4 Tzajtzun txcoꞌn Baruc tcyꞌajal Nerías tuꞌn Jeremías, ex oc ten Jeremías kꞌmalte tcyakil yol otok tzaj kꞌmaꞌn te tuꞌn Kman, atzunte Baruc cub ttzꞌiban twitz jun botzꞌ uꞌj. 5 Te tibajxi xi tmaꞌn Jeremías te Baruc cyjaꞌ: Weye mintiꞌ permis tuꞌn nxiꞌye tuj tja Dios, 6 cyjaꞌtzun, txiꞌya tuj tja Dios tuj jun kꞌij oc in cub cyyoꞌn xjal weꞌyaj, ex schꞌin jawa aju yol tzꞌiban twitz uꞌj, aju xi nmaꞌne teya tuꞌn tcub ttzꞌibana, tuꞌntzun cybinte cycyakil xjal aju tyol Kman, ex tuꞌn cybinte cycyakil aj Judá, akeju che ul tuj tja Dios. 7 Mya yaj jacu che oc ten cubsal twitz Kman, ex kape jacu cyaj cycolin cybinchben mya baꞌn, porque xobajilxix ttxꞌuꞌjil Kman ex tkꞌoj ma tzaj tmaꞌn tiꞌj tnam lu, chi Jeremías. 8 Tbinchatzun Baruc tcyakilju otok txi kꞌmaꞌn te tuꞌn Jeremías aju t-sanjel Dios. Xiꞌ tuj tja Dios ex jaw t-schꞌiꞌn aju tzꞌiban tuj jun botzꞌ uꞌj.

9 Tuj tbelajin xjaw te tjweꞌyin abkꞌi toclen Joacim aju tcyꞌajal Josías te rey tuj Judá, etz jun orden tuꞌn cye aj Jerusalén ex cye xjal otok che tzaj cyuj mastl tnam te Judá, tuꞌn tcub cyyoꞌn weꞌyaj twitz Kman. 10 Xiꞌtzun Baruc tuj ttxaꞌn peꞌn maꞌ tjaw te tja Dios, jatum nnoꞌcx be ttzi Acꞌaj Pwert, ex max jatum taꞌ tcwart Gemarías aju aj tzꞌibal, aju tcyꞌajal Safán; ex cywitz cycyakil xjal jaw t-schꞌin Baruc tyol Jeremías, aju tzꞌiban twitz uꞌj.

11 Tej tbinte Micaías aju tcyꞌajal Gemarías ex tal tchman Safán tcyakil tyol Kman jaw t-schꞌiꞌn Baruc twitz uꞌj, 12 xiꞌ max tuj tja rey jatum taꞌ tcwart aj tzꞌibal te rey, ex jatum cychmon cyib ke xjal maꞌ cyoclen. Atzun ke jlu: Elisama aju aj tzꞌibal te rey, Delaía aju tcyꞌajal Semaías, Elnatán aju tcyꞌajal Acbor, Gemarías aju tcyꞌajal Safán, tucꞌix Sedequías aju tcyꞌajal Hananías cyucꞌix mastl xjal maꞌ cyoclen. 13 Xi ttxꞌolbaꞌn Micaías tcyakilju otok tbi tej tjaw t-schꞌiꞌn Baruc cywitz xjal aju yol tzꞌiban twitz ju uꞌj. 14 Atzun cye xjal maꞌ cyoclen xi cysamaꞌn Jehudí tucꞌil Baruc, tuꞌn t-xi tmaꞌn te tuꞌn tpon cyucꞌil ex tuꞌn tpon tiꞌn aju uꞌj otok jaw t-schꞌiꞌn cywitz xjal. Ate Jehudí tcyꞌajal Netanías, tal tchman Selemías ex ttxca tchman Cusi. Xitzun tiꞌn Baruc aju uꞌj ex pon cyucꞌil xjal maꞌ cyoclen, 15 atzun cye xi cymaꞌn te:

—Kecuya ex schꞌin jawa kwitze, tuꞌn kbinteye aju yol tzꞌiban twitz uꞌj.

Jawtzun t-schꞌiꞌn Baruc, 16 ex tej cybinte tcyakil yol lu, teyle junjun baj cyqueꞌyin tuj cywitz, in che xob ex cyma:

—Il tiꞌj tuꞌn t-xi ktxolbaꞌn tcyakil jlu te rey.

17 Te tibajxi xi cymaꞌn te Baruc:

—Kꞌmantza keye tzaꞌn tten cub ttzꞌibana tcyakil jlu. ¿Apetzun Jeremías tzaj kꞌmante teya tuꞌn ttzꞌibana ju yol lu?

18 Atzunte Baruc xi ttzakꞌweꞌn:

—Twitzelcu Jeremías tzaj kꞌmante tcyakil jlu weye, ex atzun weye ncuꞌxxi ntzꞌibane tuꞌn tint tuj jun botzꞌ uꞌj.

