Tej ttzyet tnam Jerusalén cyuꞌn aj kꞌoj
39
Tuj tlajin xjaw te tbelajin abkꞌi ttzyetlen tcawin rey Sedequías tuj Judá, ul Nabucodonosor aju rey te Babilonia, cyucꞌix cycyakil t-soldad, ex baj cytxolban cyib tiꞌjele tnam Jerusalén. 2 Tuj tbelajin kꞌij te tcyajin xjaw te tjunlajin abkꞌi ttzyetlen tcawin Sedequías, ocx cypaꞌn aj kꞌoj jun piẍ muro toc tiꞌj tnam Jerusalén, 3 ex cycyakiltzun ke xjal maꞌ cyoclen ttxlaj rey te Babilonia e ocx tuj tnam ex e cub ten ttzi pwert tcub tuj tmij tnam Jerusalén. Atzun ke jlu: Nergal-sarezer, Samgar-nebo, Sarsequim, aju xjal lu maꞌxix toclen, ex tucꞌix juntl Nergal-sarezer ax icx maꞌxix toclen ttxlaj rey, cyucꞌix mastl nejenel maꞌ cyoclen ttxlaj.4 Tejtzun tlonte Sedequías ex ke t-soldad aju in baj, e ex ok tuj tnam te konicꞌan, ttzi pwert tcubsaꞌn t-xol cabe muro tuj be nneꞌx tuj tkan tawal rey, ex atzun be xi cyiꞌn, aju in pon tuj chkꞌajlaj te nima Jordán. 5 Pero e jeꞌx lpeꞌ ke soldad cye aj Caldey cyiꞌj ex cub tiꞌj Sedequías cyuꞌn tuj chkꞌajlaj te tnam Jericó; tzyettzun cyuꞌn ex xi cyiꞌn tuj tnam Ribla tuj cytxꞌotxꞌ aj Hamat, porque atzun taꞌtok rey te Babilonia, ex atzun cub t-sentens Sedequías tuꞌn Nabucodonosor. 6 Axtzun tuj Ribla ex twitzx Sedequías, e cub byoꞌn ke tcꞌwaꞌl cyucꞌix cycyakil xjal maꞌ cyoclen tuj Judá. 7 Te tibajxi e jatz kꞌiꞌn ke tbakꞌ twitz Sedequías ex oc cꞌaloꞌn tuꞌn caden, tuꞌntzun t-xi kꞌiꞌn tuj Babilonia.
8 Oc cykoptzꞌiꞌn aj Caldey kꞌakꞌ tiꞌj tja rey ex cyiꞌj ke ja ateꞌ tuj tnam ex cub cytilin muro toc tiꞌjele tnam Jerusalén. 9 Ax icx te Nabuzaradán aju nejenel cye t-soldad rey te Babilonia, e jeꞌx tiꞌn ke xjal pres, akeju chꞌintl otok che cyaj ten, ax icx e jeꞌx tiꞌn keju otok txi cykꞌon cyib tuj cykꞌab aj Caldey; cycyakiltzun e jeꞌx tiꞌn tuj Babilonia. 10 Pero e cyaj tkꞌoꞌn Nabuzaradán junjun xjal tuj txꞌotxꞌ Judá, akeju mas tal mebaxix ex mintiꞌ chꞌin at cye, ex xi tkꞌoꞌn cytxꞌotxꞌ ex tkan uva cye.
Tej tetz Jeremías tuj pres
11 Otok cyaj tmaꞌn Nabucodonosor aju rey te Babilonia, te Nabuzaradán aju nejenel cye t-soldad, jun orden tiꞌj Jeremías cyjaꞌ: 12 Kꞌintza ex cwentin oca, miꞌn tbinchaya mya baꞌn tiꞌj, nok oꞌcx binchama tcyakil aju ctzajel tmaꞌn teya. 13 Entons, ate Nabuzaradán aju nejenel cye t-soldad rey, tucꞌix Nabusazbán aju nejenel cye keju in che ajben te rey, ex Nergal-sarezer aju nejenel cye aj sanjelal, cyucꞌix mastl xjal at cyoclen ttxlaj rey te Babilonia, 14 xi cymaꞌn tuꞌn tetz kꞌiꞌn Jeremías tuj ttxaꞌn cypeꞌn soldad, ex xi cykꞌoꞌn tuj tcwent Gedalías aju tcyꞌajal Ahicam ex tal tchman Safán, tuꞌn t-xiꞌ kꞌolte te max tja. Cyjaꞌtzun cyaj ten Jeremías najal cyxol ke ttanmil.
Xi ttziyan Dios tuꞌn ttzokpet Ebed-melec
15 Tej tocxtok Jeremías tuj pres ttxaꞌn cypeꞌn ke soldad xkꞌukil tja rey, aju ttxaꞌn peꞌn tocx tujxi, tzaj yolin Kman tucꞌil ex tma cyjaꞌ: 16 Txiꞌya ex kꞌmanxa te Ebed-melec aju aj Etiopía: Chitzun Kman aju Tajaw Tcyakil ex Cydios aj Israel cyjaꞌ: Cjapunel wuꞌne aju o txi nmaꞌne tuꞌn tbant tiꞌj tnam lu; ctzajel mya baꞌn tiꞌj ex mya jun baꞌn, ex cꞌoquel tqueꞌyina oc tjapun jlu. 17 Pero tuj tkꞌijlalil lu oc cletela wuꞌne, mlay cub tzꞌaka tuj cykꞌab xjal lu, akeju in xoba cywitz. Akine Dios in chin kꞌmante jlu. 18 Axix toc oc cletela wuꞌne tuꞌn miꞌn tcub byoꞌna cyuꞌn, oc cletela tuꞌnju ma tzꞌoc keꞌ tcꞌuꞌja wiꞌje. Akine Dios in chin kꞌmante jlu.