Tkanil tuꞌn cyten aj Israel juntl maj tuj txubtxaj
33
Tzaj yolin Kman tcabinmajiꞌn tucꞌil Jeremías, tej axtok tocx tuj pres ttxaꞌn cypeꞌn ke soldad xkꞌukil tja rey, ex tzaj tmaꞌn te cyjaꞌ: 2 Akine Dios aju binchalte txꞌotxꞌ, baj nbinchaꞌne ex cub nkꞌoꞌne tujxix tlugaril, akine Kman Dios nbiye, cxel nmaꞌne jlu teya: 3 Cubsana nwitze ex jacu txi ntzakꞌweꞌne, ex jacu cheꞌx nmaꞌne teya ke tiꞌxti maꞌxix cyxilen, akeju ateꞌ tuj ewaj ex mintiꞌ ojtzkiꞌn tuꞌna. 4 Chi Kman aju Cydios aj Israel cyiꞌj ke ja ateꞌ tuj Jerusalén ex cyiꞌj cyja rey te Judá, akeju ma che cub tilj tuꞌn cyajben tzeꞌ ex abj te cycolbil cyibe, ex te cykꞌojbile cyiꞌj aj Caldey, 5 akeju ma jaw cybinchaꞌn cyxwetzbil tiꞌj tnam tuꞌntzun cyoc tzokpaj tiꞌj: Ke ja lu che nojel tuꞌn cyximlal cyimni, akeju che cymel wuꞌne tuꞌn ntxꞌuꞌjile xobajilxix, porque ma cyaj ncoline tnam lu tuꞌn tlaj nimxix il ma cybincha. 6 Pero te tibajxi che oquel nkꞌanine ex che banixel. Wuꞌne che tel tuj txubtxaj ex mintiꞌ xobajil cyiꞌj. 7 Che ajetz wiꞌne aj Judá ex aj Israel tuj tnam jatum o che pon kꞌiꞌn, ex cjawil nbinchaꞌne juntl maj cytanmi ic tzaꞌn tten nej. 8 Che bajel nsaksaꞌne tiꞌj tcyakil il o cybincha wiꞌje, ex cbel nnajsaꞌne tcyakil mya baꞌn o cybincha tej tjaw cyiꞌn cyib wiꞌje. 9 Cꞌoquel Jerusalén te jun tzalajbil, te nimbil ex ajwalil weye cywitz cycyakil nasyon ateꞌ twitz txꞌotxꞌ, ex che tzajel luꞌlun ke nasyon tuꞌn cyxobil oc cybinte tcyakil baꞌn ex tzalajbil cxel nkꞌoꞌne cye keju najlke tuj Jerusalén.10 Chi Kman: Akeye in cymaꞌne ka tzkij txꞌotxꞌ lugar lu, mi jun najl tuj, mi xjal mi alumaj, che chiye. Ax toc ke cay te tnam Jerusalén ex ke tnam ateꞌ tuj Judá mintiꞌ at cyuj, mi xjal mi alumaj najl cyuj. 11 Pero che binjtzel juntl maj ke bitz te ninkꞌij, te tzalajbil, te mejebleꞌn ex tkꞌajkꞌajel cywiꞌ xjal oc cyul tuj tja Kman tucꞌil cyoyaj te akꞌbil chjonte ex in che bitzan cyjaꞌ: Cykꞌonxe chjonte te Kman aju Tajaw Tcyakil, porque baꞌn te Kman ex aju tcꞌujlalil cucx at te jumajx, che chilo xjal. Axix toc che ajetz wiꞌne ke xjal etzan wuꞌne, akeju o che pon kꞌiꞌn tuj juntl tnam, tuꞌn cyul juntl maj tuj txꞌotxꞌ lu, tuꞌntzun tpon juntl maj txꞌotxꞌ ic tzaꞌn tten nej. Akine Dios in chin kꞌmante jlu.
12 Chi Kman aju Tajaw Tcyakil in tmaꞌn cyjaꞌ: Tuj txꞌotxꞌ lu, aju o cub xitj, ex cyuj cycyakil tnam jatum mintiꞌ xjal cyuj mi alumaj, ctzajel chꞌiy juntl maj cꞌul, ex ke pastor ẍneꞌl cpol cyiꞌn cyẍneꞌl tuꞌn cywaꞌn cyuj. 13 Ex cyuj ke tnam tuj tiwitz txꞌotxꞌ, cyuj ke tnam ateꞌ t-xe witz, cyuj ke tnam ateꞌ tuj txꞌotxꞌ Néguev, tuj cytxꞌotxꞌ aj Benjamín, cyuj ke aldey ateꞌ tiꞌjele tnam Jerusalén ex cyuj ke mastl tnam te Judá, che oquel queꞌyin ke pastor in che ajlan cyiꞌj ke cyẍneꞌl. Akine Dios in chin kꞌmante jlu.
