7 Cyjaꞌtzun, akine Dios Tajaw Tcyakil ex Cydios aj Israel in xi nmaꞌne jlu: ¿Tikuꞌn cyuꞌnxe in tzaj cyiꞌne mya baꞌn matijxix cyibaje? Porque tuꞌn cybinchbene mya baꞌn che cymele cycyakile akeye aj Judá. Che cymel ke xinak, ke xuꞌj, ke cꞌwaꞌl ex keju cucx cychꞌun, ex mi jun cyjel ten. 8 ¿Tikuꞌn in chin oc cyicꞌlene tuꞌn ttzaj nkꞌoje cyiꞌje, tuꞌnju in cub cypatune storac cywitz ke tilbilal tzalu tuj Ejipt, jatum ma che ule najal? Cyuꞌnxe che najele. Che elel icꞌune cyuꞌn xjal cyuj cycyakil nasyon twitz txꞌotxꞌ ex cxel cykanin mya baꞌn cyibaje. 9 ¿Maj o tzicꞌ tnaꞌl cyuꞌne tcyakil mya baꞌn o cybincha ktzan cyxeꞌchele tuj txꞌotxꞌ Judá ex cyuj ke cay te Jerusalén, ex aju mya baꞌn cybincha ke rey te Judá ex ke cyxuꞌjil, ex aju cyeye cybinchben mya baꞌn, ex ju mya baꞌn cybincha cyxuꞌjile? 10 Ex cucx jaꞌlo naꞌnx tajtz tiꞌj cyanmiye ex mintiꞌ in che xobe nwitze, ax icx mintiꞌ in che japun ke nxnakꞌtzbile ex ke nleye cyuꞌne, aju xi nmaꞌne cyeye ex cye ktzan cyxeꞌchele.

11 Cyjaꞌtzun akine Dios Tajaw Tcyakil ex Cydios aj Israel cxel nmaꞌne jlu cyeye: Ma cub nximane tuꞌn ttzaj nsamaꞌne mya baꞌn cyibaje ex tuꞌn cynaj cycyakil aj Judá wuꞌne. 12 Che najel cycyakil aj Judá wuꞌne, akeju oc cykꞌoꞌn il tiꞌj tuꞌn cyul najal tuj Ejipt. Cycyakil xjal ex cꞌwaꞌl che cymel tuꞌn kꞌoj ex tuꞌn weꞌyaj. Cxel cykanin xjal mya baꞌn cyibaj, che elel icꞌun, che oquel xmayin ex che jawil secꞌpaj xjal cyiꞌj. 13 Cbel cycastiw aj Judá wuꞌne, akeju najl tuj Ejipt, tuꞌn kꞌoj, tuꞌn weꞌyaj ex tuꞌn txꞌuꞌj yabil, ic tzaꞌn cye aj Jerusalén cub cycastiw wuꞌne. 14 Akeju aj Judá nicꞌxi cybaj o cyaj ten ex o che ul najal tuj Ejipt, mi jun ctzokpajel, cycyakil che cymel. Masque cyaj tuꞌn cyaj meltzꞌaj juntl maj najal tuj Judá, mlayx che aj; nok junjun che ajel ok cyxol keju otok che ul tuj Ejipt, chi Dios.

15 Atzun ke xinak baꞌntok cyuꞌn ka in cub cypatun cyxuꞌjil storac cywitz ke tilbilal, cyucꞌix cycyakil xuꞌj ateꞌtok cyucꞌil, cycyakil jlu nimcu cybaj, cyucꞌix ke xjal Judiy akeju najltok tuj txꞌotxꞌ Patros ex tuj Ejipt, xi cytzakꞌweꞌn te Jeremías cyjaꞌ:

16 —Mlayx txi knimane aju yol ma tzaj tmaꞌna keye ka tuꞌn Kman ma tzaj tmaꞌn teya. 17 Cucx cbantel kuꞌne aju cub kximane tuꞌn tbant. Cucx cbel kpatune storac, cucx cbel kkoꞌne koyaje taꞌl twitz uva twitz dios toc tbi Xuꞌj Rey te tuj Cyaꞌj, ic tzaꞌn o bant kuꞌne ojtxi, ex atzun jlu o cybincha ktzan kxeꞌchele cyuj ke tnam tuj Judá ex cyuj ke cay te Jerusalén, ex ax cybincha ke kreye e ten ojtxi ex ke nejenel. Porque ojtxi nimtok kwaye at, tcyakil baꞌn ela keye ex mintiꞌ jun mya baꞌn tzaj kibaje; 18 pero tej t-xi kcoline tuꞌn tcub kpatune storac ex tuꞌn tcub kkoꞌne koyaje taꞌl twitz uva twitz dios toc tbi Xuꞌj Rey te tuj Cyaꞌj, tcyakil atx taj keye ex in ko cyime tuꞌn weꞌyaj ex tuj kꞌoj.

