3 Cybinchame cyten cycyakil txcaj makbil ex cyxiꞌye tuj kꞌoj. 4 Cybinchame cyten chej jawolte carwaj, ex cyjaxe chejil cyibaj txkantl chej, cykꞌoꞌn jaxe cypasbile cꞌuxbil ex cytxolbanx cyibe, cyjakun baje ttzi cyspadiye ex cykꞌoꞌnque cychicyete cꞌuxbil.

5 Pero ¿ti ma wile? Ma che ajtz ok ke soldad aj Ejipt tuꞌn cyxobil, ma cub cyiꞌj, ke kꞌojlel ma che el ok ex mi tuꞌn taj cyqueꞌyin cyiꞌjxi; at xobajil tuj tcyakil lugar. Akine Dios in chin kꞌmante jlu. 6 Mlayx bant tuꞌn cyel ok keju cyuw che ojkelan ex mi tuꞌn cytzokpaj keju at nimxix cyipun. Max tuj tbankꞌab kꞌij, ttxlaj nima Éufrates ma che jaw tolj ex ma che cub tzꞌak. 7 ¿Alcyetzunju in chꞌiy tjaw ic tzaꞌn nima Nilo, ic tzaꞌn jun nima in jululun? 8 A Ejipt in chꞌiy tjaw wen, ic tzaꞌn nima Nilo, ic tzaꞌn jun nima in pulin wen. Che chi aj Ejipt cyjaꞌ: Ko chꞌiyil ex cbajel noj tcyakil twitz txꞌotxꞌ kuꞌn, che bel kxitun ke tnam cyucꞌix ke xjal najl cyuj, che chi. 9 Che keline akeye chej, che keline cyuw akeye cyjax cyuj ke carwaj te kꞌojbil. E tcub be cyuꞌn ke soldad te Etiopía ex te Put, akeju banin cyten tucꞌil cymakbil ex ke soldad te Lud, akeju baꞌn che xoꞌn plech. 10 Aju kꞌij lu, atzun tkꞌijlalil Kman aju Tajaw Tcyakil, atzun kꞌij cxelil tuꞌn Kman cyiꞌj ke aj kꞌoj tiꞌj. Che bel tbyoꞌn ke xjal tuꞌn spad ocxi tbaj tgan tuꞌn tbiyan, ex cꞌelel nim cychcꞌel xjal tuꞌn, porque tuꞌn Kman aju Tajaw Tcyakil cꞌoquel jun matij biyenj, ic tzaꞌn jun chojbil twitz Kman, tuj txꞌotxꞌ tuj tbankꞌab kꞌij aju tcub ttxlaj nima Éufrates.

11 Akeye aj Ejipt, cyxiꞌye jyolte remey tuj Galaad, pero masque tzꞌajben nimcu remey cyuꞌne, mlayx kꞌanan cyiꞌje, porque mintiꞌ kꞌanbil cyeye. 12 Ma cybi mastl nasyon ka ma cub cychꞌixwiye, ex tuj tcyakil twitz txꞌotxꞌ ma binjtz tkꞌajkꞌajel cywiꞌye in che okꞌe porque akeju cysoldadiye cyuwxix cycꞌuꞌj tuj kꞌoj in che jaw tolj jun tiꞌj juntl ex cycabil in che cub tzꞌak twitz txꞌotxꞌ.

13 Tzaj yolin Kman tucꞌil Jeremías aju t-sanjel, tej ttzaj Nabucodonosor aju rey te Babilonia kꞌojlel tiꞌj tnam Ejipt, ex tma cyjaꞌ:

14 Cymanxe tkanil lu tuj Ejipt, tuj Migdol, tuj Menfis ex tuj Tafnes: Cybincham cytene, nok list che tencuye, porque lu in che naj xjal tuꞌn spad tiꞌjele tnam. 15 ¿Tikuꞌn ma che el ok ke t-soldadiye cyuw cycꞌuꞌj tuj kꞌoj? ¿Tikuꞌn mintiꞌ ma cyipa tuꞌn cycub weꞌ cywitz aj kꞌoj? Porque wuꞌne ma che cub tzꞌak, akine Dios. 16 Ma tzꞌoc twi cykan cysoldadiye, ma che cub tzꞌak jun tibaj juntl ex in cymaꞌn cyxolx: Che weꞌctze, e kaj meltzꞌaj tuj ktanmi, tuj tnam jatum o ko itzꞌj, e kel ok twitz kꞌoj cyuwxix wen, che chi.

