6 Atzun cye tzaj cytzakꞌweꞌn: Keye miban ko cꞌane taꞌl twitz uva, porque aju ktzan kxeꞌchele Jonadab aju tcyꞌajal Recab, cyaj tmaꞌn keye cyjaꞌ: Miꞌn txi cycꞌaꞌne taꞌl twitz uva, mi akeye ex mi ke cyiyjile che ul itzꞌj te tibajxi, 7 ex miꞌn jaw cybinchaꞌne cyjaye, miꞌn cuꞌx cyawaꞌne cyawale, miꞌn cuꞌx cyawaꞌne tkan uva ex miꞌn cub cyetzane jun piẍ txꞌotxꞌ, nok oꞌcx che najale cyuj ke ja xbalun ja, ex nok che betjeꞌye, tuꞌntzun cyankꞌine nim kꞌij twitz txꞌotxꞌ, chi Jonadab keye. 8 Atzun keye ma txi knimane tcyakilju cyaj tmaꞌn ktzan kxeꞌchele Jonadab aju tcyꞌajal Recab, ex bajx txi kcꞌaꞌne taꞌl twitz uva, tzaꞌnx keye ax icx ke kxuꞌjile ex ke kcꞌwaꞌle, 9 ex mintiꞌ in jaw kbinchaꞌne kjaye tuꞌn kankꞌine tuj; mintiꞌ tkan uva awaꞌn kuꞌne ex mintiꞌ ktxꞌotxꞌe, mi kawale. 10 In ko ankꞌine cyuj ke ja xbalun ja, ex in japun kuꞌne tcyakilju cyaj tmaꞌn ktzan kxeꞌchele Jonadab. 11 Pero tej toc tzokpaj Nabucodonosor aju rey te Babilonia tiꞌj txꞌotxꞌ lu, cub kximane tuꞌn kule tzalu tuj Jerusalén, tuꞌntzun kcolpaje cywitz ke soldad cye aj Caldey ex cye aj Siria, ex ax ma ko cyaj tene tzalu tuj Jerusalén, che chi tiyjil Recab.

12 Tzajtzun yolin Kman tucꞌil Jeremías ex tma: 13 Akine Dios aju Tajaw Tcyakil ex Cydios aj Israel cxel nmaꞌne jlu teya: Txiꞌya ex kꞌmanxa cye xjal aj Judá ex aj Jerusalén: ¿Maj mlayx bant cynimane ke nleye? Akine Dios in chin kꞌmante jlu. 14 Aju orden cyaj tkꞌoꞌn Jonadab aju tcyꞌajal Recab cye tiyjil, tuꞌn mi t-xi cycꞌaꞌn taꞌl twitz uva, ma japun cyuꞌn, ax icx jaꞌlo mintiꞌ in xi cycꞌaꞌn porque ma txi cyniman aju cyaj tmaꞌn ktzan cyxeꞌchel cye. Atzun weye cucx in xi nmaꞌne ke nleye cyeye, pero mintiꞌ in chinx cynimane. 15 Elaꞌ maj o cheꞌx nsamaꞌne ke nsanjele, akeju nmajene, tuꞌn t-xi cymaꞌn cyeye cyjaꞌ: Cycolin cyaje cybeye mya baꞌn ex cybinchame baꞌn. Miꞌn cheꞌx lpeꞌye cyiꞌj cydios xjal ex miꞌn che cꞌulune cywitz, tuꞌntzun cucx cyankꞌine twitz txꞌotxꞌ o txi nkꞌoꞌne cyeye ex cye ktzan cyxeꞌchele, nchiye cyeye; atzun cyeye mintiꞌ ocx tuj cywiꞌye ex mintiꞌ inx cynimane. 16 Ke tiyjil Jonadab aju tcyꞌajal Recab ma japun ley cyuꞌn aju cyaj tmaꞌn ktzan cyxeꞌchel cye, atzun cyeye, akeye aj Israel, mintiꞌ in chinx cynimane. 17 Cyjaꞌtzun akine Dios aju Tajaw Tcyakil ex Cydios aj Israel cxel nmaꞌne jlu: Ctzajel wiꞌne cycyakil txcaj cꞌixbisabl cyibaj aj Judá ex cyibaj keju najlke tuj Jerusalén, aju o txi nmaꞌne cye, porque o txi nmaꞌne nyole cye pero mintiꞌ ma tzꞌocx tuj cywiꞌ, o chin txocone cyiꞌj ex mintiꞌ in chin tzaj cytzakꞌweꞌn, chi Dios.

18 Ax icx xi tmaꞌn Jeremías cye tiyjil Recab: Ate Kman aju Tajaw Tcyakil ex Cydios aj Israel chi cyjaꞌ: Tuꞌnju ma txi cynimane tley Jonadab aju ktzan cyxeꞌchele, ma bant cyuꞌne ic tzaꞌnx ju xnakꞌtzbil tzaj tkꞌoꞌn cyeye, ex ma japun cyuꞌne tcyakil aju cyaj tmaꞌn cyeye, 19 cyjaꞌtzun chi Dios aju Tajaw Tcyakil ex Cydios aj Israel: Axix toc, cucx ctel jun tiyjil Jonadab aju tcyꞌajal Recab tuꞌn tajben weye.