2 Tuj lugar mintiꞌ cynajbil xjal tuj o nbinchaye xtalbil cye aj Israel, akeju mintiꞌ e cub byoꞌn tuꞌn spad tej in che jyontok ojlabl, chi Kman. 3 Cub tyecꞌun tib Kman kwitz atxix ojtxi ex tma cyjaꞌ: Te jumajx ma che ncꞌujlaye ex cucx tkꞌakꞌan ncꞌuꞌje cyiꞌje. 4 Akeye aj Israel, axix toc cjawil nbinchaꞌne juntl maj cytanmiye. Che elexe bixal juntl maj tucꞌil cychinbe pandereta, in che tzalaje wen. 5 Cbelex cyawaꞌne juntl maj tkan uva cywiꞌ ke witz tuj Samaria, ex akeju che awal tkan uva che loꞌl tiꞌj twitz. 6 Porque tzul tkꞌijlalil che jawil schꞌin ke xkꞌukil ateꞌ cywiꞌ ke witz tuj cytxꞌotxꞌ aj Efraín, ex oc cymaꞌ: Cytzaje, koꞌ tuj tnam Sión jatum taꞌ Kman aju Kdios.

7 Chi Kman: Che bitzane tuꞌn tzalajbil cyiꞌj tiyjil Jacob, porque atzun ju nasyon lu mas maꞌ toclen cywitz cycyakil mastl nasyon. Che bitzane te Dios tuꞌn cybinte cycyakil xjal ex cymanxe: Aya Kman, che tcloma ke xjal etzan tuꞌna, akeju chꞌintl ateꞌx. 8 Che ajetz wiꞌne tuj txꞌotxꞌ tuj tbankꞌab kꞌij ex che tzajel nchmoꞌne max ttxaꞌnpun txꞌotxꞌ, cyucꞌix ke moẍ ex ke cox, cyucꞌix ke xuꞌj chꞌixtok tul itzꞌj cyal ex keju matokx tul-len itzꞌj cyal; nim txkan xjal che ul meltzꞌaj. 9 Che ul in che naꞌn Dios ex in che okꞌ. Che tzajel wiꞌne ttziꞌyile aꞌ in bet, tuj jun be chkꞌajlaj tuꞌntzun mi cyjaw tolj, porque akine mambaj cye aj Israel, ex a Efraín nej ncyꞌajale.

10 Akeye nasyon, cybintze tyol Kman ex cymanxe cyuj lugar xiꞌyni ttzi mar. Cymanxe: O che baj t-sputun Kman ke aj Israel, pero che oquel tchmoꞌn juntl maj ex che oquel tcwentin ic tzaꞌn jun pastor in che oc tcwentin ke t-ẍneꞌl, che chicuye. 11 Porque tuꞌn Kman o che coꞌpj ke tiyjil Jacob ex o che clet tuꞌn cye keju mas at cyipun cywitz.

12 Che ul ex che bitzal tuꞌn tzalajbil twi witz Sión, che tzalajel tiꞌj ju baꞌn ctzajel tkꞌoꞌn Kman cye, ic tzaꞌn triw, taꞌl twitz uva, chibj aseyt, ke ẍneꞌl ex ke wacẍ. Ic che oquel ic tzaꞌn tkan awal aꞌlin wen, ex mlay che bisun. 13 Ke kꞌapoj che bixal tucꞌil nim tzalajbil, ax icx ke cuꞌxun ex ke tij xjal. Cxel nkꞌukbaꞌne cycꞌuꞌj. Cxel nkꞌoꞌne tzalajbil cye te t-xel cybis, ex mas nim tzalajbil cxel nkꞌoꞌne cye twitz ju cꞌixcꞌoj at cyiꞌj nej. 14 Cxel nkꞌoꞌne tbanil wabj cye pal tuꞌntzun cynoj wen, ex ke xjal etzan wuꞌne che tzalajel tiꞌj ju baꞌn cxel nkꞌoꞌne cye. Akine Dios in chin kꞌmante jlu.

15 Chi Kman: In binjtz tkꞌajkꞌajel cywi xjal tuj Ramá in che wuyin ex in che okꞌ wen. In okꞌ Raquel cyiꞌj ke tal ex mintiꞌ taj tuꞌn tkꞌukbanjtz tcꞌuꞌj porque otok che naj.

