4 Xitzun cymaꞌn ke xjal maꞌ cyoclen te rey:

—E tcub byet xjal lu, porque nok tuꞌn tlaj tyol in tzaj baj cycꞌuꞌj ke soldad ateꞌx tuj tnam ex mastl xjal. Aju xjal lu mintiꞌ in jyon tiꞌj tuꞌn cyten xjal tuj txubtxaj, nok in jyoꞌn mya baꞌn tuꞌn ttzaj cyibaj.

5 Atzunte rey Sedequías xi ttzakꞌweꞌn:

—Ax baꞌn, cybinchame tiꞌj nok alcye cyaje. Mlay bant tuꞌn cyoc nmayoꞌne.

6 Tzyettzun Jeremías cyuꞌn, ex tiꞌj sakbak cuꞌx cykꞌoꞌn tuj jun jul tcubsaꞌn tuj ttxaꞌn cypeꞌn soldad xkꞌukil tja rey, aju ttxaꞌn peꞌn tocx tujxi. Aju jul lu, te Malquías aju tcyꞌajal rey. Tuꞌnju mintiꞌtok aꞌ tuj jul lu, nok oꞌcx soban, cyjaꞌtzun e jeꞌx baj ke tkan Jeremías tuj soban. 7 O tbi Ebed-melec aju aj Etiopía ex aju in akꞌnan tuj tja rey ka otok cuꞌx kꞌoꞌn Jeremías tuj jul, ex tej kꞌukltok rey ttzi tpwertil tnam, Benjamín tbi, 8 etz Ebed-melec tuj tja rey ex xiꞌ kꞌmalte te rey ka otok cuꞌx kꞌoꞌn Jeremías tuj jul.

9 —Tat Rey chi, matijxix jun mya baꞌn ma cybincha xjal tiꞌj Jeremías aju t-sanjel Dios. Ma cuꞌx cykꞌoꞌn tuj jun jul ex chꞌix tcyim tuꞌn weꞌyaj, porque mintiꞌ wabj at tuj tnam.

10 Atzunte rey xi tmaꞌn te Ebed-melec tuꞌn t-xi tiꞌn 30 xjal tucꞌil, tuꞌn tjatz cyiꞌn Jeremías tuj jul acux naꞌnxtok tcyim. 11 Xitzun tucꞌin Ebed-melec ke xjal ex xiꞌ tuj tja rey jatum taꞌ cꞌubl xbalun, etz tiꞌn junjun xbuꞌk, cuꞌx tkꞌoꞌn te Jeremías tiꞌj sakbak tuj jul, 12 ex xi tmaꞌn te:

—Kꞌon ocxa ke xbuꞌk lu tuj t-xakloꞌtxa, tuꞌntzun mi tcꞌixbiya tuꞌn sakbak, chi Ebed-melec, ex o tbincha Jeremías icju. 13 Jatztzun jawoꞌn Jeremías cyuꞌn xjal tiꞌj sakbak tuj jul. Te tibajxi jlu, axtzun cyaj ten Jeremías ttxaꞌn cypeꞌn soldad xkꞌukil tja rey, aju ttxaꞌn peꞌn tocx tujxi.

14 Xitzun tmaꞌn rey Sedequías tuꞌn tpon kꞌiꞌn Jeremías aju t-sanjel Dios, tuꞌn tyolin tucꞌil tuj toxin ttzi ja te tja Dios. Tejtzun tpon, xi tmaꞌn rey te:

—Cxel nkanine jun nxjele teya, ex waje tuꞌn miꞌn tcub tewana jun tiꞌxti nwitze.

15 Atzunte Jeremías xi ttzakꞌweꞌn:

—Tat Rey, ka ma txi ntzakꞌweꞌne t-xjela, jaculo chin cub tbyoꞌna, ex ka ma txi nkꞌoꞌne jun tconseja, mlaylo chinx tbiꞌna.

16 Pero xi ttziyan rey Sedequías jun tyol axix toc te Jeremías tuj ewaj cyjaꞌ:

—Cxel nmaꞌne jun nyole axix toc twitz Kman aju in kꞌonte kchwinklal: Mlay cub nbyoꞌne ex mlay txi nkꞌoꞌne tuj cykꞌab keju cyaj tuꞌn tcub byoꞌna cyuꞌn.

