—Cxel kkanine jun kkanbetze teya ex miꞌn cub t-xcꞌaꞌyina: Cubsana kiꞌje twitz Kman Dios, a koꞌye nicꞌxi kbete ma cyaj ten, porque baꞌn tuꞌna, tnejel nim kbete, atzun jaꞌlo nicꞌxi kbete at ic tzaꞌn in tila. 3 Kaninxa te Kman Dios tuꞌn ttzaj tyecꞌun alcye be cxel kiꞌne, ex alcye tuꞌn tbant kuꞌne, che chi.

4 Atzunte Jeremías xi ttzakꞌweꞌn:

—Baꞌn, chin cubsale twitz Kman Dios cyiꞌje, ic tzaꞌn ma tzaj cymaꞌne weye, ex cxel nmaꞌne cyeye tcyakilju ctzajel tmaꞌn Kman weye, mlay cub wewane jun tyol.

5 Xitzun cymaꞌn xjal te Jeremías:

—Tzajxwit jun mya baꞌn kibaje tuꞌn Kman Dios ka mintiꞌ ma bant kuꞌne tcyakilju ctzajel tmaꞌn Dios teya. 6 Nok alcyex yol ctzajel tmaꞌn Kman Dios teya, ka baꞌn ex ka mya baꞌn, cxel knimane, porque ma txi kmaꞌne teya tuꞌn t-xi tkanina te, ex cbantel kuꞌne aju ctzajel tmaꞌn teya, tuꞌntzun tel baꞌn keye.

7 Tbajlenxi laj kꞌij, tzaj yolin Kman tucꞌil Jeremías. 8 Tzajtzun txcoꞌn Johanán aju tcyꞌajal Carea tuꞌn Jeremías, cyucꞌix ke nejenel cye soldad, akeju ateꞌtok tucꞌil, cyucꞌix cycyakil xjal, 9 ex xi tmaꞌn cye: Ate Kman aju Cydios aj Israel, aju tzaj cymaꞌne weye tuꞌn ncubsane twitz, in tmaꞌn cyjaꞌ: 10 Ka ax ma che cyaj tene najal tuj txꞌotxꞌ lu, cjawil nbinchaꞌne juntl maj cytanmiye ex mlay cub nxitune; cucx che tele segur tuj txꞌotxꞌ lu ex mlay che ex nlajoꞌne, porque ma tzaj nbise tuꞌn tlaj cꞌixcꞌoj ma tzaj nsamaꞌne cyibaje. 11 Miꞌn che xobe twitz rey te Babilonia aju in che xobe twitz; miꞌn tzaj tchi cyiꞌje, porque atine cyucꞌile tuꞌn cyclete ex tuꞌn cycolpaje tjakꞌ tcawbil wuꞌne. Akine Dios in chin kꞌmante jlu. 12 Ctzajel kꞌakꞌan ncꞌuꞌje cyiꞌje ex wuꞌne ctzajel kꞌakꞌan tcꞌuꞌj rey Nabucodonosor cyiꞌje, tuꞌn cyaj meltzꞌaje tuj cytanmiye, chi Kman.

13 Pero ka miꞌn ma che cyaj tene tuj txꞌotxꞌ lu, ex ka miꞌn ma txi cynimane tyol Kman aju Cydiose, 14 ex ka ma cymaye: Mas kajbile tuꞌn kxiꞌye najal tuj Ejipt jatum mlay kilaꞌye kꞌoj, mi tuꞌn kbinteye tkꞌajkꞌajel chun ex jatum mlay ko cyime tuꞌn weꞌyaj, ka che chiye, 15 entons akeye ma che cyaj tene tuj Judá, cybintze aju in tmaꞌn Kman cyeye. Ate Kman aju Tajaw Tcyakil ex Cydios aj Israel chi cyjaꞌ: Ka ma tzꞌoc cykꞌoꞌne il tiꞌj tuꞌn cyxiꞌye najal tuj Ejipt, 16 cpol canun kꞌoj ex weꞌyaj cyiꞌje, aju nimxix in che xobe tiꞌj ex maxtzun che cymele tuꞌn. 17 Cycyakil keju che xeꞌl najal tuj Ejipt, max ma chixin che cymel tuꞌn kꞌoj, tuꞌn weꞌyaj ex tuꞌn txꞌuꞌj yabil. Mi jun cyjel ankꞌin ex mi jun ctzokpajel tuꞌn cꞌixbisabl cxel nsamaꞌne cyibaj, chi Kman.

18 Ate Kman aju Tajaw Tcyakil ex Cydios aj Israel chi cyjaꞌ: Ic tzaꞌn o tzaj nkꞌoje ex ntxꞌuꞌjile cyiꞌj keju e ten tuj tnam Jerusalén, cyjaꞌxtzun ctzajel nkꞌoje cyiꞌje ka ma cheꞌxe najal tuj Ejipt. Che elel icꞌune cyuꞌn xjal, che jawil secꞌpaj cyiꞌje, ctzajel cykanin mya baꞌn cyibaje, che xmayil cyiꞌje ex mlay cyile juntl maj ju lugar lu, chi Kman. 19 Akeye chꞌintl xjal aj Judá, ma tzaj tkꞌoꞌn Kman jun orden cyeye tuꞌn miꞌn cyxiꞌye najal tuj Ejipt. Tzꞌelx cynicꞌe tiꞌj ju cxel nmaꞌne cyeye jaꞌlo. 20 Aju ma tzaj cymaꞌne weye tuꞌn t-xi nkanine, nok tten cyuꞌne, porque ax keye tzaj cymaꞌne weye tuꞌn nxi yoline tucꞌil Kman aju Kdios, ex tzaj cymaꞌne tuꞌn ncubsane cyiꞌje twitz Kman. Ax icx tzaj cymaꞌne weye: Kꞌmantza keye tcyakilju ctzajel tmaꞌn Dios teya, tuꞌntzun tbant kuꞌne, che chitzune, pero nok tten cyuꞌne. 21 Matzun txi nmaꞌne cyeye jaꞌlo aju ma tzaj tmaꞌn Kman weye tuꞌn t-xi nmaꞌne cyeye, pero cycꞌiꞌye txi cynimane. 22 Cyjaꞌtzun tzꞌelx cynicꞌe tiꞌj jlu: Che cymele tuꞌn kꞌoj, tuꞌn weꞌyaj ex tuꞌn txꞌuꞌj yabil tuj txꞌotxꞌ jatum cyaje tuꞌn cyxiꞌye najal, chi Jeremías cye.