16 Pero chi Kman te Raquel: Miꞌn tzꞌokꞌa mastl, miꞌn tzꞌel mastl taꞌl twitza, porque tzul t-xel teya tiꞌj ju ma tzicꞌx tuꞌna, ex che ajetz ke tala tuj cytxꞌotxꞌ aj kꞌoj cyiꞌj. Akine Dios in chin kꞌmante jlu. 17 Keꞌ tcꞌuꞌja, porque tzul jun baꞌn te teya tuj tkꞌijlalil tzul; che ul meltzꞌaj ke tala tuj cytanmi. Akine Dios in chin kꞌmante jlu. 18 O nbiye ke tiyjil Efraín in che ayayan cyuw wen ex in cymaꞌn: Ma cub kcastiwoye tuꞌna tuꞌnju ic koꞌye nej ic tzaꞌn jun tor mintiꞌ in mansix, ko tiꞌnxa juntl maj tucꞌila ex jacu ko aj meltzꞌaje, porque aya Kmane ex Kdiose. 19 El kpaꞌn kibe tiꞌja, pero ma tzꞌajtz tiꞌj kanmiye, ma tzꞌel knicꞌe tiꞌj kile ex nnoꞌc kkꞌajtzaꞌne ttzi kxuꞌque tuꞌn tlaj kbise; ma tzaj kchꞌixwiye ex ma cub kmansin kibe tuꞌn tlaj kile o kbinchaye tuj kcuꞌxumale, che chi tiyjil Efraín.

20 Ic cyten ke tiyjil Efraín te weye ic tzaꞌn jun cꞌwaꞌlbaj cꞌujlaꞌnxix ex atzun keju mas in chin tzalaje cyiꞌj. Masque in che cub ncawine, pero cucx in kꞌakꞌan ncꞌuꞌje cyiꞌj, cyjaꞌtzun in tzaj taꞌw tuj wanmiye ex nimxix in tzꞌeꞌy ncꞌuꞌje cyiꞌj. Akine Dios in chin kꞌmante jlu.

21 Akeye aj Israel, biꞌx cykꞌon cyaje techal be, cykꞌonque cwent tiꞌj be jatum e bete, tiꞌj be jatum e jeꞌx kꞌiꞌne, ex ax cyajtz meltzꞌaje tuj juntl maj. Akeye aj Israel, cyajtz meltzꞌaje tuꞌn cyule juntl maj tuj cytanmiye. 22 ¿Jtoj ban t-xi cycoline tuꞌn cybetjeꞌye ic tzaꞌn jun kꞌapoj miban bin? Akine Dios ma nbinchaye jun tiꞌxti acꞌaj twitz txꞌotxꞌ: Ake xuꞌj che oquel ten colol cyiꞌj xinak.

23 Chi Kman aju Tajaw Tcyakil ex Cydios aj Israel: Oc cyajtz meltzꞌaj ke aj Judá tuꞌn cyul juntl maj tuj cytxꞌotxꞌ ex tuj cytanmi, cxel cymaꞌn juntl maj cyjaꞌ: Awt Kman cyꞌiwlante teya, aya witz xjan jatum in binchet aju tzꞌaklxix. 24 Junx che najal aj Judá cyuj ke tnam ateꞌ tuj cytxꞌotxꞌ cyucꞌil ke akꞌnal tiꞌj txꞌotxꞌ ex ke pastor alumaj. 25 Cxel nkꞌoꞌne nim cywa ex nim cycꞌa keju sicni ex keju mintiꞌ cyipun, chi Dios.

26 Ultzun nnable ex jaw nqueꞌyine. Puro baꞌn ela nwatle nnaꞌne.

27 Chi Kman: Tzul tkꞌijlalil che chmetel xjal ex ke alumaj wuꞌne tuj cytxꞌotxꞌ aj Israel ex tuj Judá. 28 Ic tzaꞌnx o nbinchaye cyiꞌj tuꞌn cyicꞌ wiꞌne tuꞌn cyxiꞌ tuj juntl lugar, tuꞌn tcub xitj cytanmi, tuꞌn cybaj naj ex tuꞌn cyyajlanjtz, icxtzun oc nbinchaye tuꞌn cyjaw binchet juntl maj cytanmi ex tuꞌn cyul wiꞌne juntl maj tuꞌn cyten cyuj. Akine Dios in chin kꞌmante jlu.

