2 Ma cub t-xitun Kman cyja cycyakil aj Israel ex mintiꞌ ma tzaj kꞌakꞌan tcꞌuꞌj cyiꞌj; tej ttzaj tkꞌoj e cub t-xitun cycyakil ke ja te cycolbil cyib aj Judá, aju cawbil cyucꞌix keju in che cawin tuj ma che cub t-xitun Kman, ex ma tzaj cychꞌixwi tuꞌn.

3 Ma cub naj tcyakil cyipumal aj Israel tuꞌn tkꞌoj Dios. Ma tzꞌel tlakꞌbaꞌn tkꞌab aju in colin kiꞌj cywitz ke aj kꞌoj kiꞌj; ma tzꞌoc tkꞌoꞌn tkꞌakꞌal cytanmi tiyjil Jacob, ex ma baj tzꞌeꞌy tcyakil tuꞌn nok jatum in pon canun.

4 Ate Kman ic tten ic tzaꞌn jun aj kꞌoj ma tzꞌel t-xkinin t-xobl plech ex ma txi tbinchaꞌn tten tbankꞌab; ic tten ic tzaꞌn jun aj kꞌoj ma baj t-xitun tcyakil ju tbanilxix queꞌyin, ex aju tkꞌoj ic tten ic tzaꞌn jun kꞌakꞌ tzaj tkꞌoꞌn tibaj cyja aj Jerusalén.

5 Ic ma tbincha Kman ic tzaꞌn in tbinchaꞌn jun aj kꞌoj; biꞌx ma cub t-xitun tcyakil cytanmi aj Israel; ma cub t-xitun tcyakil cyja ke rey, ma cub t-xitun ke ja maꞌ cywaꞌl jatum in che ocx ten keju xkꞌukil tnam, ex ma tzaj tkꞌoꞌn nim bis ex okꞌel tuj Judá.

6 Jurat naj ma cub t-xitun tja ic tzaꞌn jun tal ja t-xak tzeꞌyin twiꞌ at tuj tkan awal, ma cub t-xitun ju ja jatum in cub cybuyin cyib xjal tuꞌn cycꞌulun te. Ma tbincha Kman tuꞌn ticꞌ cynaꞌnjtz ke ninkꞌij tuj Jerusalén ex ke kꞌij te ojlabl. Tuꞌnju tkꞌoj ma tzaj ma che el ticꞌun ke rey ex ke pal.

7 Ma tzꞌel ticꞌun Kman t-altar ex ju tja xjan; aju muro toc tiꞌjele tja ma txi tkꞌoꞌn tuj cykꞌab ke aj kꞌoj. In che schꞌin ke aj kꞌoj tuj tja Dios mer ic tzaꞌn tuj ninkꞌij.

8 Cub t-ximan Kman tuꞌn tcub t-xitun ke muro toc tiꞌjele tnam Sión. Xi techan tuꞌn tcub t-xitun tnam ex o binchet tuꞌn jurat naj. Aju tnejel muro ex aju tcabin muro, tuꞌn Dios ma che oc tuj bis, ex te junx tyemp ma che cub xitj.

9 Palch ke tpwertil tnam twitz txꞌotxꞌ ex ke pasador ma che baj piẍj. Ke rey ex ke nejenel ateꞌ tuj Jerusalén o cheꞌx kꞌiꞌn pres cyxol xjal mya nimal Dios ke ex mintiꞌtl tley Dios cyucꞌil. Ex mi ke t-sanjel Dios mintiꞌtl in cycꞌmoꞌn aju tuꞌn ttzaj tmaꞌn Dios cye.

10 Ke tij xjal ateꞌ tuj tnam Sión mintiꞌ in che kꞌajt, in che cub keꞌ twitz txꞌotxꞌ, in jax cyjatoꞌn kuk tuj cywiꞌ ex nnoꞌc cykꞌoꞌn cyxbalun chꞌiꞌx twitz. Ke kꞌapoj ateꞌ tuj Jerusalén in cub mocꞌeꞌ cywiꞌ ex in pon tacl max twitz txꞌotxꞌ.

11 Ma che naj ke tbakꞌ nwitze tuꞌnju in chin okꞌe, ex nnaꞌne mer ic tzaꞌn cjawitz ok wanmiye; biꞌx ma tzꞌel wipune tej twile otok baj xitj aju cytanmi ke nxjalile, ex tej cywile ke cꞌwaꞌl cyucꞌix ke tal cꞌwaꞌl cucx cychꞌuꞌn in che cyimtok tuꞌn weꞌyaj tuj cay.

12 In cymaꞌntok ke tal cꞌwaꞌl te cytxuꞌ: Kaje kwaye ex kaje kcꞌaye, che chi. Ex in che cub tzꞌak cyuj cay te tnam mer ic tzaꞌn at ẍil cyiꞌj, ax in jaw baj cyxew tuj tkꞌab cytxuꞌ.

