Tej tlakꞌet jun piẍ txꞌotxꞌ tuꞌn Jeremías
32
Tzaj yolin Kman tucꞌil Jeremías tuj tlajin abkꞌi ttzyetlen tcawin Sedequías tuj Judá ex tuj twajxaklajin abkꞌi ttzyetlen tcawin Nabucodonosor. 2 Tuj tkꞌijlalil lu in che kꞌojintok t-soldad rey te Babilonia tiꞌj tnam Jerusalén, ex atzunte Jeremías aju t-sanjel Dios presintok tuj ttxaꞌn cypeꞌn ke soldad xkꞌukil tja rey te Judá, aju ttxaꞌn peꞌn tocx tujxi ja, 3 porque otok txi tmaꞌn rey Sedequías tuꞌn tocx presin Jeremías tuꞌn tlaj xi tmaꞌn cyjaꞌ: Chi Kman: Cxel nkꞌoꞌne ambil tuꞌn ttzyet tnam lu tuꞌn rey te Babilonia ex tuꞌn tcyaj tjakꞌ tcawbil, 4 ex mlay tzokpaj rey Sedequías tuj cykꞌab aj Caldey; ctzyetel cyuꞌn ex cxel cykꞌoꞌn tuj tkꞌab rey te Babilonia; che yolil cabe rey lu ex cꞌoquel cyqueꞌyin cywitz. 5 Cxel kꞌiꞌn Sedequías tuꞌn Nabucodonosor max tuj Babilonia ex maxtzun cyjel ten nim abkꞌi ocxi tcyim. Masque che kꞌojine cyucꞌil aj Caldey pero mlayx che cambane, chi Dios, chi Jeremías.6 Ax icx xi tmaꞌn Jeremías: Ma tzaj yolin Kman wucꞌile ex ma tzaj tmaꞌn weye cyjaꞌ: 7 Tzul Hanameel aju tcyꞌajal Salum aju terman tmana, kꞌmalte teya tuꞌn tcyaj tlakꞌoꞌna jun piẍ ttxꞌotxꞌ taꞌ tuj Anatot, porque aya mas at toclena tiꞌj tuꞌn tcyaj tlakꞌoꞌna tuꞌnju at t-xilena tucꞌil, chi Kman. 8 Ic tzaꞌnx otok tzaj tmaꞌn Kman weye, ultzun Hanameel wucꞌile ttxaꞌn cypeꞌn ke soldad xkꞌukil tja rey, ex tzaj tmaꞌn weye cyjaꞌ: Lakꞌoꞌn cyaja ntxꞌotxꞌe taꞌ tuj Anatot tuj cytxꞌotxꞌ tiyjil Benjamín, porque aya at toclena tiꞌj tuꞌn tcyaj tlakꞌoꞌna tuꞌn toc te tetzbila, chi Hanameel weye. Eltzun nnicꞌe tiꞌj ka tuꞌn Kman jlu, 9 ex cyaj nlakꞌoꞌne ttxꞌotxꞌ Hanameel aju tcyꞌajal terman nmane. Xi nkꞌoꞌne wuklaj sak pwak te, porque atzun twi txꞌotxꞌ japun. 10 Te tibajxitzun bant tuꞌjil wuꞌne, oc sey tiꞌj, e jyet junjun testiw wuꞌne tuꞌn cypirmarin tiꞌj ex cub nmaloꞌne sak pwak tuj jun balans. 11 Xitzun wiꞌne tuꞌjil txꞌotxꞌ tzꞌiban tcyakil tuj, seyarimaj ex baltzꞌimaj, tucꞌix juntl copya cucx catl, 12 ex xi nkꞌoꞌne te Baruc aju tcyꞌajal Nerías ex tal tchman Maasías; xi nkꞌoꞌne te twitz Hanameel aju wermaniye, cywitz ke testiw otok che pirmarin tiꞌj ex cywitz cycyakil xjal Judiy kꞌuklkeꞌtok ttxaꞌn cypeꞌn soldad xkꞌukil tja rey. 13 Cywitztzun ke jlu xi nmaꞌne te Baruc cyjaꞌ: 14 Ate Kman aju Tajaw Tcyakil ex Cydios aj Israel chi cyjaꞌ: Kꞌinxa aju tuꞌjil txꞌotxꞌ baltzꞌimaj, tucꞌix juntl copya cucx catl, ex cꞌuꞌnxa tuj jun tal xar tuꞌntzun tten nim kꞌij, 15 porque chi Kman aju Tajaw Tcyakil ex Cydios aj Israel cyjaꞌ: Tzul tkꞌijlalil che lokꞌol juntl maj xjal cyiꞌj ke ja, ke cojbil ex ke tkan uva tuj txꞌotxꞌ lu.
