2 Ma chinx tiꞌn cyuj ke lugar puro klolj, ex tuꞌn ma chinx tiꞌn tuj be jatum mintiꞌ spicꞌun;

3 cucx in chin oc tcꞌixbisaꞌn tcyakil kꞌij.

4 Ma tijin nchibjale tuꞌn ax icx aju ttzꞌumal nximlale, ma baj ttokin ke nbakile;

5 ma tzꞌoc tpeꞌnin wiꞌjele tuꞌn bis ex tuꞌn cꞌixcꞌoj;

6 ma chin cyaj tkꞌoꞌn tuꞌn wankꞌine tuj klolj ic tzaꞌn keju e cyim ojtxi.

7 Peꞌnin wiꞌje tuꞌn ex mintiꞌ jatum tuꞌn wexe; ma chin cub tcꞌaloꞌn cyuꞌn caden alxix;

8 masque in jaw schꞌine tuꞌn nkanine onbil, pero mintiꞌ tzaj tbiꞌn aju ncubsbile;

9 ma cub tmakoꞌn nbeye cyuꞌn ke abj nmakxix ke, ma baj t-ẍoquin cyiꞌj ke nbeye.

10 Ma tzꞌoc Kman te weye ic tzaꞌn jun txcup oso banin tten tuꞌn toc tzokpaj wiꞌje, ex ic tzaꞌn jun balun tewan tib.

11 Ma chin el ttzpet-saꞌn tiꞌj nbeye, ma chin baj tliẍan, ex ma tzaj tkꞌoꞌn nim xobajil wiꞌje.

12 Ma tzꞌel t-xkinin xobl tplech ex ma bant tten tuꞌn ttzaj t-xoꞌn ke tplech wiꞌje.

13 Ke plech in che tzaj t-xoꞌn Kman wiꞌje nimxix ma cheꞌx xuꞌyl tuj nchibjale.

14 In che xmayin cycyakil nxjalile wiꞌje; tcyakil or oꞌcx akine in chin ajben te cyxmaybil.

15 Ma tzaj tkꞌoꞌn Kman nimxix cꞌixcꞌoj wiꞌje, ex ma tzaj tkꞌoꞌn ncꞌaye puro cꞌa wen.

16 Ma baj tbuchin ke twitz weꞌye tuꞌn ttxaꞌ abj; ma noj wiꞌje tuꞌn tzaꞌj tuꞌn.

17 Mintiꞌtl in chin tene tuj txubtxaj, ex ma tzicꞌ tnaꞌnjtz wuꞌne aju tzalajbil.

18 Ex ma cub nximane cyjaꞌ: Ma baj wipune ex ma naj aju in chin ayone tiꞌj, aju at tuꞌn ttzaj tkꞌoꞌn Kman weye.

19 Naꞌntza aju yajbil, aju bis, ex aju taꞌw ma tzaj wiꞌje.

20 Oc in chin cub tene ximal tiꞌj jlu, biꞌx in tzaj baj ncꞌuꞌje.

21 Pero at jun cucx tuꞌn nximane tiꞌj, ex atzun tuꞌn toc keꞌ ncꞌuꞌje tiꞌj jlu.

22 Aju tcꞌujlalil Kman mintiꞌ bajsbil te, cyjaꞌtzun nok tuꞌnju tkꞌakꞌbil tcꞌuꞌj, te jumajx naꞌnx knaj tuꞌn.

23 Tcyakil prim acꞌaj taꞌ tkꞌakꞌbil tcꞌuꞌj; tzꞌaklxix te Kman, ex in japun tcyakil tyol.

24 Ex in xi nmaꞌne: Ate Kman wetzbile; cyjaꞌtzun oꞌcx tiꞌj kꞌukl ncꞌuꞌje, nchiye.

25 Baꞌn te Kman cyucꞌil keju nnoꞌc keꞌ cycꞌuꞌj tiꞌj ex cyucꞌil keju in che jyon tiꞌj.

26 Baꞌn tuꞌn kcub txuleꞌ ex tuꞌn kayon tiꞌj ju colbil ke tuꞌn Kman.

27 Mas baꞌn te te xjal tuꞌn tocx tkꞌon tib tjakꞌ tcawbil Kman atxix tuj tcuꞌxumal.

28 Ka ma tzaj yajbil tiꞌj xjal tuꞌn Dios, baꞌn tuꞌn tcyaj ten tjunal ex miꞌn kꞌajt;

29 ex baꞌn tuꞌn tcub tmansin tib twitz Kman, porque balo atx chꞌintl oybil te;

30 baꞌn tuꞌn t-xi tkꞌoꞌn tkꞌoꞌtx tuꞌn toc bjuꞌn cyuꞌn ke xjal cyaj tuꞌn cycꞌixbisante te, ex tzicꞌxwit tuꞌn aju yasbil te cyuꞌn xjal.

