Aju tkanil tuꞌn tpon tucꞌil rey Sedequías
34
Ate Nabucodonosor aju rey te Babilonia, cyucꞌix ke t-soldad ex ke xjal ateꞌcxtok tjakꞌ tcawbil akeju e tzaj cyuj cycyakil nasyon twitz txꞌotxꞌ, tej in che kꞌojintok cyiꞌj aj Jerusalén ex cyiꞌj ke tnam ateꞌ tiꞌjele, tzajtzun yolin Kman tucꞌil Jeremías chi cyjaꞌ: 2 Akine Dios aju Cydios aj Israel cxel nmaꞌne teya jlu: Txiꞌya tucꞌil Sedequías aju rey cye aj Judá, ex kꞌmanxa te: Chitzun Kman cyjaꞌ: Cxel nkꞌoꞌne tnam lu tuꞌn tcyaj tjakꞌ tcawbil rey te Babilonia, ex cꞌoquel tkꞌoꞌn tkꞌakꞌal. 3 Atzun teya, mlayx tzokpaja tuj tkꞌab; ctzyetela cyuꞌn xjal ex cxel kꞌoꞌna tuj tkꞌab Nabucodonosor, cꞌoquel tqueꞌyina twitz, c-yolila tucꞌil ex cxel kꞌiꞌna max tuj Babilonia. 4 Aya Sedequías rey cye aj Judá, bintza aju cxel nmaꞌne teya: Mlay cub byoꞌna tuꞌn spad. 5 Tuj txubtxaj cymela, ex cbel patun tcꞌocꞌjal tibaja oc tcyima ic tzaꞌn cub patun cyibaj ktzan t-xeꞌchela tej cycyim, akeju e cawin tej naꞌnxtok toc teya te rey; che okꞌel xjal tiꞌja ex oc cymaꞌ cyjaꞌ: Ay Tat, che chilo. Akine Dios in chin kꞌmante jlu, ex cbantel wuꞌne icju.6 Xitzun tmaꞌn Jeremías aju t-sanjel Dios tcyakil jlu te rey Sedequías tuj Jerusalén 7 tej in che kꞌojintok ke t-soldad rey te Babilonia tiꞌj tnam Jerusalén, tiꞌj tnam Laquis ex tiꞌj tnam Azeca. Oꞌcxtzun ke tnam lu naꞌnxtok ttzyet tuꞌn Nabucodonosor, akeju toc muro cyiꞌj tuj Judá.
Mintiꞌ japun yol cyuꞌn xjal, aju otok txi cytziyan, tuꞌn cytzokpet ke majen ax aj Hebrey ke
8 Tzaj yolin Kman tucꞌil Jeremías tcyajlenxi bant tiꞌj jun tyol rey Sedequías cyucꞌil aj Jerusalén, tuꞌn cytzokpet ke xjal tzyuꞌn te majen. 9 Aju yol otok bant tiꞌj, tuꞌn cyxi tzokpet ke xinak ex xuꞌj aj Hebrey akeju tzyuꞌntok te majen, tuꞌntzun miꞌn toc jun xjal Judiy te jumajx te tmajen juntl xjal ax Judiy. 10 Cycyakil ke nejenel ex cycyakil tnam xjal xi cyniman aju yol otok bant tiꞌj cyuꞌn, ex xi cytzokpiꞌn cymajen, ex ya mintiꞌ oc cykꞌoꞌn il cyiꞌj tuꞌn cyakꞌnan tiꞌj cyakꞌun. 11 Pero te tibajxi chꞌexpet cyximbetz tuꞌn tlaj t-xilen cytzokpiꞌn ke, ex oc cykꞌoꞌn il cyiꞌj juntl maj tuꞌn cyoc te cymajen.
