Tzaj ttziyan Kman alcye tuꞌn tbaj cyiꞌj aj Israel te yajxi
30
Atzun ke yol lu tzaj tmaꞌn Kman te Jeremías:2 Ate Kman aju Cydios aj Israel in tmaꞌn cyjaꞌ: Tzꞌiban cuꞌxa tuj jun libro tcyakilju yol o txi nmaꞌne teya, 3 porque tzul tkꞌijlalil tuꞌn cyajtz meltzꞌaj ke xjal etzan wuꞌne, ake aj Israel ex ke aj Judá, akeju o cheꞌx kꞌiꞌn pres. Wuꞌne cbantel tuꞌn cyul meltzꞌaj tuj txꞌotxꞌ xi nkꞌoꞌne te cyetzbil ktzan cyxeꞌchel. Akine Dios in chin kꞌmante jlu.
4 Atzun ke yol lu o tma Kman cyiꞌj aj Israel ex cyiꞌj aj Judá. 5 Chitzun Kman cyjaꞌ: In binjtz tkꞌajkꞌajel cywi xjal in che schꞌin tuꞌn cyxobil, in che jaw secꞌpaj ex mya tuj txubtxaj ateꞌ. 6 Cykaninxe: ¿Atpe jun xinak jacu tzul itzꞌj tal? ¿Tikuꞌntzun in wile in jaw cyxkutzꞌin cyib ke xinak mer ic tzaꞌn jun xuꞌj oc nnuꞌl itzꞌj tal? ¿Tikuꞌntzun cycyakil puro spelin ma che oc? 7 Chꞌix tul canun kꞌij xobajilxix, naꞌnx ttzaj jun maj icju. Aju kꞌij lu cꞌoquel te jun bis maꞌxix cye tiyjil Jacob, pero che cletel. 8 Akine Dios Tajaw Tcyakil in nmaꞌne jlu: Che tzokpetel ke xjal etzan wuꞌne tjakꞌ cycawbil ke majnil cye, ex mlay che oc juntl maj te cymajen xjal cyuj junxitl nasyon. 9 Nok oꞌcx che ajbel weye akine Cyman ex Cydios, ex che ajbel te David aju cꞌoquel nkꞌoꞌne te rey cyxol.
Ke xjal etzan tuꞌn Kman che cletel tuꞌn
10 Akine Dios in chin kꞌmante jlu: Miꞌn che xobe akeye tiyjil Jacob ex ajbel weye, miꞌn tzaj cyxobile akeye aj Israel, porque che cletele wuꞌne cyucꞌix ke cyiyjile, tuj tnam najchak jatum o che pon kꞌiꞌne. Che ankꞌile juntl maj tuj txubtxaj, ex mi jun cꞌoquel xobtzante cyeye. 11 Akine Dios cxel nmaꞌne jlu: Lu kine atine cyucꞌile tuꞌn cyclete. Che bajel nxitune cycyakil nasyon jatum otok che baj nsputune, atzun cyeye mlay che naje wuꞌne; nok oꞌcx cbel nkꞌoꞌne cycastiwoye ic tzaꞌnx cybinchbene, ex mlayx tzicꞌx cyiꞌje tuꞌn miꞌn tcub cycastiwoye.
12 Chi Kman cyjaꞌ: Aju ẍil toc cyiꞌje mlayx bant ex mintiꞌ kꞌanbil tiꞌj cꞌixblen toc cyiꞌje. 13 Mintiꞌ jun taj onin cyiꞌje ex mintiꞌ kꞌanbil tuꞌn cybanixe tiꞌj ẍil toc cyiꞌje. 14 Ma tzicꞌ cynaꞌnjtze cyuꞌn cycyakil ke nasyon mojl cyyole cyucꞌil, ya mintiꞌtl cyaj cyiꞌje porque ma che cꞌixbiye wuꞌne mer ic tzaꞌn tuꞌn jun aj kꞌoj cyiꞌje. Cyuwxix cycastiwoye o cub wuꞌne tuꞌn tlaj nim cybinchbene mya baꞌn ex tuꞌn tlaj cyile nimxix. 15 ¿Tikuꞌn in che schꞌine tuꞌn taꞌw ẍil toc cyiꞌje? Mintiꞌ kꞌanbil tiꞌj cꞌixbisabl toc cyiꞌje. Tuꞌn tlaj nimxix cybinchbene mya baꞌn ex tuꞌn tlaj cyile nimxix, cyjaꞌtzun ma nbinchaye jlu cyiꞌje. 16 Pero cycyakil keju ma che baj naje cyuꞌn, ax icx cye che bajel naj, cycyakil aj kꞌoj cyiꞌje che xel kꞌiꞌn pres tuj juntl tnam, ex keju in xi cyelkꞌaꞌn aju at tuj cytanmiye, ax icx cye cxel elkꞌaꞌn aju at tuj cytanmi; keju in che el kꞌinte aju at cyeye, ax icx cye cꞌelel kꞌiꞌn aju at cye. 17 Che banixele wuꞌne, cꞌoquel nkꞌanine ẍil toc cyiꞌje masque in cymaꞌn ke aj kꞌoj cyiꞌje ka o cyaj colin tnam Sión ex mintiꞌ jun tajbil tiꞌj. Akine Dios in chin kꞌmante jlu.
18 Chi Kman cyjaꞌ: Che ul meltzꞌaj ke tiyjil Jacob wuꞌne, akeju o cheꞌx kꞌiꞌn tuj juntl tnam, ctzajel kꞌakꞌan ncꞌuꞌje tiꞌj cytanmi, ax che jawil binchet tnam cyibaj cytxꞌakan ex ax cjawil binchet tja rey jatum tcubtok tnejel. 19 Cyuj ke tnam lu che bitzal xjal te akꞌbil chjonte te Dios ex cbinjtzel cytzalajbil. Mlay cub naj cyajlal, porque wuꞌne cchmetel cybet. Mlay che el icꞌun cyuꞌn xjal, porque wuꞌne che jawil nimsaꞌn. 20 Che oquel aj Israel ic tzaꞌn cyten nej; segurxix ctel cytanmi nwitze ex wuꞌne cbel cycastiw ke yajlal cye. 21 Cyxolxtzun cꞌeletz jun nejenel cye ex cyxolx cꞌeletz jun cawil, ex ctzajel wiꞌne tuꞌn ttzaj lakꞌeꞌ, atzunte tzul lakꞌeꞌ wucꞌile, porque ¿alcye jun jacu tnimari tib tuꞌn ttzaj lakꞌeꞌ nwitze? 22 Che oquel te jun tnam etzan wuꞌne, atzun weye chin oquele te Cydios. Akine Dios in chin kꞌmante jlu.