3 Xitzun t-samaꞌn Sedequías Jucal aju tcyꞌajal Selemías, ex pal Sofonías aju tcyꞌajal Maasías, tucꞌil Jeremías tuꞌn t-xi cymaꞌn te cyjaꞌ: Cubsana kiꞌje twitz Kman aju Kdios, che chi. 4 Naꞌnxtok tocx kꞌoꞌn Jeremías tuj pres, cyjaꞌtzun in bettok cyxol xjal ex mi aꞌl jun in mayonte te. 5 Tej cybinte aj Babilonia, akeju in che kꞌojintok tiꞌj tnam Jerusalén, ka otok che etz ke t-soldad Faraón tuj Ejipt, cub be cyuꞌn.

6 Tzajtzun yolin Kman tucꞌil Jeremías aju t-sanjel, ex xi tmaꞌn te tuꞌn t-xi tmaꞌn cye keju e tzaj t-samaꞌn rey: 7 Cymanxe te rey te Judá aju saj samante cyeye kanilte weye, chi Kman cyjaꞌ: Ke t-soldad Faraón, akeju otok che tzaj tuꞌn cy-onin cyiꞌje tuj kꞌoj, ya ma che aj meltzꞌaj tuj Ejipt. 8 Che oquel tzokpaj aj Babilonia juntl maj kꞌojlel tiꞌj tnam Jerusalén; ctzyetel cyuꞌn ex cꞌoquel cykꞌoꞌn tkꞌakꞌal. 9 Akine Dios in chin kꞌmante jlu: Miꞌn cub cysbun cyibe ex miꞌn keꞌ cycꞌuꞌje ka cxel cycolin aj Babilonia tuꞌn cykꞌojin cyiꞌje, porque mlay txi cycolin. 10 Masque cub cyiꞌj cycyakil cysoldad aj Babilonia cyuꞌne, akeju in che kꞌojin cyiꞌje, ex masque cyaj ten nok junjun soldad, akeju otok che cꞌixbi, pero akeju soldad lu che jawil weꞌ ex cꞌoquel cykꞌoꞌn tkꞌakꞌal tnam, chi Kman, che chicuye te rey, chi Jeremías.

11 Tej tel cypaꞌn cyib cysoldad aj Babilonia tiꞌj tnam Jerusalén tuꞌn tlaj otok cybi ka cyjaꞌtok cytzaj ke t-soldad Faraón, 12 etz Jeremías tuj tnam tuꞌn t-xiꞌ tuj txꞌotxꞌ Benjamín, tuꞌn tcꞌmonte chꞌin tetzbil cyxol ttanmil. 13 Pero tej tpon ttzi tpwertil tnam, Benjamín tbi, tzaj tzyuꞌn tuꞌn Irías aju tcyꞌajal Selemías ex tal tchman Hananías, aju toctok te nejenel cye jun cꞌloj soldad, ex xi tmaꞌn te:

—Ma txi tkꞌon tiba cyucꞌil aj Babilonia.

14 Atzunte Jeremías xi ttzakꞌweꞌn:

—Miꞌn, mya ax toc jlu, porque mlay tzꞌaj nkꞌon wibe cyucꞌil aj Babilonia.

Pero ate Irías mintiꞌ xi tbiꞌn jlu, nok oꞌcx tzyet Jeremías tuꞌn ex xi tiꞌn cywitz ke xjal maꞌ cyoclen. 15 Atzun cye xjal maꞌ cyoclen tzaj cykꞌoj tiꞌj Jeremías ex xi cymaꞌn tuꞌn tbaj asyalin ex tuꞌn tocx cykꞌoꞌn tuj pres ma tja Jonatán aju aj tzꞌibal te rey, porque aju ja lu otok tzꞌoc te presbil. 16 Maxtzun pon presin Jeremías tuj jun presbil tjakꞌ txꞌotxꞌ, ex atzun o ten nim kꞌij.

17 Xitzun tmaꞌn rey Sedequías tuꞌn t-xi kꞌibaj Jeremías, ex tej tpon kꞌiꞌn twitz rey max tja, xi tkanin rey te tuj ewaj:

—¿Atpe yol ma tzaj tmaꞌn Kman teya?

Atzunte Jeremías xi ttzakꞌweꞌn:

—At, ex atzun jlu: Cxel kꞌoꞌna tuj tkꞌab rey te Babilonia.

18 Ax icx xi tkanin Jeremías te rey Sedequías:

—¿Alcye wile ma nbinchaye twitza Tat Rey, ex ka cywitz ke xjal maꞌ cyoclen ateꞌ ttxlaja, ex ka cywitz ke xjal, tuꞌnju ma chin ocx cykꞌoꞌne tuj pres? 19 ¿Jatumtzun ateꞌ keju nnoꞌc cykꞌon cyib te t-sanjel Dios, akeju e kꞌmante teya ka mlay tzul rey te Babilonia kꞌojlel cyiꞌje ex mi tiꞌj tnam lu? 20 Jaꞌlo Tat Rey, bintza nyole ex kꞌontz twiꞌya tiꞌj nkanbetze cxel nkanine teya: Miꞌn takꞌa ambil tuꞌn nxi kꞌiꞌne juntl maj tja Jonatán aju aj tzꞌibal teya, porque mya yaj jacu chin cyime ma chixin.

21 Tmatzun rey Sedequías tuꞌn ax tuꞌn tpresit Jeremías tuj ttxaꞌn cypeꞌn soldad xkꞌukil tja rey, aju ttxaꞌn peꞌn tocx tujxi ja, ex tuꞌn t-xi kꞌoꞌn jun twa pan teyle junjun kꞌij tiꞌj pan in cꞌayinjtz cyuꞌn ke binchal pan. Bant jlu tejxi tbaj tcyakil pan tuj tnam. Cyjaꞌtzun tten cyaj ten Jeremías ttxaꞌn cypeꞌn soldad tujxi ja.