12 Tzajtzun yolin Kman tucꞌil Jeremías ex tma cyjaꞌ: 13 Akine Dios aju Cydios aj Israel, cyaj bant tiꞌj jun nyole cyucꞌil ktzan cyxeꞌchele ojtxi tej cyetz wiꞌne tuj Ejipt jatum in che ajbentok te majen, ex xi nmaꞌne cye cyjaꞌ: 14 Tuj wukchak abkꞌi cxel cytzokpiꞌne nok alcyex aj Hebrey otok txi tcꞌayin tib te majen cyeye, nok kak abkꞌi che ajbel cyeye ex te tibajxi che xel cytzokpiꞌne, nchiye xi nmaꞌne cye, pero mintiꞌ ocx tuj cywiꞌ ktzan cyxeꞌchele ex mintiꞌ inx cyniman. 15 Atzun cyeye otok baj cychꞌexpuꞌne cyximbetze ex otok bant cyuꞌne aju in chin tzalaje tiꞌj, tuꞌnju otok txi cytzokpiꞌne cyxjalile, akeju cyoctok te cymajene, ex otok txi cytziyane jlu nwitze tuj njaye in ajben te nimsabl nbiye. 16 Pero te tibajxi ma baj cychꞌexpuꞌne cyximbetze, ex ma chin oc cykꞌoꞌne te mintiꞌ woclene, tuꞌnju ma che tzaj cyiꞌne juntl maj cymajene, akeju otok txi cykꞌoꞌne ambil cye tuꞌn cyxi tzokpet, ex ma che oc cylajwersine tuꞌn cyoc juntl maj te cymajene. 17 Cyjaꞌtzun akine Dios cxel nmaꞌne jlu: Akeye mintiꞌ ma chinx cynimane, mintiꞌ ma txi cytzokpiꞌne cyxjalile akeju tzyuꞌn te cymajene; tuꞌntzun jlu che xel ntzokpiꞌne tuꞌn cycyime tuj kꞌoj, tuꞌn txꞌuꞌj yabil ex tuꞌn weꞌyaj, ex che elel icꞌune cyuꞌn cycyakil xjal cyuj cycyakil nasyon twitz txꞌotxꞌ. Akine Dios in chin kꞌmante jlu. 18-19 Tej tbant tiꞌj jun yol nwitze cyuꞌn ke nejenel cye aj Judá ex cye aj Jerusalén, cyucꞌix ke xjal at cyoclen ttxlaj rey, cyucꞌix ke pal ex cyucꞌix mastl xjal, cub cyiꞌn tmij jun tal tman wacẍ ex cub cykꞌoꞌn te cabe piẍun tten ex e ocxtzun bet cyxol cabe piẍ wacẍ lu, te cyuwsabl yol, pero jurat naj ma tzꞌel cyicꞌun aju yol cyaj bant tiꞌj cyuꞌn, ex mintiꞌ ma japun cyuꞌn aju xi cytziꞌyan. 20 Cyjaꞌtzun che xel nkꞌoꞌne tuꞌn cycub tzꞌak tuj cykꞌab aj kꞌoj cyiꞌj, akeju cyaj tuꞌn cycub byonte cye, ex aju cyximlal cꞌajbel te cychiꞌ ke jil baꞌn che lipan twitz cyaꞌj, ex te cychiꞌ ke txcup te tjakꞌ cꞌul. 21 Ax icx te Sedequías aju rey cye aj Judá, cyucꞌix ke xjal at cyoclen ttxlaj, che xel nkꞌoꞌne tuj cykꞌab aj kꞌoj cyiꞌj, akeju cyaj tuꞌn cycub byonte cye, ex tuj cykꞌab ke t-soldad rey te Babilonia, akeju ma txi cycolin chꞌin tuꞌn cykꞌojin cyiꞌj. 22 Pero cxel nmaꞌne cye tuꞌn cyajtz meltzꞌaj kꞌojlel tiꞌj tnam lu; che oquel tzokpaj tiꞌj, ctzyetel cyuꞌn ex cꞌoquel cykꞌoꞌn tkꞌakꞌal. Ax icx mastl tnam ateꞌ tuj Judá, biꞌx che bel xitj ex mi jun xjal cyjel ten cyuj. Akine Dios in chin kꞌmante jlu.