14 Chi Kman cyjaꞌ: Tzul tkꞌijlalil tuꞌn tjapun wuꞌne aju yol baꞌn xi ntziyane cye aj Israel ex cye aj Judá. 15 Octzun tjapun tkꞌijlalil lu, oc nbinchaye tuꞌn tul itzꞌj jun tiyjil David tzꞌaklxix, tuꞌn t-xi tbinchaꞌn cyiꞌj xjal tuj tumelxix tuj tnam lu. 16 Tuj tkꞌijlalil lu che cletel aj Judá, ex ke aj Jerusalén che ankꞌil tuj txubtxaj, ex atzun tbi tnam cꞌoquel cykꞌoꞌn xjal cyjaꞌ: Tuꞌn Kman in ko oc te Tzꞌaklxix. 17 Porque chi Kman: Cucx cjawil nscꞌoꞌne jun tiyjil David tuꞌn tocx keꞌ tuj kꞌukbil te cawbil cyxol aj Israel, 18 ex cucx che jawil nscꞌoꞌne ke pal tiyjil Leví, cycyakil kꞌij tuꞌn ttzaj cykꞌoꞌn weye aju oyaj patun in cub, ex tuꞌn tcub cypatun oyaj twitz awal te nimbil te nbiye ex tuꞌn ttzaj cykꞌoꞌn txkantl chojbil weye.
19 Tzaj yolin Kman tucꞌil Jeremías cyjaꞌ: 20 Akine Dios cxel nmaꞌne jlu: Mlayx bant tuꞌn mi tjapun aju nyole o cyaj bant tiꞌj tucꞌil kꞌij ex tucꞌil konicꞌan; mintiꞌ jun maj miꞌnwit jawil kꞌij ex mintiꞌ jun maj miꞌnwit tzꞌoc konicꞌan. 21 Ax icx mlayx bant tuꞌn miꞌn tjapun nyole cyaj bant tiꞌj tucꞌil nmajene David, tuꞌn cucx tuꞌn tjaw nscꞌoꞌne jun tiyjil tuꞌn tocx keꞌ tuj kꞌukbil te cawbil, ex mlayx bant tuꞌn miꞌn tjapun nyole tuꞌn cyjaw scꞌet ke pal tiyjil Leví te ajbel weye. 22 Ke tiyjil nmajene David, cyucꞌix ke pal tiyjil Leví, akeju in che ajben weye, cchmetel cybaj wuꞌne ic tzaꞌn cyajlal cheꞌw twitz cyaꞌj, ex ic tzaꞌn ttxa tzꞌaꞌn ttzi mar; mi aꞌl jun jacu bant tajlante cye. 23 Tzaj yolin Kman tucꞌil Jeremías ex tzaj tmaꞌn: 24 ¿Naꞌnxpe tbinteya aju yol in cymaꞌn xjal? Che chi cyjaꞌ: Ma che el ticꞌun Kman ke aj Israel ex ke aj Judá, akeju otok che jaw t-scꞌoꞌn, che chi. Cyjaꞌtzun ma che el cyicꞌun ke xjal etzan wuꞌne ex in cymaꞌn ka mya jun nasyon ke; 25 pero akine Dios cxel nmaꞌne jlu: Ic tzaꞌn o cyaj bant tiꞌj nyole tucꞌil kꞌij ex tucꞌil konicꞌan, ex ic tzaꞌn e cub nkꞌoꞌne ke ley twitz cyaꞌj ex twitz txꞌotxꞌ, 26 icxtzun mlay che el wicꞌune ke tiyjil Jacob ex ke tiyjil nmajene David. Cucx che jawil nscꞌoꞌne ke tiyjil tuꞌn cycawin cyibaj ke tiyjil Abraham, Isaac ex Jacob, porque tzul kꞌakꞌan ncꞌuꞌje cyiꞌj ex che ajetz wiꞌne jatum otok che pon kꞌiꞌn.