Aju tnaꞌj Dios Jeremías
16 T-xilenxitzun nkꞌoꞌne tuꞌjil txꞌotxꞌ te Baruc aju tcyꞌajal Nerías, in oc tene naꞌl Dios cyjaꞌ: 17 Aya Nman Dios, tucꞌil nim tipumala bant cyaꞌj ex txꞌotxꞌ tuꞌna. Mintiꞌ jun mlaywit bant tuꞌna. 18 In tzaj tyecꞌuna tcꞌujlalila cye elaꞌ mil xjal, pero ax icx in cub tkꞌoꞌna cycastiw ke cꞌwaꞌlbaj tuꞌn tlaj cyil ktzan cyman. Aya Dios, nimxix toclena ex at tipumala tuꞌn tbant tcyakil tuꞌna, aju tbiya atzun jlu: Kman Tajaw Tcyakil. 19 Nimxix tnabla tiꞌj aju in cub t-ximana ex maꞌxix cyxilen ke tbinchbena in che bant, in tila tcyakil aju in bant cyuꞌn xjal, tuꞌn t-xi tkꞌoꞌna chojbil cye ic tzaꞌnx cybinchben ex ic tzaꞌnx cyakꞌunben. 20 Tuꞌna e bant ke señ ex ke binchben nim cyipumal tuj Ejipt, ex cucx tbant tuꞌna jaꞌlo cyxol aj Israel ex cyxol cycyakil xjal; cyjaꞌtzun, biꞌmaj tbiya tuj tcyakil twitz txꞌotxꞌ ex cucx jaꞌlo. 21 Tucꞌil nim tipumala e etz tiꞌna aj Israel tuj Ejipt, akeju etzan tuꞌna, e bant ke señ ex ke binchben nim cyipumal tuꞌna, cyjaꞌtzun tzaj cyxobil cycyakil xjal. 22 Xi tkꞌoꞌna txꞌotxꞌ lu cye aj Israel, aju txꞌotxꞌ tbanil ex kꞌinun txꞌotxꞌ, ic tzaꞌnx otok txi ttziyana cye ktzan cyxeꞌchel. 23 Tejtzun cyul tuj txꞌotxꞌ lu ex tej toc te cye, mintiꞌ xi nimana cyuꞌn, mintiꞌ xi cyniman ke tleya ex mi jun tyola japun cyuꞌn, aju xi tmaꞌna cye. Cyjaꞌtzun ma tzaj t-samaꞌna tcyakil cꞌixbisabl lu cyibaj.
24 Atzun jaꞌlo ma jaw cybinchaꞌn aj Caldey cyxwetzbil tuꞌn cyoc tzokpaj kꞌojlel tiꞌj tnam. Tuꞌn kꞌoj, weꞌyaj ex txꞌuꞌj yabil ctzyetel ju tnam lu cyuꞌn. Aya Nman, lu in tila ya chꞌix tjapun baj tcyakil aju tzaj tmaꞌna. 25 Nman, ma tzaj tmaꞌna weye tuꞌn tlakꞌet txꞌotxꞌ wuꞌne ex tuꞌn tchjet wuꞌne cywitz ke testiw, ex chꞌix ttzyet tnam cyuꞌn aj Caldey, chi Jeremías.
26 Tzajtzun ttzakꞌweꞌn Kman te Jeremías: 27 Akine Dios, Cydios cycyakil xjal, ¿Atpe jun tiꞌxti mlay bant wuꞌne? 28 Cyjaꞌtzun cxel nmaꞌne teya: Cxel nkꞌoꞌne tnam lu tuꞌn ttzyet cyuꞌn aj Caldey ex tuꞌn tcyaj ten tjakꞌ tcawbil Nabucodonosor aju rey te Babilonia. 29 Ke aj Caldey in che kꞌojin tiꞌj tnam, jaꞌlo che oquetz tuj ex cꞌoquel cykoptzꞌiꞌn kꞌakꞌ tiꞌj; cbel tzꞌeꞌy cyuꞌn, cyucꞌix ke ja jatum in cub cypatun storac cywiꞌ twitz Baal ex jatum in cub cykoꞌn taꞌl twitz uva cywitz ke tilbilal nnoꞌc cydiosin; ex tuꞌn jlu ma tzaj nkꞌoje cyiꞌj. 30 Atxix t-xe tnejel ke aj Israel ex ke aj Judá oꞌcx in cybinchaꞌn aju mintiꞌ in chin tzalaje tiꞌj, cucx in tzaj nkꞌoje cyuꞌn aj Israel tuꞌnju in che cꞌulun cywitz ke tilbilal cyuꞌnx in cub cybinchaꞌn. Akine Dios in chin kꞌmante jlu. 31 Atxix tej tjaw binchet tnam lu, ax icx jaꞌlo, mintiꞌ jun maj miwt in tzaj ntxꞌuꞌjile ex nkꞌoje cyuꞌn. Cyjaꞌtzun cbel naj tnam wuꞌne. 