mya nimal Dios ke e ilwaj tej cyocx tzokpaj tuj tjaya, akeju tzaj tmaꞌna cye mintiꞌ tuꞌn cyocx tuj ju lugar jatum in cub cybuyin cyib ke xjal etzan tuꞌna.

11 Cycyakil xjal najl tuj tnam in che okꞌ ex in che jyon tiꞌj cywa; xi cykꞌoꞌn cykꞌinumabl tuꞌn tcnet cywa tuꞌntzun cyankꞌin chꞌintl. Kman, queꞌyintza, nimxix in ko el icꞌune cyuꞌn xjal.

12 Akeye in che bet tuj be, ¿mintiꞌpe in tzaj kꞌakꞌan cycꞌuꞌje kiꞌje? Che tencuye ximal tiꞌj ka at jun in cꞌixbisanjtz ic tzaꞌn keye, nimxix in ko cꞌixbisanjtze wen. Ma tzaj t-samaꞌn Kman aju cꞌixbisabl lu kibaje tej saj tkꞌoj kiꞌje.

13 Max twitz cyaꞌj ma tzaj t-xoꞌn Kman jun kꞌakꞌ kiꞌje ex biꞌx ma che tzꞌeꞌy kbakile tuꞌn; ma cub tkꞌoꞌn jun cꞌobil tuj kbeye ex biꞌx ma ko aj pacꞌchaje tuꞌn; ma ko cyaj coline tuꞌn ex tuj enter kꞌij atoꞌye tuj cꞌixcꞌoj.

14 Ma til Dios ju kile ex ma cub tcꞌaloꞌn tuꞌn tkꞌab ex ma jax tkꞌoꞌn tibaj kkule ic tzaꞌn jun yuw; tuꞌntzun jlu ma baj kipune. Ma koꞌx kꞌoꞌne tuj cykꞌab aj kꞌoj, akeju mlay ko xcyeꞌye cyiꞌj.

15 Najchak ma che el tlakꞌbaꞌn Kman tiꞌj ju tnam Jerusalén cycyakil ke xjal cyuwxix cycꞌuꞌj, akeju in che colintok kiꞌje. Tzaj tchmoꞌn txkan soldad kꞌojlel kiꞌje tuꞌntzun cycub byoꞌn ke xinak cyuwxix cycꞌuꞌj ateꞌ kucꞌile. Aju tnam Judá ma baj waban tuꞌn Kman ic tzaꞌn in baj waban twitz uva tuꞌn tel taꞌl.

16 Tuꞌntzun jlu in ko okꞌe wen. Nneꞌl txutin taꞌl kwitze, mi aꞌl jun baꞌn ttzaj kꞌukbante kcꞌuꞌje, mi aꞌl jun baꞌn ttzaj kꞌonte kipune. Tuj mebayil ma che cyaj ke kxjalile, porque aju aj kꞌoj kiꞌje masxix tipun kwitze.

17 Ke aj Jerusalén in xi cynukpiꞌn cykꞌab tuꞌntzun cytzaj onin, pero mi jun in tzaj kꞌukbante cycꞌuꞌj. Ma tzaj tmaꞌn Dios tuꞌn tbaj cytxolban cyib ke aj kꞌoj cyiꞌj ke tiyjil Jacob; aju tnam Jerusalén ma tzꞌoc cykꞌoꞌn ic tzaꞌn jun tiꞌxti puro icꞌbilxix.

18 Tuj ttxolil ma tbincha Dios jlu kiꞌje, porque mintiꞌ o txi knimane ke tmandamyent. Ko cybintze cycyakile akeye tnam ex cyqueꞌyin oque aju cꞌixcꞌoj kiꞌje. Ke cuꞌxun ex ke kꞌapoj ateꞌ kxole ma cheꞌx kꞌiꞌn pres tuj juntl nasyon najchak.

19 Xi kkanine onbil cye keju mojl kyole cyucꞌil nej, pero nok ma ko cub sbuꞌne cyuꞌn. Ke pal ex ke tij xjal ateꞌ kxole ma che cyim tuj tnam tej in che jyontok cywa tuꞌn cyankꞌin chꞌintl.

20 Kman, queꞌyintza aju taꞌw bis kiꞌje. In knaꞌne mer ic tzaꞌn cjawitz ok kanmiye. Oc in ko oc tene ximal tiꞌj tuꞌnju mintiꞌ ma txi knimane tmandamyenta, in tzaj taꞌw tuj kanmiye. Tiꞌjxi tnam nim xjal in che cub byoꞌn tuꞌn spad, atzun tuj tnam nim xjal in che cyim tuꞌn txꞌuꞌj yabil.

21 In cybiꞌn xjal in ko okꞌe, pero mi aꞌl jun in tzaj kꞌukbante kcꞌuꞌje. Cycyakil aj kꞌoj kiꞌje baꞌn cyuꞌn aju mya baꞌn ma tzaj kiꞌje, ex ma che jaw tzalaj tuꞌnju ma tbinchaya jlu kiꞌje. Nman, cuchiwt tuꞌn tul naj tkꞌijlalil castiw aju banin tiꞌj tuꞌna, tuꞌntzun tcub cycastiw ic tzaꞌn keye ma cub tkꞌoꞌna kcastiwoye.

22 Queꞌyintza tcyakil cybinchben mya baꞌn; binchama cyiꞌj ic tzaꞌn ma tbinchaya kiꞌje tuꞌn tlaj kile, porque nimxix in ko okꞌe ex ma baj tipun kanmiye.