31 Porque mlay ko cyaj tcolin Kman te jumajx.

32 Masque in tzaj tkꞌoꞌn Dios cꞌixbisabl kiꞌj, ax icx in tzaj kꞌakꞌan tcꞌuꞌj kiꞌj, porque nimxix aju tcꞌujlalil.

33 Porque ax toc mintiꞌ in tzalaj Kman tiꞌj tuꞌn cycꞌixbisanjtz ke xjal tuꞌn ex tuꞌn ticꞌx yajbil cyuꞌn.

34 Ka ma che baj cꞌixbisaꞌn ke pres tuj jun tnam,

35 ex ka mintiꞌ ma txi binchaꞌn cyiꞌj xjal tuj tumelxix twitz Dios,

36 ex ka ma baj yajlaꞌn xjal oc tpon ẍtisil, tcyakil jlu mintiꞌ in cub tuj twitz Dios.

37 ¿Jacupe bant jun tiꞌxti cyuꞌn xjal ka mya a Dios kꞌmalte?

38 Tzaꞌnx ju bis ax icx tzalajbil; in che tzaj jlu tuꞌnju in tmaꞌn Dios aju najl tuj cyaꞌj tuꞌn tbant icju.

39 ¿Tikuꞌn in che okꞌ xjal tzalu twitz txꞌotxꞌ? Baꞌn tuꞌn cyjaw okꞌ xjal tuꞌn tlaj cyil.

40 Ko ximan cyiꞌj ke kbinchben ex ko aj meltzꞌaj juntl maj tucꞌil Kman.

41 Ko ximan tiꞌj Dios aju at tuj cyaꞌj ex ko cubsan twitz, ex kkꞌmanx cyjaꞌ:

42 Ma ko binchane il ex mintiꞌ ma txi knimane tyola, ex mintiꞌ ma cub tnajsaꞌna kile.

43 Ma tzaj nimxix tkꞌoja kiꞌje, ma tzꞌoc lpeꞌya kiꞌje tuꞌn ktzyete tuꞌna, ma ko cub tbyoꞌna ex mintiꞌ ma tzaj kꞌakꞌan tcꞌuꞌja kiꞌje.

44 Ma tzꞌocx tewan tiba tuj jun muj, tuꞌntzun miꞌn tocx knaꞌj Diose tucꞌila.

45 Tuꞌna ma ko el icꞌune cyuꞌn mastl nasyon, ex in che xmayin kiꞌje.

46 Cycyakil aj kꞌoj kiꞌje ma che yolin mya baꞌn kiꞌje;

47 ma ko naje tuꞌn xobajil, tuꞌn cꞌobil ex tuꞌn xitbil; atzun jlu ma tzaj kiꞌje.

48 Nimxix taꞌl nwitze nneꞌl tuꞌn okꞌel tuꞌnju ma che naj ke nxjalile.

49 In chin okꞌe, mintiꞌ ojlabl cye tbakꞌ nwitze, mintiꞌx tuꞌn cykꞌajen,

50 maxlo chin kꞌajele ocxi ktzaj tqueꞌyin Kman aju at tuj cyaꞌj.

51 Ma tzaj taꞌw tuj wanmiye tuꞌnju ma tzꞌoc nqueꞌyine aju ma tzaj cyiꞌj ke xuꞌj ateꞌ tuj ntanmiye.

52 Mintiꞌ jun mya baꞌn ma nbinchaye, nokx gan ma chin tzyete cyuꞌn aj kꞌoj wiꞌje ic tzaꞌn in tzyet jun chyuꞌj;

53 In cuꞌx kꞌoꞌne cyuꞌn tuj jun jul tuꞌn nnaje, ex cuꞌx cyxoꞌn abj wibaje.

54 In cyaj mulkꞌaje tjakꞌ aꞌ, ex o nmaye: Ma chin najxe, nchiye.

55 Nman, max t-xeꞌpun jul o chin cubsane twitza;

56 ex o chin tzaj tbiꞌna; miꞌn tzꞌoc tmaksiꞌna t-ẍcyina tuꞌn miꞌn tbinteya aju ncubsbile.

57 Tej ncubsane twitza, ul lakꞌeꞌya wiꞌje ex tzaj tmaꞌna weye cyjaꞌ: Miꞌn xoba.

58 O colina wiꞌje Nman, ex o chin colpete tuꞌna tuꞌn miꞌn ncyime.

59 Nman, masque mintiꞌ wile, pero ma tila aju mya baꞌn ma binchanjtz wiꞌje, binchanxtzuna wiꞌje.

60 Ma tila aju cykꞌoj wiꞌje ex aju mya baꞌn in baj cyximan wiꞌje.

61 Ma tbiya ke yasbil weye cyuꞌn, ex tcyakilju cyximbetz mya baꞌn in baj cyximan wiꞌje;

62 ke aj kꞌoj wiꞌje nok in che yolin wiꞌje tcyakil kꞌij, ex tuj ewaj in baj cyximan mya baꞌn wiꞌje.

63 Queꞌyintza nok alcyexcu in cybinchaꞌn, oꞌcx in che xmayin wiꞌje.

64 Nman, kꞌon cuba cycastiw ic tzaꞌnx cybinchben mya baꞌn.

65 Maksima cynabl ex kꞌoncuya mya baꞌn cyibaj.

66 Nman, lpeꞌca cyiꞌj tucꞌil tkꞌoja, ex tuꞌn cycub naj tuꞌna tzalu twitz txꞌotxꞌ.