Tej t-xi kꞌiꞌn Jeremías tuj Ejipt
43
Tej tbaj tmaꞌn Jeremías tcyakil aju tzaj kꞌmaꞌn te tuꞌn Kman aju Cydios tuꞌn t-xi tmaꞌn cye tnam xjal, 2 ate Azarías aju tcyꞌajal Osaías, tucꞌix Johanán aju tcyꞌajal Carea, ex mastl xinak akeju jawni ke, xi cymaꞌn te Jeremías cyjaꞌ: Aju in tmaꞌna nok tten. Mya a Kman aju Kdios ma tzaj kꞌmante teya tiꞌj ju ma tzaj tmaꞌna keye, tuꞌn miꞌn kxiꞌye najal tuj Ejipt. 3 Ate Baruc aju tcyꞌajal Nerías in ocsante tcꞌuꞌja tuꞌn ttzaj tmaꞌna jlu keye, tuꞌntzun kcub tzꞌake tuj cykꞌab aj Caldey, tuꞌntzun kcub byoꞌne cyuꞌn ex ka tuꞌn kxi kꞌiꞌne cyuꞌn tuj Babilonia, che chi.4 Cyjaꞌtzun, ate Johanán ex ke nejenel cye soldad cyucꞌix cycyakil xjal, mintiꞌ xi cyniman aju tzaj tmaꞌn Kman cye tuꞌn cycyaj ten tuj txꞌotxꞌ Judá. 5 Nok oꞌcx ate Johanán, cyucꞌix ke nejenel cye soldad, e oc cychmoꞌn ke xjal, akeju otok che baj sputj tuj junjun nasyon ex otok che ul meltzꞌaj juntl maj tuꞌn cynajan tuj txꞌotxꞌ Judá, 6 cyucꞌix ke xinak, ke xuꞌj, ke cꞌwaꞌl, ke tmeꞌjel rey ex cycyakil xjal, akeju otok che cyaj kꞌoꞌn tuj tcwent ktzan Gedalías tuꞌn Nabuzaradán aju nejenel cye soldad, ex tucꞌix Jeremías ex Baruc e oc te tajlal.
7 E jeꞌx tuj Ejipt ex e pon max tuj tnam Tafnes, porque mintiꞌ xi cybiꞌn aju otok tzaj tmaꞌn Kman cye. 8 Maxtzun tuj tnam Tafnes tzaj yolin Kman tucꞌil Jeremías ex tma: 9 Kꞌintza junjun ma tij abj, ex cywitztzun aj Judá, makuꞌn cuꞌxa ke jatum tcub piso tumlal ttzi tja rey Faraón tuj tnam Tafnes, 10 ex kꞌmanxa cye: Ate Kman aju Tajaw Tcyakil ex Cydios aj Israel chi cyjaꞌ: Ctzajel wiꞌne nmajene Nabucodonosor, aju rey te Babilonia, ex cbel nkꞌoꞌne tkꞌukbil cyibaj ke abj ma che cuꞌx tmakuꞌna tzalu, ex cjawil tlicꞌun t-xmuj cyibaj. 11 Tzul rey Nabucodonosor kꞌojlel tiꞌj Ejipt. Akeju banin cyiꞌj tuꞌn cycyim, che cymel, akeju banin cyiꞌj tuꞌn cyxi kꞌiꞌn pres tuj juntl tnam, che xel kꞌiꞌn pres, ex akeju banin cyiꞌj tuꞌn cycyim tuj kꞌoj, tuj kꞌoj che cymel. 12 Cꞌoquel tkꞌoꞌn tkꞌakꞌal cyja cydios xjal tuj Ejipt ex che xel tiꞌn ke tilbilal nnoꞌc cydiosin; cxel tiꞌn tcyakilju at tuj tnam Ejipt ic tzaꞌn jun pastor in baj t-skucꞌin tiꞌj t-ẍjoꞌw, ex mi jun clabtel tiꞌj oc taj meltzꞌaj. 13 Ax icx cbel t-xitun ke tkan adorn toc cyilbilal cyiꞌj, akeju ateꞌ tuj Bet-semes aju at tujx tcwent Ejipt, ex cꞌoquel tkꞌoꞌn tkꞌakꞌal cyja cydios xjal aj Ejipt.