2 Ke xjal najl tuj Jerusalén, akeju cꞌujlaꞌnxix nej mas twitz kꞌan pwak tbanilxix, atzun jaꞌlo ic in che oc kꞌoꞌn ic tzaꞌn cꞌil binchamaj tiꞌj txꞌotxꞌ tuꞌn jun xjal baꞌn binchan cꞌil.

3 Tzinlpe in xi cykꞌoꞌn ttxuꞌ xoꞌj cychꞌuꞌ cyal, atzun ke nxjalile jawni ke, ic tzaꞌn jun chyuꞌj avestrús najl tuj tzkij txꞌotxꞌ.

4 Aju cyakꞌ ke tal neꞌ cucx cychꞌuꞌn nnoꞌcx tlacꞌon tib tuj cycꞌoꞌn tuꞌn tlaj txketleꞌn. In che kanin tal cꞌwaꞌl tiꞌj cywa pero mi aꞌl jun baꞌn t-xi kꞌonte cywa.

5 Ke xjal tbanil cywa nej, atzun jaꞌlo in che cyim tuꞌn taꞌw weꞌyaj cyuj cay. Keju ma che chꞌiy tuj tbanil ja, atzun jaꞌlo najlke tuj ttxa tzꞌis.

6 Porque aju cyil ke nxjalile mas nim twitz ju il cybincha aj Sodoma aju cub xitj tuj junx rat, ex mi aꞌltok jun xjal otok tzꞌoc tzokpaj tiꞌj.

7 Ke nejenel at cyxol, mas sak che queꞌyin ic tzaꞌn ttxa cheꞌw ex mas sak ic tzaꞌn lech; aju cyximlal mas cyak queꞌyin ic tzaꞌn tal abj coral; tbanilxix che queꞌyin ic tzaꞌn tal abj zafiro.

8 Atzun jaꞌlo jumajx kꞌek queꞌyin cywitz, oc cyex betel mi aꞌl jun jacu tzꞌel tnicꞌ cyiꞌj. Aju ttzꞌumal cyximlal ma tzꞌoc tzkij tiꞌj cybakil, ma tzkij ic tzaꞌn siꞌ.

9 Mas txubtxaj o tzꞌel cye keju e cyim tuj kꞌoj cywitz keju e cyim tuꞌn weꞌyaj, porque ake jlu cheba e cyim tej mintiꞌtl tzaj cnet cywa.

10 Ke xuꞌj mejorxix cyanmi, tuꞌnx cykꞌab jax cytzkꞌajsaꞌn cyal ex xi cychyoꞌn tej ttzaj xitbil cyiꞌj nxjalile.

11 Atzun jaꞌlo ma jatz baj tkꞌoj Dios, ma tzaj nimxix ttxꞌuꞌjil; ma tzꞌoc tkꞌoꞌn tkꞌakꞌal tnam Sión, ex tcyakil ma cub tzꞌeꞌy tuꞌn, ex cyucꞌix ke t-simyentil tnam ma che cub tzꞌeꞌy.

12 Ke rey ex ke xjal tuj tcyakil twitz txꞌotxꞌ mintiꞌ xi cyniman ka jacu che octz aj kꞌoj tuj tnam Jerusalén.

13 O tzaj tcyakil jlu cyiꞌj tuꞌn tlaj ju il cybincha ke t-sanjel Dios, ex tuꞌn tlaj ju mya baꞌn o cybincha ke pal, tuꞌnju cub cybyoꞌn ke xjal tzꞌaklxix ax tuj tnam.

14 Jaꞌlo ax ke xjal lu in che ẍocjeꞌ cyuj cay ic tzaꞌn moẍ ke, nojni cyiꞌj tuꞌn chicꞌ ex cyjaꞌtzun mi aꞌl jun jacu tzꞌoc maconte cyxbalun.

15 Cyel lakꞌeye, tzꞌil keye, cyel lakꞌeye, cyel lakꞌeye; miꞌn ko oc cymacoꞌne, che chi xjal cye. Ke xjal lu e jeꞌl ok ex baj cysputun cyib, atzun ke xjal cyuj mastl nasyon cyma: Mya baꞌn tuꞌn cynajan xjal lu kxol, che chi.

16 Ax te Kman baj sputunte cye ex mintiꞌtl e oc tcwentin. Mya xoꞌn ke pal cyuꞌn xjal ex mintiꞌ tzaj kꞌakꞌan cycꞌuꞌj cyiꞌj ke tij xjal.

17 Ma che sict ke tbakꞌ kwitz tuꞌnju nim ma ko ayon tiꞌj jun onbil, pero nokx gan jlu. Aju tnam in ko ayon tiꞌj tuꞌn tul onil ke, mlayx ko colpet tuꞌn.

18 Toc cywitz aj kꞌoj kiꞌj nok jatum in ko ex betel, tuꞌn jlu mlayx ko bet tuj cay. Aju bajsbil tuj kkꞌij chꞌix tul ex ma tzul canun kꞌij tuꞌn knaj.

19 Ke aj kꞌoj kiꞌj mas cyuw che ojkelan cywitz ke tꞌiw in che lipan twitz cyaꞌj; ma che oc lpeꞌ kiꞌj cywiꞌ ke witz tuꞌntzun ktzyet cyuꞌn, ex ma che cub ten xkꞌukil kiꞌj tuj tzkij txꞌotxꞌ.

20 Aju rey scꞌoꞌmaj tuꞌn Kman ma tzꞌocx presin, aju baꞌntok in ko ankꞌin tuꞌn, ex tuj kwitz tuꞌn kankꞌin segurxix tjakꞌ tcawbil cyxol ke nasyon.

21 Cyjaw tzeꞌne ex che tzalajxe akeye aj Edom; akeye najl tuj txꞌotxꞌ Uz. Pero ax icx cyeye cbel cycastiwoye cyuwxix wen; oc che ẍocjebile ex che cyjel tene mintiꞌ cyxbalune toc.

22 Akeye aj Sión ma japun baj cycastiwoye ex mlay che ex lajoꞌntle tuꞌn Kman tuꞌn cyxi kꞌiꞌntle pres tuj juntl tnam. Atzun cyeye aj Edom, cbel cycastiwoye tuꞌn tlaj cybinchbene mya baꞌn, ex ke cyile che elel tuj kꞌanchaꞌl tuꞌn Kman.