13 ¿Atpe jun cꞌixcꞌoj tuj tcyakil twitz txꞌotxꞌ o baj ic tzaꞌn jlu, akeye aj Jerusalén? ¿Al ucꞌil baꞌn nmojbanteye aju cꞌixcꞌoj cyiꞌje? ¿Alcye jacu tzꞌajben wuꞌne tuꞌn tkꞌukbanjtz cycꞌuꞌje, akeye aj Sión? Porque maꞌxix aju cꞌixcꞌoj ma tzaj cyiꞌje ic tzaꞌn mar maꞌ t-xeꞌ; ¿alcye baꞌn toc kꞌanan te cyeye?

14 Keju nnoꞌc cykꞌon cyib te t-sanjel Dios ateꞌ cyxole, o tzaj cymaꞌn nimcu cywitzicꞌ cyeye pero mya ax toclen ke jlu ex nokx gan. Ex mintiꞌ cub cychicꞌbaꞌn cywitze aju cyile, tuꞌntzun tbant cytene tuꞌn miꞌn cyxi kꞌiꞌne pres; tzaj cymaꞌn ke witzicꞌ cyeye mya ax toclen ex te sbubl.

15 Oc tilwaj tnam Jerusalén cyuꞌn xjal in che bet tuj be, nnoꞌc cypokꞌchaꞌn cykꞌab te xmaybil; in che ẍutꞌin ex in xi cyyucun cywiꞌ te xmaybil, ex in cymaꞌn tiꞌj tnam Jerusalén: ¿Maj atzunju tnam lu aju nnoꞌc kꞌoꞌn tbi aju mas tbanilxix queꞌyin tuj enter twitz txꞌotxꞌ? Che chi.

16 Cycyakil ke aj kꞌoj tiꞌj tnam Jerusalén in che oc ten xmayil. In che ẍutꞌin, in kitxꞌitxꞌin t-xe cyeꞌ ex in cymaꞌn: Ma baj kxitun tcyakil. Atzun kꞌij lu aju nimxix in ko ayon tiꞌj, matzun ma kil jaꞌlo, che chi.

17 Ma japun tuꞌn Kman aju o baj t-ximan, ma japun baj aju tyol aju cub t-ximan atxix ojtxi. Ma cub t-xitun ju tnam ex mintiꞌ ma tzaj kꞌakꞌan tcꞌuꞌj tiꞌj; ma txi tkꞌoꞌn ambil tuꞌn cyjaw tzeꞌn ke aj kꞌoj cyiꞌje, ex ma txi tkꞌoꞌn cyipun ke aj kꞌoj cyiꞌje.

18 Ke xjal aj Jerusalén in che cubsan twitz Kman. Akeye aj Sión, miꞌn txi cycoline tuꞌn cyokꞌe kꞌijl ex konicꞌan, e tbet taꞌl cywitze ic tzaꞌn jun nima. Miꞌn txi cycoline tuꞌn cyokꞌe ex miꞌn txi cykꞌoꞌne ambil tuꞌn cyojlan ke tbakꞌ cywitze.

19 Che weꞌctze, che schꞌine konicꞌan, cucx che schꞌine tcyakil or; tcyakil bis at tuj cyanmiye cykꞌmanxe te Kman; cykꞌon jaw cykꞌabe twitz cyaꞌj te cubsbil ex cubsan cywitze cyiꞌj cycꞌwaꞌle tuꞌn cyankꞌin, akeju chꞌix cycyim tuꞌn weꞌyaj cyuj cycyakil cay.

20 Queꞌyintza Nman ex ximana tiꞌj aju ma tbinchaya, ax cyiꞌj ke xjal etzan tuꞌna ma tzaj tkꞌoꞌna cꞌixbisabl lu. ¿Baꞌnpe tuꞌn t-xi cychyoꞌn ke txubaj cyal akeju ma in che chꞌuꞌn? ¿Baꞌnpetzun tuꞌn cycub byoꞌn ke pal ex ke t-sanjela tujx tjaya?

21 Ke cꞌwaꞌl ex ke tij xjal palch ke tuj cay; ke cuꞌxun ex ke kꞌapoj ateꞌ tuj Jerusalén ma che cub byoꞌn tuꞌn spad. Tuj kꞌij tej ttzaj tkꞌoja, ma biyuna, ma che cub tbyoꞌna ke xjal ex mintiꞌ ma tzaj kꞌakꞌan tcꞌuꞌja cyiꞌj.

22 Tuꞌna ma tzaj xobajil tuj tcyakil part, mer ic tzaꞌn oc in che tzaj xjal tuj jun ninkꞌij. Nman, tuj kꞌij tej ttzaj tkꞌoja, mi aꞌl jun o tzokpaj. Akeju ẍe chꞌiy wuꞌne ex e oc ncꞌaꞌchane, ma che cub byoꞌn cyuꞌn aj kꞌoj.