19 Ax icx tzaj cytzakꞌweꞌn ke xuꞌj cyjaꞌ:

—Tej tcub kbinchaꞌne wabj toc tilbilal dios Xuꞌj Rey te tuj Cyaꞌj twitz, ex tej tcub kpatune storac ex cub kkoꞌne oyaj taꞌl twitz uva te, baꞌntok jlu cyuꞌn kchmile, che chi.

20 Xitzun ttzakꞌweꞌn Jeremías cye cycyakil xinak ex xuꞌj, akeju otok tzaj cymaꞌn icju:

21 —¿Che chipetzune ka mintiꞌ oc tkꞌoꞌn Kman cwent tiꞌj ex ka ma tzicꞌ tnaꞌl tuꞌn aju o cybinchaye cyucꞌix ktzan cyxeꞌchele, ke cyreye, ke nejenel cyeye ex cycyakil tnam xjal, tej tcub cypatune storac cywitz ke tilbilal cyuj ke tnam te Judá ex cyuj ke cay te Jerusalén? 22 Ma baj tpasens Kman tiꞌj cybinchbene mya baꞌn ex puro icꞌbilxix. Cyjaꞌtzun ma cub xitj cytanmiye ex mi aꞌl xjal najl tuj, ma txi cykanin xjal mya baꞌn tibaj ex ma che jaw secꞌpaj tiꞌj, 23 tuꞌnju cub cypatune storac cywitz ke tilbilal ex e binchane il twitz Kman. Porque mintiꞌ xi cynimane ke t-xnakꞌtzbil ex ke tley ex mintiꞌ japun cyuꞌne aju tzaj tmaꞌn Kman cyeye, cyjaꞌtzun ma tzaj mya baꞌn cyiꞌje ic tzaꞌn in cyile jaꞌlo.

24 Ax icx xi tmaꞌn Jeremías cye cycyakil tnam xjal ex cye xuꞌj:

—Cybintze tkanil lu tuꞌn Kman, cycyakile akeye aj Judá najl tzalu tuj Ejipt. 25 Ate Kman aju Tajaw Tcyakil ex Cydios aj Israel chi cyjaꞌ: Akeye cyucꞌix cyxuꞌjile in cybinchaꞌne aju ma cymaye tej t-xi cytziyane cyjaꞌ: Cbel kpatune storac ex cbel kkoꞌne oyaj taꞌl twitz uva te dios toc tbi Xuꞌj Rey te tuj Cyaꞌj, ex il tiꞌj cjapunel kuꞌne aju ma txi ktziyane, che chiye. Baꞌn, japunx cyuꞌne ex cybinchame aju o txi cytziyane, 26 pero cybintze aju cxel nmaꞌne cyeye cycyakile, akeye aj Judá najl tuj Ejipt: Cxel nmaꞌne jun nyole axix toc ex ax nbiye maꞌ toclen ctzajel nnaꞌne tiꞌj: Mi jun aj Judá cꞌajbel nbiye tuꞌn, tuꞌn t-xi tmaꞌn jun yol axix toc tuj tcyakil txꞌotxꞌ Ejipt. 27 Porque cꞌoquel ten ncwente cyiꞌj tuꞌn ttzaj nsamaꞌne cꞌixbisabl cyibaj ex mya jun baꞌn ctzajel nkꞌoꞌne cye. Cycyakil aj Judá najl tuj Ejipt che cymel tuꞌn kꞌoj ex tuꞌn weꞌyaj. 28 Nicꞌxi cybaj che tzokpajel tuꞌn miꞌn cycyim tuj kꞌoj, ex che ajel meltzꞌaj tuꞌn cypon tuj Judá. Cyjaꞌtzun, cycyakil keju otok che cyaj ten tuj Judá ex ma che ul najal tuj Ejipt oc cyilaꞌ alcye yol otok japun, ka aju weye nyol ex ka aju cye cyyol. 29 Akine Dios cxel nkꞌoꞌne jun techal cyeye, tuꞌn tel cynicꞌe tiꞌj ka cjapunel nyole tuꞌn ttzaj mya baꞌn cyibaje, ex ka cbel cycastiwoye wuꞌne tuj tnam lu: 30 Cxel nkꞌoꞌne Faraón Hofra aju rey te Ejipt tuj cykꞌab ke tajkꞌoj, akeju nnoꞌc tilil cyuꞌn tuꞌn tcub cyuꞌn, ic tzaꞌn xi nkꞌoꞌne Sedequías aju rey te Judá tuj tkꞌab Nabucodonosor aju rey te Babilonia ex aju aj kꞌoj tiꞌj, aju oc tilil tuꞌn tuꞌn tcub Sedequías tuꞌn, chi Kman, chi Jeremías.