17 Cymanxe tiꞌj Faraón aju rey te Ejipt cyjaꞌ: Nim in baj tyolin tib, pero oc tpon tkꞌijlalil, mintiꞌ chꞌin in bant tuꞌn, che chicuye. 18 Akine Rey ex aju nbiye atzun jlu, Dios Tajaw Tcyakil, cxel nmaꞌne jun yol axix toc: Ic tzaꞌn witz Tabor matijxix twaꞌl, ex ic tzaꞌn witz Carmelo aju tcub ttxlaj mar, cyjaꞌtzun cyten ke aj kꞌoj che ul. 19 Akeye najl tuj Ejipt, cybincham cytene tuꞌn cyxi kꞌiꞌne pres tuj juntl tnam, porque aju tnam Menfis cꞌoquel te jun tzkij txꞌotxꞌ, biꞌx cbajel xitj ex mi jun xjal cyjel ten tuj. 20 Aju tnam Ejipt ic tten ic tzaꞌn jun tal vac tbanilxix queꞌyin, pero tuj txꞌotxꞌ tuj tbankꞌab kꞌij ctzajel jun xcatz txꞌaꞌl tiꞌj. 21 Ax icx ke soldad te junxitl tnam otok che tzaj txcoꞌn te onil, ic cyten ic tzaꞌn ke tal wacẍ ulni cynabl, pero ax icx cye che elel ok, mlay che weꞌ cywitz aj kꞌoj, porque ma pon tkꞌijlalil tuꞌn cynaj, atzun or tuꞌn tcub cycastiw. 22 Che elel ok aj Ejipt in che kꞌajt ic tzaꞌn jun lobaj jililin tel; oc cyul lakꞌeꞌ ke soldad aj kꞌoj cyiꞌj ex oc cyoc tzokpaj cyiꞌj tucꞌil siwbil cꞌuxbil mer ic tzaꞌn in che txꞌemin tzeꞌ, 23 ex mer ic tzaꞌn in che txꞌemin tkan tzeꞌ pin wen. Akine Dios in chin kꞌmante jlu. Oc cyul, mas nim cyajlal ic tzaꞌn ke ẍplon, ex mi jun jacu bant tajlante cye. 24 Cbel cychꞌixwi aj Ejipt ex che cyjel ten tjakꞌ tcawbil nasyon tuj tbankꞌab kꞌij.

25 Ate Kman aju Tajaw Tcyakil ex Cydios aj Israel chi cyjaꞌ: Cbel tcastiw Amón wuꞌne, aju cydios aj Tebas, ax icx cbel cycastiw aj Ejipt wuꞌne, cyucꞌix cydios ex cyrey, ax icx te Faraón cyucꞌix keju nnoꞌc keꞌ cycꞌuꞌj tiꞌj. 26 Che xel nkꞌoꞌne tuꞌn cycyaj ten tjakꞌ tcawbil Nabucodonosor aju rey te Babilonia, ex tjakꞌ cycawbil keju at cyoclen ttxlaj, akeju nnoꞌc tilil cyuꞌn tuꞌn cycub byoꞌn. Pero te tibajxi che pol xjal juntl maj najal tuj tnam Ejipt ic tzaꞌnx tten nej. Akine Dios in chin kꞌmante jlu.

27 Miꞌn che xobe akeye tiyjil Jacob aju ajbel weye. Miꞌn tzaj cyxobile akeye aj Israel, porque akeye cyucꞌix ke cyiyjile che cletele wuꞌne tuj tnam najchak jatum che pol kꞌiꞌne; che ankꞌile juntl maj tuj txubtxaj ex mi jun cꞌoquel xobtzante cyeye. 28 Akine Dios in chin kꞌmante jlu. Miꞌn che xobe akeye tiyjil Jacob aju ajbel weye, porque atine cyucꞌile. Che bajel nxitune cycyakil nasyon jatum otok che baj nsputune, atzun cyeye mlay che baj naje wuꞌne; oꞌcx cbel nkꞌoꞌne cycastiwoye ic tzaꞌn cybinchbene, ex mlayx tzicꞌx tiꞌj tuꞌn miꞌn tcub cycastiwoye wuꞌne.