Atzun tkanil lu tzaj tmaꞌn Kman te Jeremías aju t-sanjel, cyiꞌj aj Filistey, tej naꞌnxtok toc tzokpaj Faraón kꞌojlel tiꞌj tnam Gaza. 2 Chi Kman cyjaꞌ: Ic tzaꞌn jun nima in chꞌiy, nneꞌx pax ex in cyaj mulkꞌaj tcyakil tjakꞌ, ictzun che tzajel nim soldad tuj txꞌotxꞌ tuj tbankꞌab kꞌij, ex cbajel naj tcyakil cyuꞌn, cyucꞌix ke tnam ex ke xjal najl cyuj. Cycyakil xjal che jawil schꞌin ex che okꞌel. 3 Oc tbinjtz tkꞌajkꞌajel cykan chej in che ojkelan wen, tucꞌix cykꞌajkꞌajel carwaj ex tkꞌajkꞌajel cyrwed, biꞌx che bel numj ke mambaj ex cyjel cycolin cycꞌwaꞌl. 4 Porque ma pon kꞌij tuꞌn cynaj aj Filistey, akeju mancbil onil cyiꞌj tnam Tiro ex Sidón. Ate Kman cbel xitunte cye aj Filistey, akeju e tzaj ojtxi tuj txꞌotxꞌ Cret. 5 Ke xjal najl tuj tnam Gaza cꞌelel cymatzoꞌn ttzmal cywiꞌ tuꞌn cybis ex mintiꞌtl in che kꞌajt xjal tuj tnam Ascalón. ¿Jtoj ban t-xi cycoline tuꞌn tbaj cykesine tiꞌj cyximlale tuꞌn cybise, akeye chꞌintl xjal aj Filistey? 6 ¿Jtoj ban t-xi tcolina tuꞌn tbiyana aya t-spad Kman? Taja tuj tjayila, chewix tcꞌuꞌja ex txulecuya. 7 Pero, ¿tzaꞌn tten tuꞌn t-xi tcolin spad tuꞌn tbiyan? Porque ate Kman ma tzaj kꞌmante te tuꞌn toc tzokpaj tiꞌj tnam Ascalón ex cyiꞌj cycyakil tnam ateꞌ ttziꞌyile mar.