29 Tuj tkꞌijlalil tzul mlay cyma juntl maj cyjaꞌ: Ke mambaj xi cyloꞌn txꞌam uva, cyjaꞌtzun at taꞌw twitz cyeꞌ ke cycꞌwaꞌl, che chiwt. 30 Porque aju cxel loꞌnte txꞌam uva, ax te ctzajel chyoꞌn twitz teꞌ tuꞌn. Cyjaꞌtzun teylex te junjun cymel tuꞌn tex til.

31 Chi Kman: Tzul tkꞌijlalil tuꞌn tbant tiꞌj jun acꞌaj yol wuꞌne cyucꞌil aj Israel ex aj Judá. 32 Aju yol cyjel bant tiꞌj wuꞌne, mya ic tten ic tzaꞌn yol o cyaj bant tiꞌj wuꞌne cyucꞌil ke cyxeꞌchel tej cyetz nẍakluꞌne tuj txꞌotxꞌ Ejipt, porque mintiꞌ japun cyuꞌn masque akine cyajaw. Akine Dios in chin kꞌmante jlu. 33 Aju nyole cyjel bant tiꞌj cyucꞌil aj Israel tuj tkꞌijlalil tzul, atzun jlu: Cꞌoquex nkꞌoꞌne nleye tuj cynabl ex cbel ntzꞌibane twitz cyanmi; akine chin oquel te Cydios, atzun cye che oquel te jun tnam etzan wuꞌne. Akine Dios in chin kꞌmante jlu. 34 Entons mya il tiꞌj tuꞌn cykꞌonte xjal xnakꞌtzbil cyxolx mi cye ke cyerman tuꞌn tel cynicꞌ wiꞌje ka akine Dios, porque cycyakil cꞌelel cynicꞌ wiꞌje, tzaꞌnx keju chꞌin cyoclen, ax icx keju maꞌ cyoclen. Cbel nnajsaꞌne tcyakil cybinchben mya baꞌn ex mlay tzaj nnaꞌntle cyil juntl maj. Akine Dios in chin kꞌmante jlu.

35 Ate Kman aju cyaj kꞌonte kꞌij twitz cyaꞌj tuꞌn tkꞌonte spicꞌun kꞌijtl, ex aju cyaj kꞌonte xjaw ex ke cheꞌw tuꞌn cykꞌonte spicꞌun te konicꞌan, aju in yucch mar tuꞌn ex in julin oc tjatz pulj, aju toc tbi Kman Tajaw Tcyakil, chi cyjaꞌ: 36 Oꞌcx ka ma che naj cycyakil jlu, atzun kꞌij ya mya etzantl ke aj Israel wuꞌne. Akine Dios in chin kꞌmante jlu. 37 Alcye jun kꞌij ka ma bant techet twitz cyaꞌj ex ka ma tzꞌel cynicꞌ xjal tiꞌj jatum taꞌ t-simyentil txꞌotxꞌ, atzun kꞌij che elel wicꞌune aj Israel tuꞌn tlaj tcyakil cybinchben mya baꞌn. Akine Dios in chin kꞌmante jlu.

38 Chi Kman: Tzul tkꞌijlalil tuꞌn tjaw binchet juntl maj tnam lu tuꞌn toc te weye. Cxelx keꞌ tiꞌj nintz ja Hananeel ex max cpol baj ttzi Tpwertil T-scyin Tnam. 39 Oc tpon ttxlaj Tpwertil T-scyin Tnam, jikan cxeꞌl tiꞌj mojon tuꞌn tpon max ttxaꞌn tal witz Gareb ex atzun ckꞌol welt tuꞌn tpon ttxaꞌn lugar Goa. 40 Tcyakil chkꞌajlaj jatum in che cuꞌx makut ke cyimni ex jatum nneꞌx chitun tzaꞌj, ex tcyakil ju cojbil tjax tibaj tkꞌab xak Cedrón, tuꞌn tpon baj jatum taꞌ Tpwertil Cyja Chej tcub tuj tjawitz kꞌij, che oquel te xjan te weye. Aju tnam lu mlay cub xitj ex mlay naj, cucx ctel te jumajx, chi Kman.