19 Xitzun cymaꞌn te Baruc: Cyxiꞌye ewal cyibe, aya tucꞌix Jeremías, tuꞌntzun mi aꞌl jun baꞌn tbinte jatum ateꞌye.

20 Cyaj cykꞌoꞌn xjal maꞌ cyoclen ju uꞌj tuj tcwart Elisama aju aj tzꞌibal te rey, ex e jeꞌx max tuj tja rey tuꞌn t-xi cytxꞌolbaꞌn te tcyakil aju otok cybi. 21 Xitzun samaꞌn Jehudí tuꞌn rey kꞌilte uꞌj, ma tuj tcwart Elisama aju aj tzꞌibal te rey, ex tej tul tiꞌn Jehudí, jaw t-schꞌiꞌn twitz rey ex cywitz cycyakil xjal maꞌ cyoclen ateꞌ ttxlaj. 22 Tuꞌnju atzun ateꞌtok tuj tbelajin xjaw, entons maxtok taꞌ rey tuj jun cwart in ajben tuꞌn tuj tkꞌijlalil cheꞌw, ex attok jun tcubil xkꞌaꞌl in cꞌant tcub twitz. 23 Oc in baj t-schꞌiꞌn Jehudí ox ex ka cyaje piẍ uꞌj, nneꞌlxi tcꞌapuꞌn rey tuꞌn cchil ex ncubxi tpatun tuj tcubil xkꞌaꞌl. Cyjaꞌylex o tenba tuꞌn, tejxi tcub baj tpatun tcyakil uꞌj. 24 Mintiꞌ tzaj t-xobil rey, mi ke xjal maꞌ cyoclen, ex mi keju e bin tiꞌj tej tjaw schꞌiꞌn uꞌj, ex mintiꞌ el cysbitꞌun cyxbalun cyiꞌj. 25 Masque e cubsan Elnatán tucꞌix Delaía ex Gemarías twitz rey tuꞌn miꞌn tcub tpatun uꞌj, pero mintiꞌ xi tniman cyyol, 26 nok oꞌcx xi tmaꞌn te Jerameel aju tcyꞌajalx, ex te Seraías aju tcyꞌajal Azriel, ex te Selemías aju tcyꞌajal Adbeel, tuꞌn cyxiꞌ tzyulte Jeremías aju t-sanjel Dios, tucꞌix Baruc aju aj tzꞌibal te Jeremías, tuꞌntzun cyocx kꞌoꞌn tuj pres. Pero e jeꞌx ewan tuꞌn Kman.

27 Te tibajxi tcublen tpatun rey uꞌj jatum tzꞌiban aju yol otok txi tmaꞌn Jeremías te Baruc, tzaj yolin Kman tucꞌil Jeremías cyjaꞌ: 28 Kꞌintza juntl botzꞌ uꞌj ex tzꞌiban cuba juntl maj tcyakil yol tzꞌibamaj twitz tnejel, aju cub tpatun Joacim aju rey te Judá. 29 Ex kꞌmanxa te rey: Chi Kman teya cyjaꞌ: Ma cub tpatuna aju botzꞌ uꞌj ex ma tmaya: ¿Tikuꞌn ma cub ttzꞌiban Jeremías twitz uꞌj ka tzul rey te Babilonia tuꞌn tnaj tnam lu tuꞌn, ex ka mintiꞌ xjal cyjel ten tuj txꞌotxꞌ lu, mi alumaj, chiya? 30 Cyjaꞌtzun akine Dios in chin kꞌmante jlu teya Joacim, aya rey te Judá: Mlay che oc ke tiyjila te rey tuꞌn cyocx keꞌ tuj tkꞌukbil David. Oc tcyima, aju t-ximlala cucx cyjel paleꞌ tiꞌj kꞌij ex tiꞌj tkꞌab cheꞌw, 31 ex tzul nkꞌoꞌne castiw tibaja, cyibaj ke tiyjila ex cyibaj ke xjal maꞌ cyoclen ateꞌ ttxlaja, tuꞌn tlaj cyile. Cbel nkꞌoꞌne tcyakil txcaj castiw cyibaje ex cyibaj ke xjal najl tuj Jerusalén ex cyibaj aj Judá, ic tzaꞌn o nmaye cye, tuꞌnju mintiꞌ ma txi cybiꞌne nyole, chicuya te rey, chi Kman te Jeremías.

32 Tzajtzun tiꞌn Jeremías juntl botzꞌ uꞌj ex xi tkꞌoꞌn te Baruc aju tcyꞌajal Nerías ex aj tzꞌibal te. Cuꞌx ttzꞌiban Baruc tcyakil yol xi tmaꞌn Jeremías te, ax ic tzaꞌn tzꞌibamajtok twitz tnejel botzꞌ uꞌj aju cub tpatun rey Joacim. Nimcu mastl yol oc ttzꞌaksaꞌn Jeremías, ex ax tnabl ic tzaꞌn tnejel.