32 Ma tzaj nkꞌoje tuꞌn tlaj tcyakil mya baꞌn in cybinchaꞌn aj Israel ex aj Judá, cyucꞌix cyrey, ke nejenel cye, ke pal at cyxol, keju nnoꞌc cykꞌon cyib te nsanjele ex cycyakil keju najl tuj Judá ex tuj Jerusalén. 33 Ma tzꞌajtz cykꞌoꞌn ttzal cyiꞌj nwitze ex masque cucx in xi nkꞌoꞌne xnakꞌtzbil cye, mintiꞌ ma txi cyniman ex mintiꞌ ma txi cybiꞌn cawbil cye wuꞌne. 34 Malpe tzꞌocx cykꞌoꞌn ke tilbilal icꞌbilxix tuj njaye jatum in jaw nimsaꞌn nbiye, ex tuꞌn jlu ma tzꞌilix njaye cyuꞌn, 35 ex tuj chkꞌajlaj Ben-hinom ma jaw cybinchaꞌn ke altar te Baal tuꞌn tcub cypatun cycyꞌajal ex cymeꞌjel te chojbil twitz Moloc; a jlu icꞌunxix wuꞌne, mintiꞌ xi nmaꞌne cye ex mintiꞌ ul chꞌin tuj nximbetze tuꞌn tbant cyuꞌn icju, porque tuꞌn jlu ma cybincha aj Judá mya baꞌn nwitze.
Xi ttziyan Kman jun yol cye xjal etzan tuꞌn
36 Akeye in cymaꞌne ka tuꞌn tcyaj tnam lu tjakꞌ tcawbil rey te Babilonia tuꞌn tlaj kꞌoj, weꞌyaj ex txꞌuꞌj yabil, atzunte Dios aju Cydios aj Israel in tmaꞌn cyjaꞌ: 37 Che oquel nchmoꞌne aj Israel ex che eletz wiꞌne cyuj cycyakil nasyon jatum o che pon nsputune tej ttzaj nkꞌoje ex ntxꞌuꞌjile xobajilxix, ex che ajetz wiꞌne tuꞌn cyul tuj lugar lu, tuꞌntzun cyankꞌin tuj txubtxaj. 38 Che oquel te jun tnam etzan wuꞌne, atzun weye chin oquele te Cydios. 39 Wuꞌne cꞌoquel cyanmi ex cyximbetz te junx, tuꞌntzun cyniman weye te jumajx, te jun baꞌn te cye ex te cye ke cyiyjil che ul itzꞌj te tibajxi. 40 Cyjel bant tiꞌj jun nyole te jumajx cyucꞌil: Cxel ntziyane tuꞌn cucx tuꞌn nbinchanteye baꞌn cye, ex wuꞌne ctzajel nimxix cygan tuꞌn cyniman weye, tuꞌntzun mi tel cypaꞌntl cyib wiꞌje. 41 Chin tzalajele oc nbinchanteye baꞌn cye; tuꞌn tcyakil wanmiye ex axix toc wuꞌne che ul wiꞌne tuꞌn cynajan tuj txꞌotxꞌ lu.
42 Porque chi Kman: Ic tzaꞌn o tzaj nsamaꞌne cꞌixbisabl matijxix cyibaj xjal lu, cyjaꞌxtzun ctzajel nsamaꞌne tcyakil baꞌn, ic tzaꞌnx o txi ntziyane cye. 43 Ex clakꞌetel juntl maj txꞌotxꞌ cyuꞌn xjal tuj tnam lu, aju in cymaꞌne ka ctzyetel cyuꞌn aj Caldey ex ka cyjel ten ic tzaꞌn jun tzkij txꞌotxꞌ mintiꞌ xjal tuj, mi alumaj. 44 Che lakꞌetel txꞌotxꞌ ex cbantel cyuꞌjil tucꞌil sey ex cypirm testiw cꞌoquel cyiꞌj. A jlu cbantel tuj cytxꞌotxꞌ aj Benjamín, cyuj ke aldey tiꞌjele tnam Jerusalén, cyuj ke tnam te Judá, cyuj ke tnam te tiwitz txꞌotxꞌ, cyuj ke tnam ateꞌ t-xe witz ex cyuj ke tnam ateꞌ tuj txꞌotxꞌ Néguev, porque che ajetz meltzꞌaj wuꞌne jatum otok che pon kꞌiꞌn pres. Akine Dios in chin kꞌmante jlu.