17 Xitzun tmaꞌn Jeremías te Sedequías:

—Ate Kman aju Tajaw Tcyakil ex Cydios aj Israel in tmaꞌn: Ka ma txi tkꞌon tiba tuj cycwent ke nejenel cye t-soldad rey te Babilonia, cyucꞌix keju ateꞌ tuj tjaya, cletela ex mlay tzꞌoc kꞌoꞌn tkꞌakꞌal tnam lu. 18 Pero katzun miꞌn ma txi tkꞌon tiba tuj cycwent, ctzyetel tnam cyuꞌn aj Babilonia ex cꞌoquel cykꞌoꞌn tkꞌakꞌal; atzun teya, mlay tzokpaja tuj cykꞌab.

19 Atzunte Sedequías xi ttzakꞌweꞌn:

—In chin xobe tuꞌn t-xi nkꞌon wibe tuj cycwent aj Babilonia; mya yajcu chinx kꞌoꞌne tuj cykꞌab xjal judiy, akeju ma txi cykꞌon cyib cyucꞌil, porque jaculo chin cꞌixbisanjtze nim cyuꞌn.

20 Xi ttzakꞌweꞌn Jeremías:

—Mlay txi kꞌoꞌna tuj cykꞌab xjal Judiy. Binxa tyol Kman aju in xi nmaꞌne teya, porque ka ma txi tbiꞌna, baꞌn cꞌelel te teya ex mlay cub byoꞌna, 21 pero katzun miꞌn taja tuꞌn t-xi tkꞌon tiba tuj cycwent, ma tzaj tmaꞌn Kman weye alcye cbajel tiꞌja: 22 Che elex kꞌiꞌn cycyakil xuꞌj ateꞌ tuj tjaya ex che xel kꞌoꞌn tuj cykꞌab ke nejenel cye t-soldad rey te Babilonia, ex ax ke xuꞌj lu che tzajel kꞌmante teya cyjaꞌ: Ma cub sbuꞌna cyuꞌn ke xjal at cyoclen ttxlaja ex ma cub tiꞌj tnabla cyuꞌn; ma cyaj tzokpiꞌna cyuꞌn tuꞌn cycuꞌx baj tkana tuj soban, ex ma tzꞌel cypaꞌn cyib tiꞌja, che chilo.

23 Ex xi tmaꞌntl Jeremías te rey:

—Che xel kꞌoꞌn cycyakil t-xuꞌjila ex tcꞌwaꞌla tuj cykꞌab aj Babilonia; icx teya mlayx colpaja tuj cykꞌab, nok oꞌcx cxel kꞌoꞌna tuj tkꞌab rey te Babilonia, ex cꞌoquel kꞌoꞌn tkꞌakꞌal tnam lu.

24 Xi ttzakꞌweꞌn Sedequías te Jeremías:

—Ka taja tuꞌn tankꞌintla, miꞌn tzꞌel tkanil kyol tuꞌna. 25 Ka ma cybi ke xjal maꞌ cyoclen ateꞌ ntxlaje ka otok chin yoline tucꞌila, jaculo che ul tucꞌila tuꞌn ttzaj cykanin teya alcye ma tzaj tmaꞌna weye, ex alcye ma txi nmaꞌne teya, ex jaculo tzaj cytziyan jun cyyol axix toc tuꞌn miꞌn tcub byoꞌna cyuꞌn. 26 Atzun teya bix txi tmaꞌna cye ka oꞌcx in cubsana nwitze tuꞌn miꞌn t-xi nsamaꞌna juntl maj ma tja Jonatán, tuꞌntzun mi tcyima ma chixin.

27 E pontzun cycyakil xjal maꞌ cyoclen tucꞌil Jeremías ex e oc ten xjelel te, atzunte Jeremías xi tmaꞌn ic tzaꞌnx otok tma rey te. Cyajtzun kꞌoꞌn Jeremías cyuꞌn ex mintiꞌtl e kꞌajt tiꞌj, porque mi jun otok bin tiꞌj tyol Jeremías tucꞌil rey. 28 Axtzun cyaj ten Jeremías ttxaꞌn cypeꞌn soldad, aju ttxaꞌn peꞌn tocx tujxi, tejxi ttzyet tnam Jerusalén cyuꞌn aj kꞌoj.